Uko Museveni yashidutse yaguye mu rungabangabo

Yanditswe na Dick Mugabe
Kuya 7 Kamena 2019 saa 08:17
Yasuwe :
0 0

Kuva ku ntambara zabereye Kisangani muri Repubulika Iharanira Demokarasi ya Congo zasize ingabo za Uganda iheruheru, Perezida Yoweri Kaguta Museveni yakunze kumvikana mu bushotoranyi ku Rwanda.

Ni ibikorwa birimo ubufasha aha imitwe y’iterabwoba irwanya Guverinoma y’u Rwanda ndetse no kongerera imbaraga ingabo ze.

Ubukangurambaga bw’ubushotoranyi bwa Museveni mu minsi ishize bwakomwe mu nkokora n’igitutu cy’abatavuga rumwe n’ubutegetsi, byatumye atangira noneho kwisobanura.

Ubu Perezida Museveni ari mu gihirahiro giterwa n’uburyo asagarira abantu n’uko atanga ibisobanuro.

Intangiriro

Mu nama yagiranye na Perezida Mkapa ubwo yageragezaga kuzahura umubano w’ibihugu by’ibivandimwe, Perezida Museveni yabwiye Perezida Kagame ngo “Ntiturakaraba”.

Mkapa abajije Museveni icyo ashaka gusobanura, Museveni yamubwiye ko Kagame azi ibyo yamubwiye.

“Gukaraba Inzigo” ni igikorwa cyabagaho mu muco w’Abanyarwanda bo hambere; iyo umuntu yicaga undi, imiryango yombi yaricaranaga hanyuma umuryango wiciye undi ugahitamo umuntu ukamushyikiriza abiciwe kugira ngo bihorere.

Ibi byashoboraga gushyira iherezo ku kwihorera kwashoboraga kuzabaho ndetse imiryango yombi ikongera kunga bwa bucuti.

Museveni yabwiraga Perezida Kagame ko nta bwiyunge bwashoboka kugeza igihe azahorera abasirikare be batakarije ubuzima i Kisangani. Ntiyigeze atezuka ku muhigo we.

Imyitwarire ya Perezida Museveni si mishya kuri Perezida Kagame basangiye umurage mbere yuko yiyita Umunyankore mu gihe Abanyarwanda abafata nk’abasuzuguritse.

Mu ijambo yagejeje ku Nteko Ishinga Amategeko ya Uganda ku wa 22 Kamena 2018, ryari rifite insanganyamatsiko ivuga ku “Guhangana n’imbogamizi z’umutekano muke muri Uganda’’, yemeye ko akomoka mu Umutara ariko ahita avuga ko Umutara wari agace ka Mpororo muri Ankole.

Nibyo Umutara wari agace ka Mpororo ariko Mpororo yari iy’u Rwanda. Habayeho konona amateka nkana mu kumvisha Inteko ko atari umwimukira wavuye mu Rwanda.

Umutara ntiwigeze uba agace ka Uganda ahubwo ni Mpororo yabarizwaga mu Rwanda ndetse abakoloni baza kukomeka kuri Uganda mbere yo kubona ubwigenge.

Museveni amaze kwandika izina mu gucurika amateka y’Akarere n’aya Afurika ashaka kugera ku ntego ze. Nyamara akeneye kwibutswa ko umunyamateka, umwanditsi n’umudipolomate w’Umufaransa wo mu kinyejana cya 19, Alexis De Tocqueville, yatanze umuburo ko “Amasomo ashingiye ku mateka yizwe nabi ashobora kugira ingaruka nyinshi kurusha kwirengagiza ahahise.’’

Kugerageza imbaraga z’igisirikare

Nyuma y’igihe gito avanye ingabo za Uganda muri RDC, Museveni yakusanyije abasirikare bakuru mu nzego zose, icyo gihe higwaga ikintu kimwe rukumbi, ‘Ese dufite ubushobozi bwo kugaba igitero ku Rwanda tukagitsinda?’

Igisubizo cyemeranyijweho cyabaye “Yego twabigeraho.’’

Yabajije abasirikare benshi ku giti cyabo, abayoboye batayo n’ingabo zirwanira mu kirere, abakoresha ibifaru, intwaro zikomeye n’abenjeniyeri bakomeye mu bya gisirikare.

Bose bamwijeje ko bafite ubushake n’ubushobozi bwo kugaba no gutsinda igitero ku Rwanda.

Gen. David Tinyefuza [Sejusa, yabaye Umuhuzabikorwa wa Serivisi z’Iperereza n’Umujyanama Mukuru wa Museveni], wari muri abo basirikare yumvise uwo mugambi wo gutera u Rwanda.

Yahamagaye Perezida Museveni aramubwira ngo niba ashaka kwihutisha iherezo ry’ubutegetsi bwe, azatere u Rwanda. Yamubwiye ko ingabo za Uganda (UPDF) nta bushobozi zifite bwo gutsinda u Rwanda.

Museveni yumvise inama ya Tinyefuza ariko akomeza gukuza igitekerezo cye. Yagumanye intego ye ariko ahitamo ubundi buryo bwo gukoresha abandi.

Uko niko yahuje urugwiro n’inyeshyamba zibumbiye mu Mutwe w’Inyeshyamba wa FDLR wiganjemo abakoze Jenoside mu Rwanda n’indi mitwe y’iterabwoba nka Rwanda National Congress (RNC).

Umugambi mubisha wa Museveni wo gukoresha abandi

Nyuma yo kumvishwa ko ingabo ze z’igihugu zitategura urugamba ku Rwanda ngo zitahe amahoro, Museveni yatangiye gushaka andi maboko n’abamwiyungaho. Yanatangiye kongerera imbaraga ingabo ze.

Muri ibyo bikorwa bye yakoreshaga uburyo butandukanye burimo;

1. Ubukangurambaga bwo gukorana n’imitwe yitwaje intwaro

Museveni yari yarafashe imitekerereze y’inshuti ye Muammar Gaddafi yakoreshaga arwanya ubukoloni.

“Sinshishikajwe na gahunda zawe za politiki cyangwa uburyo bwa gisirikare, nzaguha ubufasha bw’amafaranga n’ubw’igisirikare mu gihe cyose uzaba uri kurwanya ubukoloni.’’

Kuri Gaddafi, ubukoloni yabufataga nk’igihugu cyose gifashwa n’ibihugu bikungahaye birimo ibyo mu Burayi na Amerika.

Imitekerereze (philosophy) ya Museveni yo ivuga ko “Sindajwe ishinga na gahunda yawe ya politiki cyangwa y’igisirikare; nzagufasha mu gihe uri kurwanya Guverinoma y’u Rwanda.’’

Ni muri ubwo buryo yatangiye gufasha no kongerera imbaraga abarwanyi ba FDLR na RNC binyuze mu kubaha pasiporo za Uganda ziborohereza gukorera ingendo mu bice bitandukanye by’Isi mu bikorwa biharabika Guverinoma y’u Rwanda.

Abayobozi muri FDLR bahawe icumbi muri Uganda

Kuva hambere, Uganda yahoze icumbikiye abayobozi b’inyeshyamba muri FDLR bakorana bya hafi n’Urwego rw’Ubutasi rwa Uganda (CMI) rubaha aho kuba, rukabagaburira ndetse rukabagenera amafaranga y’urugendo no kubungabunga umutekano wabo. Intego bahuriyeho ni ugukuraho Guverinoma y’u Rwanda.
Urujijo kuri Philemon Mateke, washinzwe Imibanire n’Akarere

Mu mpinduka Museveni yakoze muri Guverinoma yagize Dr. Philemon Mateke, Umunyamabanga wa Leta ushinzwe ibibazo byo mu Karere.

Ishyirwaho rya Mateke w’imyaka 92 [wayigabanyije akayigeza kuri 76], amateka amugaragaza mu mikoranire n’abarwanyi basize bakoze Jenoside yakorewe Abatutsi.

Uruhare rwe ni uguhuza ibikorwa bya FDLR iri muri RDC basangiye ingengabitekerezo.

Mu 1973, Mateke yateguye ubwicanyi bw’impunzi z’abanyeshuri bigaga mu Ishuri ryisumbuye rya Mutolere.

Byasabye ko uwari Umuyobozi wungirije Jackson Rwahama yohereza ingabo kuri iryo shuri. Ubwo nibwo bushobozi gusa Museveni amubonamo ku myaka 97, bwatumye amuragiza gukurikirana ibibazo byo mu Karere.

Ibyahishuwe n’abarwanyi bakomeye muri FDLR

Abayobozi bakomeye muri FDLR bagarutse mu Rwanda ku bushake cyangwa abatawe mu yombi, bahishuye uruhare rwa Mateke mu guhuza ibikorwa bya FDLR na UPDF by’umwihariko CMI.

Mu mezi ashize, Umuvugizi wa FDLR, Ignace Nkaka uzwi nka La Forges Fils Bazeye n’Umuyobozi w’Ibikorwa by’Iperereza, Lt Col Jean Pierre Nsekanabo, bafatiwe ku mupaka wa RDC na Uganda bavuye i Kampala.

Batangaje ko bakoranye inama na Mateke n’abandi bayobozi bakomeye ba CMI, hamwe n’indi mitwe yitwaje intwaro ishaka gukuraho Guverinoma y’u Rwanda.

CMI yabagiriye inama yo gukorana kugira ngo ibahe ubufasha bwiza.

Ubukangurambaga bwa RNC

Perezida Museveni na we yakoze ubukangurambaga bugamije guhamagarira RNC n’indi mitwe gukora igisirikare gihuriweho.

RNC yagize uruhare mu bitero by’iterabwoba byagabwe mu Rwanda byahitanye ubuzima bw’abasivili benshi b’inzirakarengane.

Mu Ukuboza 2017 Polisi ya Uganda ku bufasha bw’iya Tanzania, batangiriye ndetse bata muri yombi itsinda ry’impunzi 40 z’Abanyarwanda zari zerekeje mu myitozo y’Umutwe urwanya ubutegetsi bw’u Rwanda, RNC, mu Burasirazuba bwa RDC.

Izi mpunzi zafatiwe ku mupaka Uganda ihuriyeho na Tanzania zitwaje impapuro z’inzira za CMI.

Zajyanywe mu rukiko ariko zihita zirekurwa zijya gukomeza umugambi wazo. Abapolisi bazitaye muri yombi bahawe ibihano bikakaye birimo gufungwa mu gihe bamwe banaburiwe irengero.

Raporo y’Impuguke z’Akanama k’Umuryango w’Abibumbye gashinzwe Umutekano, yatangajwe ku wa 31 Ukuboza 2018, yagaragaje ko Uganda iri mu ruhererekane rw’ahashakirwa abarwanyi b’ihuriro P5 riyobowe na Kayumba Nyamwasa, ugamije guhungabanya umutekano w’u Rwanda.

Amakuru aheruka ni ayavuye ku Muvugizi wa FLN, Nsabimana Callixte wiyita Sankara, wemeye ibyaha 16 ashinjwa, wavuze uburyo yahuye n’abayobozi bakuru muri CMI n’uburyo bafashije mu bitero umutwe we w’iterabwoga wagabye mu Rwanda.

Mu mezi ashize kandi Perezida Museveni yemeye ko yahuye n’abadipolomate bakuru muri RNC barimo Charlotte Mukankusi na Eugene Richard Gasana mu buryo yise ubw’impanuka.

Ni gute umukuru w’igihugu ahurira n’abantu be mu biro bye by’impanuka ndetse bigakomeza kuba amayobera.

Ibi byose bigaragaza uko Museveni ashishikaye mu bukangurambaga, guhugura, gutanga ubushobozi bw’amafaranga n’ubw’ingabo n’ubundi bufasha ku mitwe yitwaje intwaro irwanira gukuraho Guverinoma y’u Rwanda.

Mu buryo butunguranye, baba ari abakoze Jenoside cyangwa indi mitwe y’iterabwoba yihuza nayo ngo bagerageze guhungabanya u Rwanda.

2. Ubukangurambaga mu ngabo za Museveni

-  Gusura ibigo bya gisirikare

Mu ntangiriro z’umwaka, Perezida Museveni yatangiye ingendo zo gusura ibigo bya gisirikare. Usomye ubutumwa yahatangiraga wabona ko uyu Mugaba w’Ingabo w’Ikirenga, yateguriraga abofisiye be n’abasirikare intambara.

Ibigo bya Gisirikare yasuye birimo Kakiri, Entebbe Airforce Base, Gulu, Masindi Artillery Division na Singo.

Inkuru yo ku wa 23 Werurwe 2019 yatangajwe mu kinyamakuru gikora ibijyanye n’ukwifuza kwe cya The New Vision yavugaga ko “Museveni yatangiye kugenzura imitwe y’ingabo za UPDF.’’

Yakomeje ivuga ko “Perezida ari kuzenguruka igihugu areba imikorere y’ibigo bya gisirikare, anaganira n’abofisiye n’abandi.’’

Amagambo Museveni yababwiraga yari ameze nk’inyikirizo y’indirimbo kuko yari amwe.

Yavugaga ku kurwanirira abaturage ba Uganda, gukunda igihugu, kwirinda ivangura, kugira ubumenyi bwo gukoresha intwaro zabo, gukurikiza no kwita ku mahame y’imirwanire y’Ingabo za National Resistance Army (NRA), kwibanda ku nyungu z’igihugu.

Yijeje kuzamura imibereho y’abasirikare binyuze mu guha abana babo uburezi ku buntu, aho kuba no gufashwa kwivuza.

Museveni ari kugerageza kuzamura indangagaciro za NRA zimaze igihe zaribagiranye.

Yagombaga kwitangiriraho we n’abantu be ba hafi, bagahagarika kwiranira, bakirinda ivangura ryose, bakita ku nyungu z’igihugu aho kuba iz’abantu ku giti cyabo, akongera kwita ku mibereho myiza y’abasirikare aho kuba iy’umuryango n’inshuti ze.

Akwiye gutangira guhuza amagambo n’ibikorwa nubwo bidasanzwe kuri we.

Iyo nkuru inavuga ko “Icyo gikorwa kigamije kureba imbaduko na morali y’ingabo n’uko biteguye mu gihe baba bakenewe aho rukomeye.’’

Impamvu y’ingendo za Museveni mu bigo byose bya gisirikare n’ibiganiro yagiranye n’abofisiye zirisobanuye, ntabwo zikeneye andi magambo azunganira.

Ni ugukangurira abasirikare no kubategurira gutangiza intambara ku mwanzi wabo.

Umwanzi wenyine Museveni yavuze ko afite ni u Rwanda ndetse aho abasirikare bakenerwa ni mu gihe hagabwa igitero ku Rwanda.

Ibihumbi by’abasirikare bashya mu ngabo za Uganda

Minisitiri w’Ingabo muri Uganda, Adolf Mwesige, yavuze ko UPDF izinjiza abasirikare bashya 3,000 mu mwaka w’ingengo y’imari ya 2019/2020.

Yemereye imbere ya Komisiyo ishinzwe Umutekano rusange w’igihugu mu Nteko Ishinga Amategeko ko “Minisiteri y’Ingabo ikeneye miliyari 80.4 z’amashilingi ng0 ibone imishahara y’abasirikare bashya 3000 n’abandi 10 000 bo mu nzego zishinzwe umutekano mu baturage, Local Defence Unit (LDU) baheruka kwinjizwamo vuba.’’

Iki ni ikindi kimenyetso kigaragaza ko Perezida Museveni yiteguye intambara.

Imyitozo idasanzwe yo mu misozi

Kuva mu minsi ishize, imyitozo y’Umutwe w’Ingabo zidasanzwe (Special Forces) zitoreza mu misozi yarakajijwe ku rwego ruhambaye.

Chimpreports yo ku wa 27 Gicurasi 2019, yatangaje ko “Bigizwemo uruhare n’Abafaransa b’abahanga, Uganda yakajije imyitozo y’imitwe yihariye ya gisirikare ikorerwa mu misozi. Yatangiye gukorwa mu gihe hatutumba umwuka utari mwiza mu Karere.’’

Ku bantu bazi neza imiterere y’ubutaka bw’u Rwanda [igihugu cy’imisozi 1000], iyi myitozo ntiyahishira burundu intego yayo.

Ubukangurambaga n’imyitozo ku ngabo zahoze ku rugamba

Mu ijambo rye rigaragaza uko umutekano w’igihugu uhagaze ryo muri Nzeri 2018, Museveni yasabye ko hashakwa abashinzwe umutekano b’aba-LDU, 24,000.

Yavuze ko “Bizadusaba inyongera ya miliyari 57 z’amashilingi ariko icyo si ikibazo.’’

Muri Werurwe 2019, Museveni yinjije mu rwego rwa LDU abagera ku 6,436.

Inkuru ya Chimpreports yo ku wa 15 Werurwe 2019, igaragaza ko “Museveni yinjije abashinzwe umutekano 6,000 muri LDU, anakomoza ku bahungabanya Uganda.’’

Ubukangurambaga n’imyitozo ihabwa abahoze ku rugerero igamije guha imbaraga igisirikare n’ibikorwa byacyo.

Nkuko Museveni yabivuze “Abashaka guhungabanya igihugu cyacu, ntibazi ubushobozi dufite. Buragutse, turamutse dukoze ubukangurambaga, ntiwatuva mu nzara.’’

Icya mbere, batorejwe n’ingabo mu Kigo cy’Imyitozo cya Kaweweta, bibaha ubushobozi bwa gisirikare kandi biteguye kurwana. Icya kabiri, bazagenzurwa n’itegeko rya UPDF.

Icya gatatu, ni mu birori byo gusoza amasomo, Museveni yababwiye ko “Nta muntu wazana umutekano muke muri Uganda, dufite ubushobozi bwo kwirinda ubwacu.’’

Ingingo ya kane, Museveni yababwiye ko bazaba bafite inshingano zihoraho [nk’abasirikare] kandi ko bazazishyurirwa.

Icya nyuma, ni uko byabaye agashya ko Perezida y’itabira umuhango wo gusoza amasomo ku binjijwe mu rwego rwa LDU.

Iyi ni igihamya ko Museveni akataje n’imyiteguro yo gutera umwanzi we.

Ubwikube kabiri bw’ingengo y’imari y’igisirikare

Ingengo y’imari ihabwa igisirikare yavuye kuri miliyari 347 z’amashilingi mu 2017/18 igera kuri miliyari 640 z’amashilingi mu 2018/19.

Mu ntangiriro za Mata 2019, Inteko yemereye Guverinoma gufata inguzanyo ya miliyari 380 z’amashilingi mu gihugu yo gushyigikira ibikorwa by’ingabo.

Ingengo y’imari yose ikoreshwa n’ingabo yazamutseho inshuro zirenga ebyiri iva kuri tiriyari 1.5 z’amashilingi igera kuri tiriyari3.4 z’amashilingi.

Minisitiri w’Ingabo yabwiye abadepite ko Guverinoma ikeneye ubufasha byihuse, “mu kuzamura ubushobozi bw’ingabo n’abasirikare ba Uganda’’ ndetse no ‘‘kongera ibikorwa remezo byo kubungabunga umutekano.’’

Abadepite barijujuse bavuga ko inyongera ya tiriyari 1.9 ari nyinshi, bavuga ko bitemewe ndetse binyuranye n’amategeko.

Ubu bwihutirwe bwo gukuba kabiri ingengo y’imari ndetse no kwinjiza mu gisirikare amaraso mashya byose bifitanye isano n’agacu ko gutegura imirwano.

Museveni mu ntebe yo kwigarurira icyizere

Ibitekerezo natanze hejuru byavugaga ku bukangurambaga bwa Museveni bugamije gusiga u Rwanda icyasha.

Mu rugendo rw’ubukangurambaga bwa Museveni yaguye mu gihirahiro gikomeye kuri politiki ye y’imbere mu gihugu, agwa hasi bituma ajya mu mwanya wo gusobanura ishingiro rya politiki ye.

Yahagaritse ingendo zo gusura ibigo bya gisirikare, aho yaganiraga n’abasirikare ahubwo atangira inama zizenguruka igihugu ategurira abasivili kwitambika ubusabe bwa Bobi Wine bwo gushyira iherezo kuri politiki ipfukirana umuturage.

Mu gihe Ishyaka ritavuga rumwe n’ubutegetsi bwa Uganda rya FDC rihagarariwe na Dr Kizza Besigye ryasabaga guhabwa agaciro, Museveni yamenyereye igitutu cyaryo kuko ryari rifite ubukana buke.

Izamuka ry’umuhanzi ubivanga na Politiki, Robert Kyagulanyi Sentamu, wamamaye nka Bobi Wine, uyoboye ubukangurambaga bwa ‘People Power’ bushimangira uruhare rw’umuturage mu kugena ahazaza he, bwahinduye imiterere ya politiki ya Uganda.

Yahise yamamara cyane mu gihugu ndetse akundwa bihebuje mu bakibyiruka.

Uyu muhanzi yagize uruhare mu kugeza ku ntsinzi abadepite batorewe kwinjira mu Nteko barimo Assuman Busalirwa (uhagarariye Bugiri) na Kassiani Wadri (uhagarariye agace ka Arua).

Mwibuke ko muri aya matora, Museveni n’inzego ze z’umutekano bari bayarimo kugeza ku ndunduro ndetse hari aho bashatsw kwivugana Bobi Wine ariko umushoferi we aba ariwe ubigenderamo. Mu buryo bucuramye, ni we uri kuburanishwa.

Museveni yahiye ubwoba kubera Bobi Wine

Ubwoba Museveni afitiye Kyagulanyi byongerewe n’igitutu gikomeye cyahiritse ba perezida basheshe akanguhe muri Algeria na Sudani.

Inkubiri yatangiriye mu bihugu by’Abarabu yasize ihiritse inshuti ye Gaddafi yatumye ahera mu gihirahiro ku bushobozi bw’abaturage mu gihe umuntu yananiwe kubakorera.

Impinduramatwara zabaye muri Algeria na Sudan zifite icyo zishushanya haba kuri Museveni na Kyagulanyi. Bombi bize isomo rimwe ariryo “Abantu bafite ubushobozi bwo gukuraho abanyagitugu mu gihe hakozwe ubukangurambaga neza.’’

Ibi bikorwa nibyo byatumye Museveni ahagarika ubukangurambaga bwe mu bigo bya gisirikare atangira ubwo kwiyegereza abaturage, agamije guca intege ibikorwa bya Kyagulanyi.

Agomba kurinda abaturage mu gihe cyose bakusanyijwe na Bobi Wine. Museveni yiteguye ndetse afite ubushake bwo kwitambika ibikorwa byose bihuza Bobi Wine n’abaturage benshi.

Impano z’amafaranga Museveni atanga zageze kuri miliyari 200 z’Amashilingi

Uyu ni umutwe w’inkuru yasohotse muri Observer ku wa 15 Gicurasi 2019. Igaragaza uburyo Museveni ashaka kwangisha Bobi Wine Abanya-Uganda abaha ruswa.

Abaturage bigaragambya bamagana ubuyobozi kubera serivisi mbi bubaha.

Abatavuga rumwe na leta rero bari kungukira muri icyo cyuho. Nkuko Umunyamategeko Patrick Lock Otieno Lumumba yabivuze “Wizeza abantu ijuru, ukabajyana mu kuzimu.’’

Nicyo Abanya-Uganda benshi barambiwe. Aya mafaranga yatanzwe yashoboraga kwifashishwa mu gutanga serivisi ndetse abatavuga rumwe n’ubutegetsi ntibari kubona aho bamenera.

Kwitambika ibitaramo n’ibikorwa bya Bobi Wine

Indi ntwaro Museveni akoresha ni ugukumira Bobi Wine guhura n’abantu benshi bahuje icyerekezo.

Bobi Wine yatawe muri yombi, aratotezwa ndetse ashinjwa gutunga intwaro n’ibindi birego by’ibikorano.

Museveni yashoye ubushobozi mu bakozi ndetse atera inkunga umugambi we wo kuburizamo ko Bobi Wine yatambutsa ibitekerezo bimuharabika.

Abanyeshuri ba Kaminuza ya Makerere bacungishijwe ijisho

Nyuma y’inkubiri yasembuwe n’abanyeshuri ba kaminuza muri Algeria, Museveni yohereje abashinzwe umutekano batabarika muri Kaminuza ya Makerere, kuri ubu igenzuwe bidasanzwe.

Umwe mu barimu yavuze ko “Umugambi uhari ni uko ingabo zitera ubwoba buri wese mu kubungabunga umutekano.’’

Umuyobozi w’abanyeshuri yarivovose avuga ko “Iki si ikigo cya gisirikare, tugiye kuregera Inteko itegeke ko bahava kuko bashyize mu kaga ubuzima bwacu mu kigo.’’

Mu kwanzura, uhereye ku byavuzwe hejuru byose, Museveni yaguye mu mutego utuma ajya mu gihirahiro cyo kugaba igitero ku Rwanda yita umwanzi no gukomeza ubukangurambaga bwo kurinda abaturage gucengezwamo amatwara ya Bobi Wine.

Inama yanjye kuri Perezida Museveni

Umunyamateka w’Umufaransa, Alexis De Tocqueville, ni we nanone wavuze ko “Iyo ahashize hadashobora kumurikira ahazaza, roho igenda mu kizima.’’

Ukumenyekana kwawe mu Banya-Uganda gukomeje kugwa hasi nkuko byagaragajwe mu ikusanyabitekerezo ryakozwe na Research World International (RWI). Mu baturage 10, batandatu muri bo bavuga ko igihugu kiri korekwa, ihohoterwa n’ifungwa ry’abanyapolitiki batavuga rumwe n’ubutegetsi, guhuza imbaraga n’abakoze Jenoside n’imitwe y’iterabwoba, guhindura kaminuza nk’inkambi ya gisirikare, gufunga abasivili b’inzirakarengane; nta gushidikanya guhari kuko ahahise hawe ntihamurikira ahazaza.

Niyo mpamvu urubyiruko rungana na 65% ruvuga ko uri kuganisha Uganda mu manga.

Uribuka ko umuraperi muto w’imyaka irindwi Fresh Kid ubwo yasabwaga kuvuga ijambo kuri Museveni, igisubizo cye cyabaye “Utuyoboye nabi.’’

Ugomba rero guha ubutegetsi abakibyiruka, nibitagenda gutyo ibitekerezo byawe bizakomeza gukorera mu mwijima. Wibuke ko nta gahora gahanze.

Intego nyamukuru y’ibiganiro byiswe African Peer Review Mechanism (APRM) bifasha abayobozi kwigira kuri bagenzi babo imikorere myiza. Ukeneye kugera ikirenge mu cya Perezida Kagame ufite icyerekezo kizima.

Ahubwo rero aho gushaka kugaba igitero ku Rwanda, tangiza urugendo shuri ku buryo ushobora kuganisha igihugu cyawe mu cyerekezo kizima.

Aha uzongera uhabwe ubufasha bw’urubyiruko rufite ibitekerezo biri mu mwijima bizafasha Bobi Wine ngo bagukureho.

Ushobora gukomeza kwita ku nama za Tinyefuza; uzibuke ko udashobora gutsinda urugamba winjiyemo nta mpamvu. Iryo hame wakundaga kuribwira abasirikare ba NRA, mu gihe cy’Intambara yo kwibohora.

Wibuke ko ubuyobozi buhindura icyerekezo ni ubutanga serivisi nzima atari ubwamunzwe na ruswa.

Umubare wa manda n’imyaka yawe ntibyari kuba imbogamizi mu gihe ufite gahunda yo kujyana Abanya-Uganda by’umwihariko urubyiruko mu cyerekezo cyiza.

Inama zanjye kuri Perezida Kagame

Perezida Museveni yasubitse ubushotoranyi ku Rwanda ariko ntiyabuhagaritse.

Ibuka uburyo bwa politiki bukoreshwa n’ubutegetsi buri mu kaga, ‘Kwitakana abaturanyi nk’isoko y’ibibazo byakuzengereje nk’uburyo bwa nyuma bwo kwirwanaho.’’

Uri kubibona ku Burundi, umuturanyi wawe wo mu Majyepfo.

Nubwo Museveni ari kwibanda cyane mu bukangurambaga bwo gucubya ibihumbi by’abamuhagurukiye na politiki ye iri mu kaga, ariko igihe icyo aricyo cyose ashobora kwanduranya ku Rwanda.

Azaba afite intego yo kugera ku bintu bibiri. Icya mbere, azatuma Abanya-Uganda bahuga ku bibazo by’imiyoborere y’imbere mu gihugu bite ku ntambara zivuye hanze. Ni ukwereka abaturage ko ibibazo byose banyuramo biterwa n’u Rwanda.

Icya kabiri, intambara ijyana n’itangazwa ry’ibihe bidasanzwe. Museveni azatangaza ko inama, imihuro no kwigaragambya byose binyuranye n’amategeko. Uzagerageza kunyuranya nabyo azitwa umwanzi ndetse afatwe nk’umwanzi w’igihugu.

Ibikorwa bya Bobi Wine byo guhuza abantu bizaba byahagaritswe. Icyo gihe azashobora gukomeza umugambi we wo kwanduranya nta kimukoma mu nkokora gifatika.

Ibuka ko ubwoba bungana n’ubushake n’ubushobozi. Ubushake bwa Museveni burahanitse ndetse ahugiye mu gushaka ubushobozi. Ugomba guhora uteguye ingabo zawe, zigahora ziri maso.

Dick Mugabe, Umwanditsi w’iki gitekerezo ni impuguke mu by’umutekano mu Karere k’Ibiyaga Bigari


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza