Uko umunyamakuru wo muri Sénégal witabiriye inama ya AU yabonye Kigali

Yanditswe na Kanamugire Emmanuel
Kuya 26 Nyakanga 2016 saa 01:06
Yasuwe :
0 0

Inama y’Umuryango wa Afurika Yunze Ubumwe ku nshuro yayo ya 27 yateraniye i Kigali kuva ku itariki ya 10 kugeza ku ya 18 Nyakanga 2016.

Iyi nama yitabiriwe n’abakuru b’ibihugu na za Guverinoma bagera kuri 35 n’abadipolomate banyuranye, yari yitezweho kwiga ku ngingo nyinshi zirimo amatora y’Umuyobozi wa Komisiyo y’uwo muryango n’izindi zigamije guteza imbere Afurika mu cyerekezo 2063 yihaye.

Abanyamakuru nab o ntibari batanzwe baba abo mu gihugu, akarere n’abo ku rwego mpuzamahanga.

Ousmane Ibrahima DIA,Umunyamakuru ukorera ibiro ntaramakuru bya Sénégal [Agence de presse sénégalaise- APS], akubutse mu Rwanda yanditse inkuru itari mbarirano y’uburyo yabonye Kigali, umujyi udasanzwe urangwa n’ibyiza bitandukanye.

Abinyujije mu kinyamakuru Sen360.fr cyandikirwa muri Sénégal, Ousmane yagaragaje ko adashidikanyaho ko imiterere ya Kigali ishobora gutuma iba umurwa mukuru wa Afurika.

Ubusanzwe isura y’igihugu igaragazwa n’uko umurwa mukuru wacyo umeze, ubwiza bwacyo, uko cyakira abantu, ndetse n’ikigero cy’ubukungu bwacyo.

Abona Kigali nk’umujyi udasanzwe

Ousmane ahamya ko hari byinshi bitigeze byandikwa cyangwa ngo bivugwe kuri Kigali, yemeza ko ari umujyi udateye nk’iyindi ahereye kuri byinshi biyiranga byanakomojweho n’abitabiriye inama ya AU.

Mu magambo ye bwite ati “Kigali irihariye ku bijyanye n’umuco wo kubungabunga urusobe rw’ibinyabuzima n’ibidukikije mu buryo budasanzwe, aho amasashe abujijwe, ku buryo byatumye ihabwa igihembo cy’ikirenga muri 2008 n’ishami rya Loni rishinzwe imiturire[UN Habitat], cyatumye yitwa umujyi mwiza muri Afurika.”

Kigali kandi ngo irangwa n’umutekano usesuye, aho ibintu byose biri ku murongo, imihanda iteye neza irimo kaburimbo, ubuzima bwa muntu bwitabwaho bidasanzwe ku buryo abamotari badashobora kugenda batambaye ingofero zibarinda mu gihe cy’impanuka, kandi n’abagenzi bubahiriza amatara yo ku mihanda.

Uwo mujyi kandi urangwa n’ikoranabuhanga, ku buryo ibice byose birimo internet yageze no mu modoka zitwara abagenzi.

Kigali yiyubatse nyuma ya Jenoside

Ousmane agaragaza ko u Rwanda rwahuye n’amateka ababaje ya Jenoside yahitanye Abatutsi basaga miliyoni mu 1994. Ayo mateka yababaje benshi barimo na Perezida wa Sénégal, Macky Sall washenguwe n’ibyo yabonye ubwo yasuraga Urwibutso rwa Jenoside rwa Kigali.

Ayo mateka ntiyaheranye icyo gihugu cy’imisozi igihumbi, ahubwo cyarayarenze gitera intambwe yatumye kigana ku iterambere rirambye riratwa na benshi.

Uretse Ousmane wavugaga Kigali nk’umunyamakuru yanakomoje ku buryo abayobozi batandukanye bitabiriye inama ya AU bacyeje u Rwanda.

Yagaragaje uburyo Umuyobozi wa AU, akaba na Perezida wa Tchad, Idriss Déby atariye iminwa ashima uburyo Kigali ari umujyi mwiza.

Déby yashimye iterambere ryagezweho n’u Rwanda bitewe n’imiyoborere myiza ya mugenzi we Paul Kagame yise umuvandimwe.

Ibipimo by’ubukungu birivugira

Guverinoma y’u Rwanda yashyizeho gahunda zitandukanye zigamije kuvana abaturage munsi y’umurongo w’ubukene.

Izo yagarutseho ni icyerekezo 2020 kigamije kuzamura ubukungu bw’igihugu bugashingira ku mitangire ya serivisi n’ibindi aho gushingira gusa ku mirimo y’ubuhinzi.

Ikindi ni imbaraga zashyizwe mu kongera ubukungu bw’igihugu ku buryo bukomeje kuzamuka ku kigero cya 8% hagati y’umwaka wa 2001 na 2015.

U Rwanda ntirwavumwe

Ousmane yemeza ko ibyagezweho bigaragaza ko ahari ubushake nta kidashoboka, ndetse ko nta gihugu cyandikiwe guhora gikennye iteka ryose, kiriho kitariho, kirangwa n’urwango ndetse n’ihohoterwa.

Abishimangiza imvugo ya Nelson Mandela wahoze ari Perezida wa Afurika y’Epfo, wavuze ko ikibazo gikomeye mu buzima atari ukugwa, ahubwo ari ukunanirwa guhaguruka igihe cyose umuntu aba yaguye.

Muri rusange u Rwanda rumaze gutera intambwe ikomeye mu koroshya ubucuruzi, aho rwagiye rukora amavugurura atandukanye ndetse raporo ya ‘Doing Business 2016’ ikaba yarashyize u Rwanda ku mwanya wa 62 ku Isi, mu bihugu 189.

Raporo ya Gallup Global Report 2015 kandi na yo yashimangiye ko iterambere ry’Abanyarwanda umutekano urifitemo uruhare, ishyira u Rwanda ku mwanya wa mbere muri Afurika nk’ahantu abantu bishimira kugenda nijoro, no ku mwanya wa 5 ku Isi.

Imibare kandi yerekana ko ubuzima mu Rwanda bumaze kuzamuka ku mubyeyi n’umwana, ku buryo impfu z’abana zavuye kuri 86 ku 1000 mu 2005, zigera kuri 32 mu 2014-2015. Impfu z’abana bari munsi y’imyaka itanu na zo zaragabanutse cyane ziva ku 152 zigera kuri 50 ku bana 1 000.

Ousmane Ibrahima DIA,Umunyamakuru ukorera ibiro ntaramakuru bya Sénégal

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza