Kwamamaza

Umuryango w’Umwami Kigeli V wahurije ku cyifuzo cy’uko yatabarizwa mu Rwanda

Yanditswe kuya 21-10-2016 saa 13:20' na Rabbi Malo Umucunguzi


Umuryango w’Umwami Kigeli V wahurije ku cyifuzo ko Umugogo we watabarizwa mu Rwanda, ariko uvuga ko hari byinshi bikirebwa ndetse bikeneye kuganirwaho kugira ngo umwanzuro wemezwe.

Nyuma y’ikiganiro cyahuje umuryango wa Kigeli V kuri uyu wa Gatanu, Rutijanwa Medard, umwe mu bagize uyu muryango, yavuze ko bamaze igihe baterana, ariko bagishakisha icyakorwa mu gutabariza umwami Kigeli V uheruka gutangira mu Mujyi wa Oakton muri Virginia, muri Leta Zunze Ubumwe za Amerika.

Ati “Tumaze igihe duterana, twatanze itangazo ryashyikirijwe itangazamakuru risubiza iryatanzwe na Leta, ryasabye abo mu muryango w’Umwami wa Kigeli V Ndahindurwa ko bavuga ibikenewe byose kugira ngo leta y’u Rwanda iwufashe, ifashe n’Abanyarwanda bose gutabaza Umwami Kigeli V.’’

Rutijanwa yavuze ko mu nama yabo baje kwitabaza Pastor Ezra Mpyisi ngo abasubize byinshi mu bibazo bari bafite, kuko yabanye n’Umwami Mutara III Rudahigwa na Kigeli V Ndahindurwa bombi bavukana ku mwami Musinga, ababwira uko Rudahigwa yatabarijwe i Mwima na Mushirarungu i Nyanza, uko Kigeli V Ndahindurwa yimitswe n’uko yabayeho.

Pastor Mpyisi yavuze ko Umuryango wahurije ku cyifuzo cy’uko yatabarizwa mu Rwanda, yabanje kuvuga ati “Icyo tuganira ni uburyo bwo kuzana umugogo we mu Rwanda.’’

Ati “U Rwanda rwose n’Abanyarwanda barababaye. Icyo tuganira rero ni uburyo bwo kuzana umugogo we mu Rwanda, agatabarizwa mu Rwanda kuko yimitswe n’Abanyarwanda, ibyago biraza, abanyamahanga, abazungu n’abayoboke babo aba aribo batuma ahunga u Rwanda akiza umuryango we.”

“Muzi ibyabaye, abahitanywe n’icyo cyorezo. Ari mu Rwanda nta cyaha yakoreye u Rwanda ari no mu mahanga mu ngorane, nta cyaha yakoreye u Rwanda. Abo mu muryango we ndetse bafatanyije n’ubuyobozi bwa leta y’ubumwe, babona nta cyatuma adatabarizwa mu Rwanda.’’

“Amaze kwima, ari mu Rwanda, ari mu mahanga, nta cyaha aregwa. Kuba atatabarizwa mu Rwanda rero, aba ahemukiwe n’abasigaye kuko we ntacyo agikora. Nanjye nk’umujyanama we icyifuzo cyanjye ni uko yatabarizwa mu Rwanda. Hagize impamvu iza igatuma atahatabarizwa byambabaza cyane, ariko muri iyi Si niko bimera, ibyago iyo byaje urabyakira.’’

Hari itsinda rigiye kujya muri Amerika

Pasiteri Mpyisi yavuze ko Leta yatangaje ko yifatanyije n’abo mu muryango mu kubabazwa n’ibyabaye kandi yiteguye gufasha umuryango we numara kwemeza ko umugogo uza mu Rwanda, yiteguye kubafasha.

Yakomeje agira ati “Icyifuzo cy’umuryango ni uko yatabarizwa mu Rwanda, ariko baracyiga uko bikorwa. Inama yemeje ko abo muri uyu muryango bari mu Rwanda bahura n’abongabo bari muri Amerika, bakaganira bakareba ukuntu bahuza igitekerezo.’’

Umuryango wa Kigeli kandi ngo urasuzuma niba ubwami burangiriye aha cyangwa hari undi uzaburagwa mu muryango, ndetse nyuma y’uko byavugwaga ko Kigeli V yagombaga gutabarizwa i Rutare muri Gicumbi, umugogo we nuzanwa mu Rwanda hazumvikanwa aho atabarizwa.

Mu kumenya niba hari icyo Kigeli V yaba yarifuje ku itabarizwa rye, Pasiteri Mpyisi ati “twiteze kujya muri Amerika tukabibaririza ku bari bari kumwe na we.’’

Biteganyijwe ko mu gihe ibi biganiro byaba bigeze ku musozo, ari bwo hazatangazwa ahazatabarizwa Umwami Kigeli V n’itariki bizaberaho.

Iri niryo tangazo Umuryango w’Umwami Kigeli V ushyize ahagaragara nyuma y’itanga rye ko wifuza ko atabarizwa mu Rwanda, ndetse kobatazi uwatangaje ibyavuzwe mbere hose, bati “iryo tangazo uwaritanze mbere ntitumuzi, kandi iyi nama niyo yemerewe kugira ibisobanuro itanga.’’

Rutijanwa Medard, umwe mu bagize uyu muryango, yavuze ko bamaze igihe baterana, ariko bagishakisha icyakorwa mu gutabariza umwami Kigeli V
Pst. Ezra Mpyisi(ibumoso) yavuze ko Umuryango w'Umwami Kigeli V wifuza ko yatabarizwa mu Rwanda
Abagize Umuryango w'Umwami Kigeli V Ndahindurwa bari mu Rwanda mu kiganiro n'itangazamakuru
Nsengiyumva Albert(hagati), wahoze ari Umunyamabanga wa Leta ushinzwe amashuri y'imyuga n'ubumenyingiro

Amafoto:Luqman Mahoro


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved