Umutekamitwe yiyitiriye Amb. Nduhungirehe asaba abaturage amafaranga

Yanditswe na Rabbi Malo Umucunguzi
Kuya 11 Ukwakira 2017 saa 05:17
Yasuwe :
0 0

Umuntu utaramenyekana yafunguje konti kuri Facebook mu mazina yombi y’Umunyamabanga wa Leta muri Minisiteri y’Ububanyi n’Amahanga, Ubutwererane n’Umuryango w’Ibihugu bya Afurika y‘Iburasirazuba, Amb. Nduhungirehe Olivier, agenda asaba abantu amafaranga, aza no kubwira umwe ko Guverinoma yateganyije miliyari 15 Frw ku ba Diaspora bafite imishinga, anamuguza ayo kugoboka mwene wabo.

Amb. Nduhungirehe uheruka gushyirwa muri Guverinoma nyuma y’imyaka isaga ibiri ahagarariye u Rwanda mu Bubiligi, ni undi muyobozi wibasiwe n’abashaka kurya utw’abandi mu bwambuzi bushukana, bifashishije konti mpimbano ku mbuga nkoranyambaga. Mu 2015 bwo hari uwiyitiriye Minisitiri w’Ingabo, Gen James Kabarebe

Mu butumwa Amb. Nduhungirehe yashyize ahagaragara, yavuze ko hari umuntu wafunguje konti mpimbano kuri Facebook mu mazina ye bwite, ashyiraho n’ifoto ye, atangira koherereza abantu ubutumwa busaba ubucuti.

Amb. Nduhungirehe avuga ko yaje kubitahura yitabaza ubuyobozi bwa Facebook, iyo konti irafungwa nubwo abenshi bari bamaze kumwemerera ubucuti ndetse batangiye gusabwa amafaranga.

Mu biganiro uko byagendaga bikurikirana ku rukuta rwe rwa Facebook, Amb Nduhungirehe yaje kugira ati “Hari umuntu w’i London yabwiye ko GoR yateganyije 15 billion Frw ku ba Diaspora bafite imishinga, maze amwaka £400 ngo yo kugoboka mwene wabo!”

Uwitwa Gakwaya Marc yaje kuvuga ko uwo “Nduhungirehe” nawe yamwandikiye akamusaba 70,000 Frw, amubwira ko hari mwene wabo urwaye ukeneye ko bamufasha kugoboka.

Mu kiganiro bagiranaga byasaga n’aho Gakwaya ari mu Rwanda “Nduhungirehe” we ari mu mahanga, abanza kumubaza igihe azagarukira mu rwa Gasabo, undi ati “Ni nyuma y’ukwezi”, agakomeza amubwira ko hari ubufasha amukeneyeho.

Ati “Anyway hari ubufasha nshaka kugusaba kandi urabizi ko abavandimwe baberaho gufashanya. Hari umuvandimwe mfite ari mu bitaro wamfasha ukamumpera 70,000 Frw nkayagusubiza kuwa Gatanu kuri Western Union nkazarenzaho n’aya fanta yawe.”

Akomeza agira ati “Ni ubwo bufasha nkeneye cyane, babimbwiye bantunguye cyane, gerageza urebe uko ubimfashamo”

Gakwaya amusaba numero ye ya telefoni ngo ajye kumureba, “Nduhungirehe” ahita asubiza ko arwariye kure cyane, ibyiza ari uko yamuhamagara akamubaza uko yayamugezaho byoroshye “cyangwa agakoresha Mobile Money.”
Gusa birangira ayo mafaranga ataroherezwa.

Uwitwa Kalisa Gratien nawe avuga ko yamugezeho bakaganira ariko aza kubikeka ko ari umutekamutwe, arabihagarika.

Ambasaderi Rugira Amandin wasabiwe gusimbura Amb. Nduhungirehe mu Bubiligi, Umuryango w’Ubumwe bw’Ibihugu by’u Burayi na Luxemburg, we avuga ko iyo konti yahise ayikumira mu nshuti ze akibimenya.

Nyuma yo gutabaza Facebook kuri ubu konti nyakuri ya Olivier Nduhungirehe yamaze gushyirwaho akamenyetso ko yasuzumwe (Verified ).

Si ubwa mbere umuntu yiyitirira umuyobozi mukuru mu gihugu, kuko mu 2015 hari uwiyitiriye Minisitiri w’Ingabo, Gen James Kabarebe, atangira gusaba abaturage amafaranga abizeza ubufasha butandukanye, birangira atawe muri yombi ndetse Urukiko rw’Ibanze rwa Nyamirambo rumukatira gufungwa imyaka itanu n’ihazabu ya miliyoni 5 Frw.

Uo wiyitiriye Gen Kabarebe ni umusore witwa Mugema Jacques wahamijwe ibyaha by’ ubwambuzi bushukana no kwiha ububasha mu mirimo itari iye, aho yiyemereye ko yakoresheje izina rya Gen. Kabarebe, akajya yemerera abantu ubufasha binyuze kuri Facebook, harimo abo yasabye amafaranga yo kwiga umushinga, ayo kubashakira ibyangombwa by’inzira (Passeport na Visa) n’ibyangombwa byo kwa muganga, bakayamwoherereza kuri Mobile money, umusabye ko babonana akamwangira.

Yari amaze kwambura abantu ibihumbi 991 n’amafaranga 950 y’u Rwanda, ategekwa kuyasubiza hagendewe kuyo buri muntu yagiye amwoherereza.

Ubutekamutwe bukoresheje ikoranabuhanga bureze buri wese asabwa kugira ubushishozi.

Umunyamabanga wa Leta muri Minisiteri y’Ububanyi n’Amahanga, Ubutwererane n’Umuryango w’Ibihugu by'Afurika y‘Iburasirazuba, Amb. Nduhungirehe Olivier

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza