Umusaruro w’inyama wazamutseho toni ibihumbi 30 mu mwaka

Yanditswe na IGIHE
Kuya 1 Gashyantare 2017 saa 09:07
Yasuwe :
0 0

Ikigo cy’Igihugu gishinzwe guteza imbere ubuhinzi n’ubworozi (RAB) cyatangaje ko umusaruro w’inyama wazamutseho ibihumbi 30 mu mwaka ushize.

Iki kigo gitangaza ko ibyo byose byagizwemo uruhare n’imbaraga zashyizwe mu gushora imari mu bworozi bw’inkoko.

RAB itangaza ko umusaruro w’inyama mu mwaka ushize wazamutse ugera kuri toni ibihumbi 116 uvuye kuri toni ibihumbi 86 wariho mu 2015.

Umuyobozi mukuru ushizwe ubworozi muri RAB, Dr. Christine Kanyandekwe, yatangarije The New Times dukesha iyi nkuru ko ukwiyongera k’umusaruro w’inyama kwatewe n’ibikorwa byo gushora imari mu bworozi bw’inkoko byazamutse cyane mu myaka ibiri ishize.

Ati “Twabonye abashoramari benshi mu bijyanye n’ubworozi bw’inkoko; hari aborozi benshi boroye hagati y’inkoko ibihumbi 10 na 20. Mu by’ukuri, habayemo ubwiyongere bugaragara bw’abikorera ku giti cyabo mu bworozi bw’inkoko.”

Uyu muyobozi kandi avuga ko uretse ubworozi bw’inkoko bugenda butera imbere, ngo n’ubworozi bw’ingurube bwazamutse mu buryo bugaragara.

Dr Fabrice Ndayisenga, ushinzwe ibijyanye n’umusaruro w’ibikomoka ku matungo muri RAB, yatangaje ko muri toni ibihumbi 30 ziyongereye ku musaruro w’inyama mu 2016, ubworozi bw’inkoko bwagize uruhare rwa 30%.

Mu Ugushyingo umwaka ushize, RAB yari yatangaje ko hagiye gutangizwa umushinga wa miliyari y’amanyarwanda w’ubworozi bw’inkoko mu rwego rwo gufasha urubyiruko rudafite imirimo n’abandi banyarwanda babikeneye.

Biteganyijwe ko muri uyu mushinga, hazatangwa ingurube 4000, ihene 2000 n’inkoko 32000, zigahabwa amatsinda yatoranyijwe.

RAB iteganya ko umusaruro w’inyama uzazamuka ukagera kuri toni ibihumbi 230 mu 2018.

Imibare igaragazwa na RAB, yerekana ko mu 2016 mu gihugu hari inka miliyoni 1.3, inkoko miliyoni eshanu na miliyoni imwe z’ingurube.

Umusaruro w'inyama wazamutseho toni ibihumbi 30

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza