Kwamamaza

Umuyobozi w’Urugaga rw’Abikorera yasuye Kaminuza Yigenga ya Kigali ULK (Amafoto)

Yanditswe kuya 12-11-2016 saa 21:20' na IGIHE


Umuyobozi Mukuru w’Urugaga rw’Abikorera mu Rwanda (PSF), Gasamagera Benjamin, yasuye anatambagizwa zimwe mu nyubako za Kaminuza Yigenga ya Kigali zikoreramo amashami atandukanye arimo icyiciro cya Gatatu cya Kaminuza (Masters), icya Kabiri (Undergraduate) ndetse n’Ishuri ryigisha Ubumenyingiro (ULK Polytechnic Institute).

Mu rugendo yahagiriye mu Cyumweru gishize, uyu muyobozi yeretswe ibikorwa bitandukanye by’iyi Kaminuza birimo n’umushinga wo kubaka ibitaro watangiye muri 2014, hanozwa ibijyanye n’igishushanyo mbonera mbere y’ibikorwa nyirizina byo kubaka byatangiye kuya 1 Kamena 2016.

Umuyobozi Ushinzwe Ibikorwa by’Iyubakwa ry’ibi bitaro muri ULK, Balinda Daniel yagize ati “Igishushanyo mbonera cy’ibi bitaro cyakozwe n’Ikompanyi izobereye mu bwubatsi bw’ibitaro yitwa VINYAS Architects, ifite uburambe ntagereranywa mu kubaka ibitaro ahantu hatandukanye ku Isi."

Yakomeje atangaza ko umushinga wo kubaka ibitaro uteganyijwe kurangira mu 2019.

Iyi nyubako y’amagorofa umunani igabanyije mu bice bitatu birimo, Super Speciality Hospital izatanga serivisi z’ubuvuzi ku Banyarwanda bajyaga kubushaka mu bihugu byo hanze byateye imbere mu buvuzi, birimo nk’Afurika y’Epfo na Kenya byo ku mugabane wa Afurika ndetse n’iby’i Burayi, birimo u Buhinde ndetse n’ahandi.

Icya kabiri ni icya General Hospital izafasha kuvura indwara zoroheje ndetse igafasha n’abanyeshuri biga ubuvuzi kwimenyereza umwuga ndetse n’icy’inyubako izakoreramo Ishuri ryigisha Ubuvuzi.

Balinda ashimangira ko bizaba bifite abaganga b’inzobere bafite ubunararibonye, ndetse bikazatanga serivisi zirimo kubaga indwara zitandukanye, kuvura kanseri, gufasha ababuze urubyaro, kubona abana binyuze mu buryo bwo guhuza intanga zigashyirwa muri laboratwari buzwi nka IVF (In Vitro Fertilization) n’izindi serivisi.

Perezida wa ULK, Prof. Dr. Rwigamba Balinda, wakiriye Umuyobozi wa PSF yatangaje ko bafite imishinga myinshi itandukanye igamije kurushaho kwagura ibikorwa byabo ndetse no gukorana n’Urwego rw’Abikorera mu Rwanda.

Yagize ati “Kaminuza izaharanira kurushaho kureba icyateza imbere uburezi n’imikoranire myiza n’inzego zitandukanye. Ibyo mubona byagezweho ni umusingi w’imishinga miremire duteganya gukora.”

Prof. Dr. Rwigamba Balinda yavuze ko kimwe mu byo Kaminuza isaba ari umuhanda uzafasha koroshya ingendo hagati y’urujya n’uruza rw’abagana ibitaro n’abanyeshuri mu gihe bizaba byuzuye.

Gasamagera Benjamin yishimiye intambwe ULK imaze gutera ndetse ashimangira ko iri mu bafatanyabikorwa bayo b’imena mu kuzamura ubukungu bw’igihugu.

Yagize ati “Mu by’ukuri iyi Kaminuza yateye imbere cyane, hari bamwe mu Banyarwanda bayumva ariko batazi iterambere imaze kugeraho. Abenshi baracyayifata nk’iyigisha amasomo asanzwe ajyanye n’iby’Amategeko, n’Icungamutungo. Ibyo twabonye hano biratangaje, ndetse biratanga icyizere ko uru Rwego rw’Abikorera ruzarushaho gutera imbere. Twishimiye cyane uburyo muri iyi Kaminuza abantu bakorana umurava ibyo bashinzwe,babikunze kandi bifitiye icyizere bituma iterambere rirushaho gusakara.”

Yakomeje agira ati “ ULK yumvise neza gahunda y’igihugu, ari nayo ya PSF yo guteza imbere ubumenyingiro. Igikomeye cyane, Abanyarwanda twese tugomba guha agaciro ni ibitaro by’icyitegererezo bagiye gushyiraho bizafasha kuvura indwara zananiranye, bikagabanya amafaranga abantu batangaga bajya kwivuza hanze. Ibi bizakemura ikibazo cy’abaganga bake bagaragara mu gihugu ndetse no ku mugabane wa Afurika muri uyu mwuga.”

PSF yijeje ULK ubufatanye burambye n’ubuvugizi

Gasamagera yagize “Tuzagerageza gukora ibishoboka byose tubaba hafi, tubashyigikira, tubafashe gukora ubuvugizi uko bishoboka, tubahuza n’abantu benshi mwafatanya gushyira mu bikorwa imishinga yanyu kandi nizeye ko bizatanga umusaruro.”

ULK imaze kuba ihuriro ryakira ibikorwa mpuzamahanga

Ubwo umuyobozi wa PSF yari mu rugendo rwo gusura ibikorwa bya ULK, yatambagijwe no mu nyubako yaberagamo ibiganiro mpaka bihuza urubyiruko ruturutse mu Karere ka Afurika y’Iburasirazuba.

Umuyobozi Mukuru wa Kaminuza ya ULK, Dr. Sekibibi Ezekiel,yatangarije umunyamakuru wa IGIHE ko impamvu bahisemo ULK ngo yakire aya marushanwa ari uko iyi Kaminuza imaze kugira izina rikomeye mu ruhando rw’amahanga.

Yagize ati “ Kaminuza ya ULK yagiriwe icyizere cyo kwakira aya marushanwa y’ibiganiro mpaka by’urubyiruko rwo muri Afurika y’Iburasirazuba bitewe nuko imaze kumenyekana cyane hirya no hino. Urugero abanyeshuri bacu batwaye iri rushanwa inshuro ebyiri, Kaminuza yacu kandi imaze igihe iza ku mwanya wa kabiri muri Kaminuza zose zikorera mu Rwanda. Ikindi kandi ULK basanze ifite ibikorwa remezo byose bikenerwa kugira ngo iri rushanwa rigende neza.”

Nyuma yo gusura ibikorwa bitandukanye bya ULK, Umuyobozi Mukuru wa PSF yashyikirije igikombe Perezida wa ULK, Prof. Dr. Rwigamba Balinda, amushimira kuba umufatanyabikorwa mwiza kandi w’icyitegererezo.

ULK imaze kuba ubukombe ku isoko ry’umurimo

Ubushakashatsi bwakozwe na Cope Consulting Ltd bwagaragaje ko umubare munini w’abarangiza muri ULK bitwara neza ku isoko ry’imirimo.

Abagera kuri 30% bakora mu nzego z’ibanze, 42% babarizwa mu butabera, hakaba hari n’abandi benshi bakora mu nzego zitandukanye z’igihugu, abakorera ibigo by’imari bitandukanye, abashinze ibigo biciriritse, ndetse n’abakorera imiryango mpuzamahanga itandukanye.

Amafoto y’urugendo rw’Umuyobozi Mukuru wa PSF, Gasamagera Benjamin muri Kaminuza ya Kigali

Basura inyubako ikoreramo icyiciro cya Gatatu cya Kaminuza (Masters)

Perezida wa ULK, Prof. Dr. Rwigamba Balinda mu byishimo byo kwakira Umuyobozi wa PSF, Gasamagera Benjamin
Basura ibyumba byigishirizwamo mudasobwa
Umuyobozi w’Urugaga rw’Abikorera mu Rwanda, Gasamagera Benjamin yishimiye iterambere ULK imaze kugeraho
Igishushanyombonera cya ULK mu minsi iri imbere
ULK imaze kwegukana ibikombe byinshi mu mikino itandukanye
Niyonkuru Jean de Dieu ushinzwe ibijyanye n'itumanaho n'ikoranabuhanga asobanurira umuyobozi wa PSF amasomo batanga
Gasamagera Benjamin yanyuzagamo akabaza ibibazo agahita ahabwa ibisubizo bimunogeye

Basura ahari kubakwa ibitaro

Ahari kubakwa ibitaro bya ULK
Umuyobozi Ushinzwe Ibikorwa by’Iyubakwa ry’ibi bitaro muri ULK, Balinda Daniel (uwa kabiri uhereye ibumoso) asobanura umushinga w'ibitaro
Perezida wa ULK, Prof. Dr. Rwigamba Balinda (iburyo) na Gasamagera Benjamin uyobora PSF

ULK Polytechnic Institute

Ahigishirizwa ibijyanye n'ubwubatsi
Gasamagera yerekwa igikoresho kigezweho kifashishwa mu gupima no gutunganya sima
Hari imashini zigezweho zagenewe gukoreshwa mu bwubatsi
Basura aho abiga ibijyanye n'ububaji bimenyerereza umwuga

Nyuma yo gutambagizwa Kaminuza, Umuyobozi wa PSF, Gasamagera Benjamin yashyikirije Perezida wa ULK, Prof. Dr Rwigamba igihembo

Gasamagera Benjamin (iburyo), Perezida wa ULK, Prof. Dr. Rwigamba Balinda n'Umuyobozi Mukuru wa Kaminuza ya ULK, Dr. Sekibibi Ezekiel baganira
Gasamagera Benjamin yahaye Perezida wa ULK, Prof. Dr. Rwigamba Balinda igihembo cy'ishimwe cy'umufatanyabikorwa w'imena
Gasamagera yasobanuriwe amateka ya Kaminuza ya ULK kuva yashingwa ndetse n'uruhare rwayo mu guteza imbere uburezi mu Rwanda
Umunyamabanga wa Perezida wa ULK, Amani Manzi Alain
Abayobozi ba Kaminuza ya ULK n'Umuyobozi wa PSF bafata ifoto y'urwibutso

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved