Umugore n’abana barakekwaho ubutekamutwe mu kwigira impunzi z’Abanyarwanda zihungutse

Yanditswe na Evariste Nsengimana
Kuya 11 Kanama 2017 saa 11:59
Yasuwe :
0 0

Mu nkambi y’agategenyo ya Nyarushishi, yakira impunzi z’Abanyarwanda zivuye muri Repubulika iheranira Demokarasi ya Congo, iherereye mu Karere ka Rusizi, haravugwa umugore n’abana be batatu bamaze icyumweru baryama hanze yayo, nyuma yo kwangirwa kwinjiramo bakekwaho ubutekamutwe bwo kwigira impunzi atarizo.

Uyu mugore witwa Umwali Odette uri mu kigero cy’imyaka 27, yabwiye TV1 ko yaturutse muri Congo ndetse ko azi abo mu muryango we babaga mu Karere ka Bugesera yifuza gusubizwayo.

Yavuze ko yangiwe kwinjira mu nkambi ya Nyarushishi, abwirwa ko nta byangombwa by’uwakirwa n’inkambi yujuje.

Yagize ati “Munsanze ndyamye aha, navuye Congo ndi gutaha ngeze i Bukavu bambaza imyirondoro y’aho mvuye n’aho ndi kujya, banyandikira ifishi, bambaza amagambo menshi amwe mu giswahili arananira. Igihe cyo gufotora abo bacyura mu Rwanda, barabafotora njyewe ndasigara, imodoka iza kubatwara ndasigar. Ku munsi wa Kabiri igarutse gutwara ibyo basize, intwarana n’abandi baza kuduta kuri Rusizi ngo nta wemerewe kwinjira mu kigo atazanywe na HCR, turi abana bato, ntituzi aho turi kujya, twari tuzi ngo HCR niyo izahatugeza none badutaye hanze turabwirirwa tukaburara nta n’amazi yo kunywa.”

Abaturage bahatuririye bavuga ko abantu bahezwa hanze y’inkambi bababaho umutwaro, kuko bajya gusabirizayo.

Umwe yagize ati “Birababaje uretse n’umubyeyi n’undi wese ubonye umuntu uri hanze ntibyabura kumubabaza. Nabasabira ko bajya babafasha bakabakurikirana, babona babajugunye hanze gutyo bakabafasha kugera mu nkambi no kuzataha.”

Umuyobozi w’inkambi ya Nyarushishi, Ildephonse Haguma, yavuze ko impamvu ituma bamwe birukanwa mu nkambi ari uko hari Abanyarwanda bajya muri Congo guteka imitwe biyita impunzi kandi atarizo kandi ko utahuwe yirukanwa.

Yagize ati “Umwaka ushize hari gahunda yo gufasha Abanyarwanda batahutse bakagenerwa amafaranga abafasha mu buzima bagiyemo kuko abasanzwe mu gihugu baba barabasize bikagaragara ko bari hasi […]. Ayo mafaranga yatumye abantu bigira impunzi.”

Akomeza asaba ko inzego z’ibanze zikwiye kubafasha(abo bigira impunzi) mu buzima busanzwe ndetse no gusubizwa mu bice baba baturutsemo bigira impunzi kuko inkambi nta bundi buryo igira bwo kubitaho.

Buri munyarwanda utahutse yari yarahunze, agenerwa amdolari angana na 250, hafi ibihumbi 200 y’u Rwanda mu gihe umwana agenerwa amadorari 150, mu rwego rwo kubaremera no kubafasha kwiteza imbere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza