Uko umuhango wo gutangiza icyumweru cyo #Kwibuka25 wagenze (Amafoto)

Yanditswe na Philbert Girinema
Kuya 7 Mata 2019 saa 10:54
Yasuwe :
0 0

Kuri uyu wa 7 Mata 2019, Isi yose yifatanyije n’u Rwanda mu kwibuka ku nshuro ya 25 Jenoside yakorewe Abatutsi. Abayobozi batandukanye barimo abakuru b’ibihugu na za Guverinoma bitabiriye uyu muhango mu mujyo wo gukumira ko ibyaye mu Rwanda byakongera kubaho ukundi.

Mu bakuru b’ibihugu baraye bageze mu Rwanda harimo Perezida wa Congo Brazzaville, Denis Sassou-Nguesso, Perezida wa Niger, Mahamadou Issoufou, Perezida wa Djibouti, Ismaïl Omar Guelleh, Minisitiri w’Intebe wa Ethiopia, Dr Abiy Ahmed, Minisitiri w’Intebe w’u Bubiligi Charles Michel, Guverineri Mukuru wa Canada Julie Payette.

Mu gitondo cyo kuri iki Cyumweru, hakiriwe Visi Perezida wa Nigeria, Yemi Osinbajo na Perezida wa Tchad, Idriss Déby.

Mu ijambo ritangiza icyumweru cyo kwibuka, Perezida Kagame yabwiye abari bateraniye muri KCC ko muri iki gihe abanyarwanda bafatanye urunana nubwo imibiri n’imitima byuzuye ibikomere n’inkovu ‘ariko ntawe uri wenyine; twese dushyize hamwe’.

Ati “Twese hamwe, twongeye kuboha ipfundo ry’ubumwe bwacu. Abakobwa babaye ababyeyi. Abaturanyi babaye abavandimwe b’abo ubundi badafitanye isano. N’abo tutari tuziranye batubereye inshuti. N’ubundi umuco wacu uduha uburyo bwo kubaka ubumwe n’ubufatanye, bidufasha guhumuriza abababaye no kongera kwiyubaka.”

REBA UKO UYU MUHANGO WAGENZE UMUNOTA KU WUNDI

Kanda hano usome ijambo Perezida Kagame yagejeje ku bitabiriye umuhango wo gutangiza icyumweru cyo kwibuka ku nshuro ya 25 Jenoside yakorewe Abatutsi

14 :00 : Umuhango waberaga muri Kigali Convention Centre urahumuje. Igikorwa kirakomereza kuri Stade Amahoro mu ijoro ryo kwibuka ndetse n’urugendo rwo Kwibuka rugiye gutangirira ku Nteko Ishinga Amategeko.

13:45: Yaburiye abashaka gusubiza u Rwanda mu icuraburindi

Perezida Kagame ati “Ku batekereza ko igihugu cyacu kitabonye amahano ahagije bagashaka kudukururira ibibazo, baba ari abaturutse hano cyangwa hanze y’igihugu, ndashaka kuvuga ko tuzahangana nabo bikomeye. Ibyabaye hano ntibizongera kubaho ukundi. Igihugu cyacu ntigishobora kwihanganira kubaho mu mateka yisubiramo, tugomba gufata umwanzuro dushingiye kandi tuyobowe ku kwiyoroshya no kugendera ku mutimanama wacu. U Rwanda rugomba gukomeza kuba imbere bitari ibyo twaba ntacyo twaba tuvuze. Ukuri ntaho kujya, natwe ni uko.”

13: 35: Mu ijambo rye, Perezida Kagame yongeye gushimangira ko indege ya Habyarimana atariyo ntandaro ya Jenoside yatumye ababyeyi bica abana babo ahubwo ko ari umugambi w’igihe kinini wari warateguye.

Yashimye umuhate w’abagize uruhare mu gutuma u Rwanda ruba ruri aho ruri ubu ndetse n’abanze kwimakaza amacakubiri aho yatanze urugero rw’abana b’i Nyange.

Ati “Abana b’i Nyange banze gutandukanywaAbahutu ngo bajye ku ruhande rumwe Abatutsi ku rundi, biragaragara, ntabwo bigeze bagambanirana. Batandatu barishwe, 40 barakomereka, bose ni intwari. Abo ni abanyarwanda batumye tutabura byose.”

Yakomeje avuga ubu “turi abanyarwanda beza kurusha uko twari tumeze, ariko dushobora kuba beza kurushaho […]umubabaro twagize urahagije kugira ngo umuhate wacu utazimangatana.”

13 :25: Perezida Kagame atangiye kugeza ijambo rye ku bitabiriye uyu muhango wo kwibuka ku nshuro ya 25 Jenoside yakorewe Abatutsi.

13:17: Batuye imitima tugutuye, ni yo ndirimbo yahimbiwe ibikorwa byo kwibuka ku nshuro ya 25 Jenoside yakorewe Abatutsi. Iri kuririmbwa n’abahanzi batandukanye barimo Intore Masamba, Aline Gahongayire, Butera Knowless, King James n’abandi.

12 :15: Perezida wa Djibouti, Ismaïl Omar Guelleh, mu ijambo rye yagize ati “Mu myaka 25 igihugu cyagarageje umuhate n’ubufatanye by’abaturage bose ku bw’ubuyobzi bwa Perezda Kagame […] U Rwanda rutanga urugero mu kuba mu ba mbere mu miyoborere myiza, mu ikoranabuhanga muri Afurika n’igihugu gitanga icyizere nyuma ya Jenoside yangije byinshi cyane.

Twaje kwerekana ko twifatanyije n’abanyarwanda. Muri Afurika turahamagarirwa gukomeza guteza imbere amahoro no gukomeza gutsura umutekano mu bihugu biri mu bibazo no gukomeza umurimo ukomeye watangijwe n’Umuryango wa Afurika yunze Ubumwe.

Ibihugu byinshi bya Afurika biri mu murongo w’iterambere n’impinduka zigamije umutekano usesuye ku baturage bacu. Nicyo gikwiriye kugira ngo twirinde ko amahano u Rwanda rwagize yagira ahandi aba ku mugabane wacu.”

13:05: Minisitiri w’Intebe wa Ethiopia, Abiy Ahmed, yashimye abanyarwanda ku butwari bagize bwo gushyira imbere intego y’uko Jenoside itazongera kubaho ukundi kandi bakimakaza umuco wo kubabarira.

Minisitiri w’Intebe wa Ethiopia yari afite imyaka 18 ubwo Jenoside yabaga ndetse nyuma yayo gato yaje mu Rwanda mu bikorwa bya Loni byo kugarura amahoro.

Mu ijambo rye yagize ati “Mu bihe nk’ibi turahamagarirwa kwibuka ku bwenge bwacu n’ubushake bwacu bwo kwishakamo amahoro n’ubwumvikane.

Ntabwo hakenewe andi mahano ngo tubone gukanguka dukore gukomeza imirunga iduhuza nk’ikiremwamuntu.

Mu 1995 nibwo naje mu Rwanda nk’umusirikare muto wa Ethiopie uje mu butumwa bwa Loni. Igihe nahamaze bimpa ububasha bwo gutanga ubuhamya ku isenyuka ryasizwe n’ibyabaye kuri ubu butaka.

Iyaba twihaga agaciro tukanasesengura amagambo tuvuga byakadusubije inyuma tukivanako ubuhumyi tukabona ikiduhuza n’abandi.

Nkeka ko ari nabyo byatumye u Rwanda ruba icyitegererzo mu bumwe n’ubwiyunge. Ubuyobozi bwiza bwa Perezida Paul Kagame n’umuhate by’abanyarwanda byafashije mu gukosora amakosa y’ahahise igihugu cyanyu kikagera ku rundi rwego.

Kwemera ahahise habi ariko ugahitamo kujya imbere mu mucyo ni igikorwa cy’ubutwari no kwihangana.”

12 :55 : Minisitiri w’Intebe w’u Bubiligi, Charles Michel, amaze kugeza ijambo ku bitabiriye uyu muhango

12:45: Perezida wa Komisiyo y’Umuryango w’Ubumwe bw’u Burayi, Jean-Claude Juncker, amaze kugeza ijambo ku bitabiriye uyu muhango aho avuze ko u Rwanda ari urugero rw’Umuryango mugari wakomeretse ariko wongeye gutera imbere, ashima umuhate w’abanyarwanda mu kugera kuri iyo ntambwe.

Jean Claude Junker yagize ati "Kwibuka ni inshingano z’abariho n’abazaza. Kwibuka nibyo byonyine bizatuzanira ejo heza kuri twese. U Burayi nabwo bwabayemo ubwicanyi bubi bw’inyokomuntu nko muri Afurika n’ahandi hose. Nta gishobora guhanagura ayo amteka ni inshingano rero kwibuka ari nabyo byatuzanye hano uyu munsi. "

"Nta gishobora gupfuka ibikomere by’ahahise, nta gishobora kugabanya uburibwe butazibagirana nyamara ni ikigaragaza ko muri uwo mwijima ariho tubonera imbaraga zigana ku rumuri kandi u Rwanda ni urugero rugaragara."

"Ni ubuhamya ko igihugu cyabayemo ubugome nk’ubu gishobora kongera kubyukana imbaraga n’umurava mu bumwe bw’abaturage bacyo. Ubushobzi bwo kongera kwiyubaka kw’igihugu cyanyu n’abaturage bacyo byankoze ku mutima kandi niteze ko bizakomeza."

12:40: Umuyobozi wa Komisiyo ya AU, Moussa Faki Mahamat, ari kugeza ijambo ku bitabiriye uyu muhango wo gutangiza icyumweru cyo kwibuka ku nshuro ya 25 Jenoside yakorewe Abatutsi

12:20: Umukino wanditswe na Dorcy Rugamba witwa Umurinzi niwo umaze kwerekanwa, ugaragaza akamaro ko kwibuka mu mibereho y’abanyarwanda.

Bimwe mu byaranze ijambo rya Dr Bizimana

“Uyu munsi turibuka imyaka 25 ishize Jenoside ibaye ariko mu by’ukuri ubwicanyi bwibasiye abatutsi bwatangiye mu 1959 bivuze ko uyu mwaka mu 2019 twibuka Jenoside yakozwe guhera imyaka 60 ishize.

Ubutegetsi bwagiye busimburana kuva igihugu kibonye ubwigenge mu 1962 bwagiye bushyiraho politiki yibasira abatutsi igaragza ko bakwiye kurimburwa.

Mu 1962, Abatutsi basaga 2000 barishwe muri Perefegitura ya Byumba. Nta muntu wigeze abivugaho uretse Musenyeri Joseph Sibomana wabyamaganye.

Mu 1963 Abatutsi bongeye kwicwa muri Perefegitura nyinshi byitwa ko ari ukubera impunzi ziturutse i Burundi zateye igihugu. Abasaga ibihumbi 30 barapfuye barimo ibihumbi 20 muri Perefegitura ya Gikongoro.”

- Umunyamabanga wa Leta muri Minisiteri y’Ububanyi n’Amahanga ushinzwe Umuryango wa Afurika y’Uburasirazuba, Olivier Nduhungirehe, n’Umuyobozi wa Imbuto Foundation, Sandrine Umutoni, ni bo basangiza b’amagambo muri uyu muhango

12:00: Nyuma y’ijambo rya Minisitiri w’Ububanyi n’Amahanga, Dr Sezibera Richard, riha ikaze abitabiriye uyu muhango; Umunyamabanga Nshingwabikorwa wa Komisiyo y’Igihugu yo kurwanya Jenoside, Dr Jean-Damascène Bizimana, ni we uhawe ikaze.

Atangiye agira ati “Jenoside yakorewe Abatutsi mu 1994 twibuka ku nshuro ya 25, yaje ari umusozo ariko ntabwo yari intangiriro yo kwica abatutsi mu Rwanda.”

“Jenoside yakorewe Abatutsi mu 1994, yabaye hari ibimenyetso bihagije byerekana ko leta yari ifite umugambi wo kuyikora.”

“Kuva Jenoside ihagaritswe u Rwanda rwateye intambwe mu kwiyubaka, amahanga nayo atera intambwe mu kwemera ukuri.”

11 :40 : Perezida Kagame na Madamu Jeannette Kagame bamaze kugera mu cyumba cya Kigali Convention Centre ahagiye gukomereza imihango ijyanye no gutangiza icyumweru cyo kwibuka ku nshuro ya 25 Jenoside yakorewe Abatutsi.

- Amafoto ya Perezida Kagame na Madame hamwe n’abandi bakuru b’ibihugu ubwo bunamiraga inzirakarengane za Jenoside yakorewe Abatutsi ku Rwibutso rwa Kigali ndetse bakanacana urumuri rw’icyizere

- Ku cyicaro cy’Umuryango w’Ubumwe bwa Afurika, i Addis Ababa muri Ethiopie, Abanyarwanda n’inshuti z’u Rwanda bahuriye hamwe mu bikorwa byo kwibuka, bacana urumuri rw’icyizere ndetse bafata n’umunota umwe wo kuzirikare inzirakarengane za Jenoside

- Minisitiri w’Intebe w’u Bwongereza, Theresa May, nawe yifatanyije n’u Rwanda mu bihe byo Kwibuka ku nshuro ya 25 Jenoside yakorewe Abatutsi. Mu butumwa yanyujije kuri Twitter ye yanditse ko ibyabaye ari amahano ndetse ko hagomba gukorwa ibishoboka byose ku buryo bitazasubira.

11:00: Ibihumbi by’abantu b’ingeri zitandukanye bateraniye muri Kigali Convention Centre ahagiye gukomereza ibiganiro ku kwibuka ku nshuro ya 25 Jenoside yakorewe Abatutsi.

- Loni yasabye ko imvugo z’urwango ziganisha kuri Jenoside zirwanywa

Umunyamabanga Mukuru w’Umuryango w’Abibumbye, Antonio Guterres, mu butumwa yageneye abatuye Isi kuri uyu munsi u Rwanda rwibukaho Jenoside yagize ati “Imvugo z’urwango n’izihamagarira ubugizi bwa nabi zigomba kugaragazwa, zikarwanywa kugira ngo twirinde ko zatugeze aho zatugejeje mu gihe cyashize, ku byaha by’urwango na Jenoside.”

“Ndahamagarira abanyapolitiki, abayobozi b’amadini n’imiryango itegamiye kuri Leta gutandukana n’imvugo z’urwango n’amacakubiri kandi baharanire kurandura icyari cyo cyose kinyuranye n’imigirire myiza.”

“Ubushobozi bw’ikibi bugaragara hose mu miryango tubamo ariko ni nako indangaciro zo kumva, ubugwaneza, ubutabera n’ubwiyunge ziturimo. Reka dufatanye kubaka ejo heza huzuye amahoro kuri twese. Nibwo buryo bwiza bwo guha icyubahiro abatakaje ubuzima bwabo mu Rwanda, imyaka 25 ishize.”

10:50: Perezida Kagame ari kumwe na Madamu Jeannette Kagame hamwe n’abandi bakuru b’ibihugu bifatanyije n’u Rwanda, bunamiye inzirakarengane za Jenoside zishyinguye ku Gisozi ndetse banacana urumuri rw’icyizere.

9:00: Umunyamabanga Mukuru w’Umuryango Mukuru w’Ibihugu bikoresha Ururimi rw’Igifaransa, Louise Mushikiwabo, hamwe n’uwahoze ari Perezida wa Nigeria, Olusegun Obasanjo, bunamiye inzirakarengane za Jenoside zishyinguye mu rwibutso rwa Kigali ku Gisozi.

Uwahoze ari Perezida wa Nigeria, Olusegun Obasanjo, yunamira inzirakarengane za Jenoside zishyinguye ku Gisozi
Depite Hervé Berville (wa kabiri uturutse ibumoso) ukomoka mu Rwanda umwe mu bagize delegasiyo y'u Bufaransa yitabiriye ibikorwa byo kwibuka, ubwo yashyiraga indabo ku rwibutso

Perezida wa Tchad ubwo yakirwaga i Kigali

Perezida wa Tchad, Idriss Déby, ubwo yakirwaga i Kigali yitabiriye umuhango wo #Kwibuka25

Visi Perezida wa Nigeria, Yemi Osinbajo yakiriwe na Minisitiri w’Ububanyi n’Amahanga, Dr Sezibera Richard

Amafoto: Niyonzima Moise & Rwanda Gov


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza