Umushinga wo gutunganya ahazimurirwa CHUK uzatangira muri Werurwe 2020

Yanditswe na Evariste Nsengimana
Kuya 13 Gicurasi 2019 saa 04:35
Yasuwe :
0 0

Minisiteri y’Ubuzima yatangaje ko umushinga wo kwagura ibitaro bya Masaka biherereye mu Karere ka Kicukiro hagamijwe kwimuriramo Ibitaro Bikuru bya Kaminuza bya Kigali (CHUK), uzatangira bitarenze Werurwe 2020.

Mu 2013 nibwo byatangajwe ko CHUK igomba kwimuka mu Karere ka Nyarugenge, ikajyanwa i Masaka mu Karere ka Kicukiro. Umujyi wa Kigali wavugaga ko mu gice CHUK yubatsemo hagenda haza umubyigano n’ibikorwa bishya birimo iby’ubucuruzi.

Ibitaro bya Masaka bisanzwe biterwa inkunga na Leta y’u Bushinwa ari na yo ifite mu nshingano umushinga wo kubyagura, kugira ngo haboneke ibikorwa remezo ibitaro bya CHUK bizakoreramo nibizaba byimuwe.

Ubwo yagezaga kuri Komisiyo y’Ingengo y’Imari n’Umutungo by’Igihugu mu Nteko Ishinga Amategeko ibikubiye mu mbanzirizamushinga y’Ingengo y’Imari y’umwaka wa 2019/2020 mu nzego akuriye, kuri uyu wa Mbere, Minisitiri w’Ubuzima Dr. Diane Gashumba yabajijwe aho uyu mushinga waheze.

Depite Rutayisire Georgette yavuze ko kwagura ibitaro bya Masaka byaba igisubizo ku bucukike bw’abarwayi bugaragara muri CHUK.

Depite Murara Jean Damascène we yavuze ko ibitaro bya CHUK bishaje, nawe abaza igihe umushinga wo kubivugurura bikajyana n’igihe uzashyirirwa mu bikorwa.

Ati “Ni ibitaro bishaje, bya kera, iyo ugezeyo usanga abarwayi baryamye bacurikiranye, baryamye babuze abaganga kubera ubwinshi, bigutera agahinda.”

Minisitiri Gashumba yavuze ko habayeho gutinda kubyimura kubera ko ari umushinga Guverinoma y’u Rwanda ifatanyije na Leta y’u Bushinwa, bikaba byaragoranye kwemeza igishushanyo mbonera n’ibindi.

Ati “Bafite inzira babinyuzamo kandi tugomba kubaha, ariko icyiza ni uko mu byumweru bibiri bashize baraje dukorana inama, hemejwe ko ibi bitaro bizatangira kubakwa mu kwezi kwa Werurwe umwaka utaha.”

Dr. Gashumba yavuze ko nyuma ibitaro bya CHUK bizahita bihimurirwa, bigatangira gutanga serivisi ziri ku rwego rugezweho.

Umuyobozi wa CHUK, Dr. Hategekimana Théobald, yavuze ko mu myaka itanu iri imbere ibyo bitaro bizaba byamaze kwimukira i Masaka.

CHUK ni bimwe mu bitaro bikomeye biri mu gihugu ndetse byakira n’umubare munini w’abarwayi, aho abagera kuri 70 % baba bahoherejwe, abenshi bakoresha ubwisungane mu kwivuza.

Ibitaro bya CHUK mu myaka iri imbere bizimurirwa i Masaka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza