Kwamamaza

Uko umuyobozi muri FDLR yabwiye Gen.Kabarebe ko azagaruka mu Rwanda nta Mututsi ukirubamo

Yanditswe kuya 27-10-2016 saa 07:39' na IGIHE


Nyuma y’imyaka 22 Jenoside yakorewe abatutsi ihagaritswe, haracyanugwanugwa benshi mu bayigizemo uruhare n’abandi bagifite inyota yo gusohoza umugambi wabo, nubwo ibimenyetso bigaragara ko icyo cyiciro u Rwanda ruri kukirenga.

Umutwe wa FDLR ukorera mu mashyamba yo mu Burasirazuba bwa Congo, ufatwa nk’ugizwe n’abakoze Jenoside bakibumbatiye ingengabitekerezo yayo, ndetse abayobozi bayo barihisha bikomeye kuko bashakishwa, bashyiriweho ibihano n’umuryango w’abibumbye na Leta Zunze Ubumwe za Amerika ndetse FDLR ubwayo ishyirwa mu mitwe y’iterabwoba.

Mu kiganiro yahaye urubyiruko rugera kuri 200 rubarizwa mu muryango w’abanyeshuri barokotse Jenoside yakorewe Abatutsi mu 1994, ku Cyumweru gishize, Minisitiri w’Ingabo, Gen James Kabarebe, yababwiye ko nyuma y’uko barokotse, hari umusanzu igihugu kibatekerejeho, ntibirebe ubuke nk’uko ingabo zahagaritse Jenoside zari ibihumbi 19, zigatsinda iza FAR ibihumbi 120 hiyongereyeho n’interahamwe.

Ati ‘‘Uru rugamba rwo guhagarika Jenoside ni urugamba rukomeza cyane. Uhumbyaho gato, gato cyane, nk’ubu duhumbijeho gatoya, ababiba amacakubiri bazamuka uwo mwanya.’’

Gen Kabarebe yavuze uko hari ubwo Ingabo z’u Rwanda nawe ubwe bavuganaga n’abarwanyi bari mu mashyamba bafite imigambi mibi ku Rwanda, babumvisha gutaha, ari nabwo buryo ba Gen Rwarakabije na Jerome batashyemo, nubwo hari abanangiye.

Ati “Impamvu twavuganaga nabo ntabwo ari iyindi. Oya. Ni uko dufite inshingano mu kubaka iki gihugu. Bo bari bafite intego mu kugisenya, ariko twebwe dufite inshingano mu ku cyubaka. Ufite inshingano rero niwe uvunika. Ucisha make, ugwa neza, uringinga, urababarira, urashishoza, ushyira buri kintu cyose ku munzani,’’

Yavuze ko nubwo hari abatahutse, hari uwitwa Ntawunguka Pacifique wasigaye mu mashyamba ya Congo ayobora FDLR n’ubu udakozwa ibyo gutaha.

Umuryango w’Abibumbye ugaragaza ko Ntawunguka afite ipeti rya Colonel, n’amazina menshi arimo Colonel Omega, Nzeri, Israel na Pacifique Ntawunguka; wavukiye ku Gisenyi kuwa 1 Mutarama 1964, agashyirwa ku rutonde n’abarebwa n’ibihano mu 2009.

Ari ku rutonde rumwe na Mbarushimana Callixte; Nzeyimana Stanislas Alias Deogratias Bigaruka Izabayo, Bigaruka, Bigurura, Izabayo Deo, hamwe na Mujyambere Leopold uheruka gufatirwa muri Congo, we uzwi nka Musenyeri; Achille cyangwa Frere Petrus Ibrahim.

Gen. Kabarebe ati ‘‘Njye ubwanjye naramwihamagariye nti ‘Pacifique ko wize, uri umupilote wigiye mu Bufaransa, ntabwo uri injiji, ayo mashyamba ya Congo urimo imyaka makumyabiri n’ingahe, ntugeraho ugashishoza ibyo urimo, n’intambara yarananiranye ntabwo uzayitsinda, ntugeraho ukibwira? Icyo tugusaba kandi turabizi nta nubwo wakoze Jenoside kuko iba wari mu Bufaransa waragiye mu mahugurwa y’indege. Urarwanira iki ko udatinya urubanza?”

“Aranyumvaaa, ati ‘Jenerali, reka nkubwire ikintu kimwe. Njyewe kugaruka mu Rwanda, nzagaruka mu Rwanda nta mututsi n’uyu n’umwe uri muri icyo gihugu. Ati ‘niba hari ikindi washakaga kongeraho kumbwira, ikiganiro tukirekere ahangaha. Mva kuri Ntawunguka, kuva icyo gihe sinongeye kuvugana nawe.’’

Gen. Kabarebe avuga ko yamubwiye ko Se yamwise nabi (Ntawunguka), kuko amaze imyaka myinshi mu ntamabara aba mu mashyamba, ariko akaba adateze kuyitsinda cyangwa ngo agire indi yunguka.

Ati “Imyaka 20 umaze mu mashyamba ya Congo, utagira aho uba, unyagirwa buri munsi, Maï-Maï zikwirukansa, FARDC ikwirukansa, natwe tukaza tukakwirukansa, ugahera muri ibyo uri umupilote warize amashuri, imyaka 20 muri ibyo bishyamba, ntacyo wungutse nk’izina ryawe, nta nicyo uzunguka, uzagwa muri ayo mashyamba, ahubwo ibyago ufite nta n’umututsi uzongera kubona, nuwo kwica ntawe uzabona kuko ntuzava muri iryo shyamba.’’

Kabarebe yibukije uru rubyiruko ko nyuma yo kurokoka Jenoside bagatangira urugendo rwo kwiteza imbere hari akandi kazi gakomeza, kuko bafite inshingano yo kubaka no kurinda igihugu kugira ngo hatagira abandi bagihungabanya.

Ati “Mugomba no kumenya ko abashaka gukora Jenoside baruzuye, murabyumva, abafaransa buri gihe amadosiye baba bayaghagurukije.’’

Perezida Paul Kagame aheruka kuvuga ko abashaka gutera u Rwanda batazamenya “icyabakubise”, ashimangira ko u Rwanda rufite inshingano yo guharanira ko Jenoside itazongera kuba mu gihugu, mu bindi bihugu ho rukaba rwafatanya n’amahanga mu kuyikumira.

Mu kiganiro yagiranye n’abanyamakuru muri Mata 2016, yabihuje n’uko yumva mu bihugu by’abaturanyi hari abashaka “gufasha Interahamwe” n’indi mitwe gutera u Rwanda.

Yagize ati “Uwampa ngo babigire vuba nkwereke. Rwose ndaribwaribwa mpora ntegereje, ariko bamwe bashaka no kubikora ubundi barabizi, bazi ko bitazabahira. Ngira ngo ni nacyo kibatinza.”

Gen Kabarebe yibukije uru rubyiruko ko nyuma yo kurokoka Jenoside bagatangira urugendo rwo kwiteza imbere hari akandi kazi gakomeza

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved