Umunsi mpuzamahanga wo kwita ku mpunzi usanze u Rwanda rucumbikiye izirenga ibihumbi 160

Yanditswe na IGIHE
Kuya 18 Kamena 2017 saa 08:54
Yasuwe :
0 0

U Rwanda ruzifatanya n’ibindi bihugu by’Isi mu kwizihiza Umunsi Mpuzamahanga w’Impunzi wizihizwa buri mwaka tariki 20 Kamena 2017. Uyu munsi mu Rwanda uzizihirizwa mu Nkambi y’impunzi z’Abanye-Congo ya Kiziba, iherereye mu Karere ka Karongi, ahazanatahwa ku mugaragaro ibyumba by’amashuri 60 n’ibibuga by’imikino.

U Rwanda rugiye kwizihiza uyu munsi mpuzamahanga mu gihe rucumbikiye impunzi zirenga ibihumbi 160 zirimo izaturutse muri Repubulika Iharanira Demukarasi ya Congo n’izo mu Burundi.

Minisitiri w’Imicungire y’Ibiza no Gucyura Impunzi, Seraphine Mukantabana, yabwiye The New Times, ko u Rwanda rufite amasomo menshi yo guha impunzi rucumbikiye, atari ayo kubacumbikira gusa ahubwo ayo kubafasha guhindura imibereho yabo.

Yavuze ko u Rwanda rwiyemeje gufungurira amarembo impunzi ziza zirugana kuva rwashyira umukono ku masezerano mpuzamahanga agenga impunzi agena uburyo bwo kwakira neza no gufasha ukeneye ubuhunzi.

Ati “Mu buryo bwacu bw’imiyoborere ntabwo tuziyemeza ibyo tutashobora gukora. Twiyemeje ubwacu kugendera ku mabwiriza mpuzamahanga yo kwakira no kurinda impunzi zihunga ibindi bihugu kandi tugomba kugenzura neza ko ibyo tubishyira mu bikorwa.”

Yashimangiye ko hafi ya buri wese muri iki gihugu azi neza ubuzima bw’ubuhunzi bitewe n’amateka u Rwanda rwanyuzemo, bityo ko rudashobora kwirengagiza abakeneye ubuhunzi kandi rugaharanira ko babonye buri kimwe cyose bakeneye kibafasha kubaho neza.

Mukantabana yavuze ko ku munsi w’impunzi, hazaba hasubizwa amaso inyuma mu byakozwe mu myaka 20 ishize mu bijyanye no kwakira impunzi haganirwa ku bibazo birebana nazo no kureba ibisubizo birambye harimo kubaha uburezi, uburyo bwo kwivuza, ibiribwa n’ibindi binyuranye.

Umunsi mpuzamahanga w’Impunzi washyizweho n’Inteko Rusange y’Umuryango w’Abibumbye yabaye mu Ukuboza mu 2000.

Minisitiri w'Imicungire y'Ibiza no Gucyura Impunzi, Seraphine Mukantabana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza