Uko Murebwayire watotejwe na Padiri mu misa yarokokeye muri Seminari ya Ndera

Yanditswe na Evariste Nsengimana
Kuya 20 Gicurasi 2019 saa 05:44
Yasuwe :
0 0

Ubuhamya bwa Murebwayire Josephine warokokeye muri Seminari Nto ‘Saint Vincent de Paul’ i Ndera, bugaragaza neza uburyo Jenoside yakorewe Abatutsi yateguwe kandi ishyirwa mu bikorwa nyuma y’ingengabitekerezo n’itotezwa bakorewe igihe kirekire n’abarimo abihayimana.

Uyu mukecuru w’imyaka 64 ubuhamya bwe yabutanze ku wa 18 Gicurasi ubwo hibukwaga ku nshuro ya 25 abanyeshuri, abakozi, abihayimana n’abandi batutsi biciwe muri iyo Seminari.

Abuhera mu 1963 ubwo hagabwaga igitero mu Bugesera aho umuryango we wari warahungiye. Icyo gihe barahizwe bongera guhungira i Burundi ariko ntiyabasha kujyana n’ababyeyi kuko yaburaniye nabo mu rufunzo ruri mu rugabano rw’ibihugu byombi.

Yarukuwemo n’umwe mu babahigaga, ubwo bari bamusanganye n’abandi bagasabwa ko buri wese yegera abo mu muryango we ariko Murebwayire akabura uwo yegera.

Yahakuwe n’umwe mu babahigaga

Ati “Barambwira ngo mpitemo unjyana muri abo bantu bose bari aho. Nta n’umwe nari nzi. Narebye umugabo wari ufite imbunda, munini usa nabi kurusha abandi, ndavuga nti ‘Reka nsange uriya’ nyamara uretse kuba mubi ku isura, ntiyari mubi ku mutima.”

Yaramujyanye, amushyira mu muryango abasaba kumurera, bamwitaho nyuma bimukira i Kigali ndetse bamusubiza mu ishuri.

Wa mugabo wamukuye mu rufunzo yaje gushaka umugore ntiyiyumvamo Murebwayire, atangira kumwita umwana w’Inyenzi, aramutoteza kugeza ubwo amuhishurira ko ‘Inyenzi zongeye gutera yamwica’.

Murebwayire yakomeje kwihangana ariga ariko ari nk’umukozi wo mu rugo, ahozwa ku nkeke y’uko azicwa.

Nyuma baje kwimukira i Gitarama aho uwo muryango wavukaga we ataramenya aho umuryango we uherereye, wa mugore wamuhozaga ku nkeke atangira gushaka kumubuza kwiga no kumushyingira.

Murebwayire yakomeje kwihangana ariga, igihe cyo gukora ibizamini bisoza uwa gatandatu bamubwira ko mu kuzuza amafishi ashyiraho ko ari umuhutukazi ariko abasubiza ko ‘Niba ababyeyi banjye barahunze bitwa abatutsi, njye ntabwo ndi umuhutukazi’.

Yarabyanze bamubwira ko natsindwa ikizamini ari akazi ke ariko ku bw’amahirwe arabitsinda ariko abuzwa kujya kwiga, muri urwo rugo aza kuhakurwa n’umuyisilamu, amujyana kwiga i Remera-Rukoma adasezeye abamureraga.

Kwiga bye ntibyigeze byishimirwa na wa mugore wabimubuzaga kuko yaje kumuteranya ku kigo ko atwite ariko ubuyobozi bw’ikigo ntibwabyitaho.

Mu 1973 kuri iryo shuri yigagaho abatutsi baratotejwe, bigera aho bakora urutonde rwabo bateganya kwica, umwe mu bahutukazi arababurira baratoroka baje kubashaka barababura.

Murebwayire yakomeje gutotezwa aza kwigira inama yo gutoroka aho yarererwaga, asanga Se wabo i Kigali bimuviramo gucikiriza amashuri. Mu 1974 yashatse umugabo waje gufungwa mu 1990 ashinjwa kuba icyitso.

Yaberewe ikigeragezo na Padiri imbere y’imbaga y’abakiristu

Murebwayire wakundaga kugaragara mu miryango ya Kiliziya Gatolika, yaje gutotezwa n’umupadiri witwaga Gakuba wari inshuti n’umuryango we.

Ati “Ubwo Padiri Gakuba akimenya ko umugabo wanjye yafunzwe yatangiye kuntoteza ku buryo yateshwaga gusoma Misa neza, agasoma Ivanjiri akaba ari njye yigishaho.”

Padiri Gakuba wasomaga Misa i Ndera, mu kwigisha yatangaga ingero z’ibyitso kuri Murebwayire ashingiye ku kuba umugabo we yari afunzwe.

Ati “Niba hari uwamubwiraga ko ndi buze gusenga simbizi! Yapfaga kubona ninjiye mu kiliziya agasubira kwambara imyenda ya Misa..Ntabwo yashoboraga kwigisha icyasomwe atarahamagara Yozafina [Josephine]”

Ati “Niko Yozafi [Ahamagarwa na Padiri Gakuba], harya umugabo wawe ngo arafunze ra? Nkareba hasi. ‘Ndakubaza, harya ngo ni Inyenzi? Ngo ni Inkotanyi?’ Ngahaguruka, nti ‘Niko bamwise Padi.’ Ati ‘Ahaaa, Bakirisitu bavandimwe, ntimugire ngo inyenzi ziri kure.”

Murebwayire yatahaga yababaye ariko yibwira ko bitazongera, ku kindi cyumweru nabwo bikaba uko kugeza ubwo abakirisitu bamugira inama yo kutazagaruka ariko yanga gutatira Kiliziya yabatirijwemo.

Padiri Gakuba yaje kwerurira uwari umukuriye, Padiri Havugimana André, ko adakunda Inyenzi ariko amubwira ko niba atazishaka azigendera.

Ubuzima busharira mu gihe cya Jenoside

Mu gitondo cyakurikiye ihanurwa ry’Indege ya Habyarimana, mu rugo rwabo hazindukiye abasirikare bafite imbunda, babaza aho ‘Inyenzi zaraye zishe Habyarimana ziri, binjira mu nzu bakubita umugabo we n’abana ndetse babaka amafaranga ariko babasezeranya kugaruka kubica’.

Ubwoba bwakomeje kubataha uko ubwicanyi bwakomezaga gukara, aza guhungana n’abana bane b’abakobwa, abahungu na basaza be basigarana n’umugabo we. Icyo gihe urugendo ntirwaboroheye kuko ahantu henshi hari hamaze gushyirwa za bariyeri.

Murebwayire n’abana yahunganye bahuye n’abandi biyemeza guhungira ku ishuri ryari rihegereye bararamo, mu rukerera haza imodoka ya Komine, umushoferi wayo ashyiramo umuryango we [W’abahutu], Murebwayire amusabye kumutwarana nabo amucira mu maso, amubwira ko akabo kashobotse.

Yafashe abana be baragenda bageze mu nzira bahura n’umuminisitiri abashyira mu modoka, bageze kuri bariyeri interahamwe zibangura umupanga zishaka kumutema ariko uwo Minisitiri abanambaho.

Urugendo rwabo rwakomereje muri Seminari ya Ndera baraharara, mu gitondo abasirikare babasangayo n’abandi benshi bari bahahungiye, babasaba gusubira mu rugo babizeza kubarinda ariko Musenyeri Havugimana wari uhari arabyanga.

Ati “Nta minota yashize [Musenyeri] bahise bamurasa bagenda bazi ko yapfuye.”

Abahasigaye bahise bagotwa basabwa gutanga ikitwa ifaranga ryose bari bafite babwirwa ko ‘Amafaranga ari aya Perezida Habyarimana’.

Murebwayire avuga ko abana be abasirikare n’Interahamwe zabasohoye inyuma y’igipangu zigashaka kubasambanya ariko barabyanga. Nyuma yo kubyanga zabagaruye mu gipangu, ziriyamira ngo zatwaye abana zisize nyina.

Ati “Baranyambuye kandi namburwa n’umugore mugenzi wanjye. Icyo kintu kirambabaza cyane, iyo abagore bitwara neza ntabwo Jenoside iba yaragaze aho yaheze.”

Bahise batangira kurasa no gutema umwe ku wundi aho bari buzuye mu kibuga.

Ati “Hari Interahamwe ziruta ubwinshi uko tungana, baturyamishije hasi baradutemye nanjye navuye mu mirambo yabo.”

Murebwayire yabuze amazi yo kunywa, yikwega ajya mu muferege, anywa ayiretse avanzemo n’amaraso, haba hatungutse Interahamwe ebyiri, imwe igiye kumwica indi iyumvisha ko ari ukwihora ubusa atazakira, urw’uwo munsi aba ararusimbutse.

Yavuyemo yatemaguwe umubiri wose ariko Imana ikinga ukuboko ntiyapfa, yegera umupadiri wari uhari amugira inama yo kwihisha mu ruyuzi rwari ruhari, za nterahamwe zigarutse kumwica ziramubura.

Murebwayire yaje kuvamo yegura imirambo yose areba ko yabonamo umwana we ukiri muzima araheba, asubira muri rwa ruyuzi yifuza icyamwica arakibura.

Nyuma yiyemeje gusenga Imana yumva agaruye utubaraga, ahungira mu bwiherero bwarimo umwanda kurusha ubundi amaramo iminsi 21, Imana imurindirayo abasha kurokorwa n’Inkotanyi ku wa 1 Gicurasi 1994, asigara wenyine mu muryango we.

Jenoside yatangiye Murebwayire afite ibiro 75 ariko yarangiye asigaranye ibigera kuri 35 gusa.

Murebwayire Josephine ari gutanga ubuhamya
Ubuhamya bwa Murebwayire bushimangira ko Abatutsi batangiye gutotezwa kuva kera

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza