Umurambo w’Umunyarwanda warasiwe i Nyagatare ukajyanwa muri Uganda wagaruwe mu buryo bwasize urujijo

Yanditswe na HABIMANA James
Kuya 27 Gicurasi 2019 saa 04:19
Yasuwe :
0 0

Ku gicamunsi cyo kuri uyu wa Mbere nibwo Uganda yashyikirije u Rwanda umurambo w’umuturage warwo uherutse kurasirwa mu Murenge Tabagwe mu Karere ka Nyagatare witwa Nkerenke Pierre.

Yapfuye arashwe ubwo we na bagenzi be bo muri Uganda, bambukanaga magendu mu Rwanda, bagashaka kurwanya inzego z’umutekano zari zigerageje kubakumira.

Nyuma yo kuraswa, umunyarwanda yahise apfa, umuturage wa Uganda we aza gupfa nyuma; ariko abo bari kumwe bahise babakurura babajyana muri Uganda ariyo mpamvu habayeho kugarura uyu murambo.

Uyu murambo aho kujyanwa aho igikorwa cyabereye, hakozwe ibilometero byinshi ugarurwa mu Rwanda ariko unyujijwe ku rundi ruhande, ku mupaka wa Gatuna mu Karere ka Gicumbi mu gihe akenshi ihererekanya nk’iri ribera aho igikorwa cyabereye.

Uganda yari ihagarariwe n’abayobozi benshi uhereye mu nzego z’ibanze kugeza kuri Minisiteri y’Ububanyi n’Amahanga ndetse n’inzego z’umutekano zari ziri hafi aho no mu nkengero zaho ku buryo bugaragara zitwaje imbunda ndetse n’aba Ambasaderi bahagarariye ibihugu byabo muri Uganda icyenda.

Ku ruhande rw’u Rwanda, ntabwo hari abayobozi benshi nkuko byari bimeze ku gihugu cy’igituranyi, usibye bake bari bayobowe na Meya w’Akarere ka Nyagatare, Mushabe David Claudien, aho uwo muturage yarasiwe.

Umuyobozi w’Akarere ka Nyagatare, Mushabe David Claudien, yabwiye abayobozi bari bahagarariye Uganda bayobowe na Depite Kansiime Caroline uhagarariye Rukiga, ko bashimishijwe no kuba bazanye uyu munyarwanda wapfuye ariko ko hari igikwiye gukorwa.

Yabwiye uruhande rwa Uganda ko buri gihugu gifite amategeko akigenga, kandi ko nta na kimwe gishobora kwemera ko hari abambuka umupaka mu buryo butemewe n’amategeko.

Yavuze ko abaturage baherutse kuraswa, binjiye mu Rwanda mu buryo bunyuranyije n’amategeko, bahagaritswe bashaka kurwanya abashinzwe umutekano, barasirwa ku butaka bw’u Rwanda.

Meya Mushabe yavuze ko bikimara kuba, abaturage ba Uganda bahise bakurura iyo mirambo bayijyana ku butaka bwayo ariko moto bari bafite yo irasigara.

Ikibabaje ngo ni uko abaturage ba Uganda atari ubwa mbere binjiranye mu Rwanda ibicuruzwa mu buryo bunyuranyije n’amategeko kandi bikinjira ubuyobozi bw’igihugu cyabwo bureba.

Yakomeje avuga ko bitari bikwiye ko uyu murambo uzanwa ku mupaka wa Gatuna ahubwo ko wari ukwiriye kujyanwa aho igikorwa cyabereye, ko kuba Uganda ariho iwunyujije ari nk’uburyo bwo kujijisha no guhisha ibimenyetso by’uko bariya baturage barasiwe ku ruhande rw’u Rwanda.

Depite Kansiime Caroline abajijwe na IGIHE impamvu uyu murambo wazanywe ku mupaka wa Gatuna aho kuwujyana aho igikorwa cyabereye, yavuze ko umupaka wa Kagitumba utari gukoreshwa mu gihe abawukoresha bagaragaza ko nta kibazo ufite.

Meya w’Akarere ka Nyagatare, Mushabe, kandi yabwiye abayobozi ba Uganda ko ari byiza kuba bagaruye mu Rwanda umurambo w’umuturage warwo uherutse gupfa, ariko ko byari kuba akarusho iyo banagarura abanyarwanda baherutse gushimutwa.

Yavuze ko hashize iminsi itarenze ibiri, abanyarwanda babiri b’i Nyagatare bafashwe bakajya gufungirwa muri Uganda, bityo ko byaba byiza babazanye.

Ati "Iki gikorwa tucyakiriye neza kuko n’ubundi bamutwaye bataragombaga kumutwara kuko bamujyanye ku ngufu. Kuba Uganda yamuzanye nibyo ariko hariyo n’abandi bafungiyeyo nabo bagomba kuzanwa, bagomba kwemera ko bariyo kuko n’ibinyamakuru byabo birabyemeza."

Depite Kansiime yavuze ko atazi ikibazo cy’abanyarwanda bafungiwe muri Uganda.

Ati "Ntabwo nzi abanyarwanda bafashwe bari muri Uganda, icya mbere nzi ni uko hari abanyarwanda benshi bari muri iki gihugu, ni abavandimwe bacu, ntabwo nzi abo bafunzwe.”

Kuva mu 2017, u Rwanda rwakunze kugaragariza Uganda ko hari abaturage barwo bafashwe bagafungirwa muri iki gihugu cy’igituranyi nta byaha bigaragara bashinjwa, aho bakorerwa iyicarubozo bikaze ubwo bagarurwa mu gihugu babaye intere.

Muri uyu muhango wo gushyikiriza u Rwanda uyu murambo, Uganda yari yahamagaje aba ambasaderi icyenda barimo uw’u Bwongereza, u Bufaransa, Sudani y’Epfo n’uw’u Burundi mu kugaragaza ko u Rwanda ari gashozantambara.

Umwe muri aba ba mbasaderi waganiriye na IGIHE, yavuze ko icyo yakoze ari ukumva impande zombi.

U Rwanda rwavuze ko kugeza ubu hari itsinda rigizwe n’intumwa z’ibihugu byombi, zoherejwe aho aba bantu babiri barasiwe ngo harebwe uko iki kibazo cyagenze.

Uyu murambo wazanywe i Gicumbi ku mupaka wa Gatuna mu gihe aho umuntu yaguye i Nyagatare
Uganda yari yazanye aba Ambasaderi icyenda muri uyu muhango
Depite Kansiime Caroline aganira na Meya Mushabe David Claudien (hagati) n'abandi bayobozi bari baturutse muri Uganda
Abayobozi b'u Rwanda ubwo begeraga bagenzi babo ba Uganda kugira ngo bashyikirizwe uyu murambo
Abashinzwe umutekano muri Uganda bari bahari
Imodoka yazanye umurambo ubwo yasubiraga muri Uganda
Umurambo washyizwe mu modoka ujyanwa i Nyagatare aho uzashyingurwa
Umupolisi w'u Rwanda aganira na mugenzi wa Uganda
Abashinzwe umutekano ku ruhande rwa Uganda bari benshi
Depite Kansiime Caroline aganira na Meya Mushabe David Claudien (hagati) n'abandi bayobozi bari baturutse muri Uganda
Inzego z'umutekano za Uganda zatangaje ko abanyarwanda baherutse gushimutwa bari mu Kiliziya, ari 'intasi' ndetse ko ubu bafunzwe
Ku ruhande rw'u Rwanda, buri muntu wese wari wambutse umupaka agana ku ruhande rwa Uganda, yagarukaga agapimwa Ebola
Depite Kansiime Caroline aganira n'itangazamakuru

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza