Umwami mushya n’abamwimitse bamaganiwe kure

Yanditswe na Rabbi Malo Umucunguzi
Kuya 10 Mutarama 2017 saa 11:33
Yasuwe :
0 0

Icyemezo cyo gutabariza mu Rwanda Umwami Kigeli V Ndahindurwa, giheruka kwemezwa n’urukiko rwo muri Leta Zunze Ubumwe za Amerika nyuma y’impaka zikomeye hagati ya bamwe bo mu muryango we n’ababanaga na we, gusa haracyavugwa byinshi ku ruhande rw’abatarishimiye umwanzuro w’urukiko bahise bagena umusimbura.

Umugogo wa Kigeli V wagejejwe mu Rwanda kuri uyu wa 9 Mutarama 2017, aho wakiriwe na bamwe mu bagize umuryango we n’abayobozi mu nzego za leta, nyuma y’amezi abiri atanze kuko yasezeye ku Isi kuwa 16 Ukwakira 2016, muri Leta Virginia aho yari atuye.

Mu gihe hari hakivugwa ibyo kumutabariza, uwari Umujyanama wa Kigeli V, Boniface Benzinge yasohoye itangazo rivuga ko himitswe umwami mushya Emmanuel Bushayija ugomba gutwara u Rwanda, ibintu bitavugwaho rumwe bitewe n’uburyo byakozwemo.

Bushayija utuye mu Bwongereza kuva mu 2000 ni mwene Theoneste Bushayija mwene Yuhi V Musinga, wavukiye mu Rwanda mu 1960.

Benzinge yavuze ko ubusanzwe usimbura Umwami atangazwa n’Abiru ku itabarizwa ry’umwami uba yaratanze, ariko kubera ko ataribo bari kumwe n’umugogo w’Umwami, “Abiru batangaje ko ko umusimbura we ari Emmanuel Bushayija”, uwo yari abereye se wabo.

Iri tangazo rivuga ko imihango yo kumwimika igomba gukurikira, ndetse hashingiwe kuri gakondo, uyu watangajwe nk’umwami mushya azafata izina rya Yuhi VI.

Bushayija ni umwe mu batarifuje ko Kigeli V atabarizwa mu Rwanda

Ubwo impande ebyiri zitumvikanaga aho umugogo wa Kigeli V Ndahindurwa uzatabarizwa, zari imbere y’urukiko rwa Virginia, Emmanuel Bushayija w’imyaka 56 ufite n’abana babiri, yari mu bashyigikiye ko atabarizwa ishyanga kuko ngo ‘kuba u Rwanda rutarigeze rwifuza ko ataha nk’umwami ari impamvu ihagije yo gutuma adasubizwayo nyuma yo gutanga’.

Umujyanama w’Umwami, Boniface Benzige we yabwiye BBC ko uretse kwimika umwami hari ibindi bizakurikiraho kuko ibyabaye batabyemera, avuga ko urubanza rwajemo ibintu byinshi birimo n’inzandiko by’umwami byibwe mu nzu ye, byagaragazaga ubusabe bwe ku itabarizwa.

Abajijwe uko Umwami wimitswe azakora n’aho azakorera Benzige yagize ati“ibyo bizavugwa nyuma icyo twabanzaga kureba ni usimbura undi mwami.”

Pasiteri Mpyisi ati ‘sinzi niba umukarani yimika umwami”

Guhera nibura mu 1378 ku ngoma ya Kigeli I Mukobanya kugeza ku ngoma ya nyuma ya Kigeli wa V Ndahindurwa mu 1961, urukurikirane rw’abami rwerekana ko amazina bagiye bafata yahindukaga uhereye kuri Kigeli wakurikirwaga na Mibambwe, Yuhi na Mutara none ho indi nshuro Umwami ukurikira Yuhi akitwa Cyilima.

Ugendeye kuri urwo rukurikirane, abiru nta na rimwe bigeze bakurikiranya Kigeli na Yuhi bisobanuye ko umwami wari gukurikiraho yari kwitwa Mibambwe.

Pasiteri Ezra Mpyisi wabanye n’umwami Kigeli V, kuva mu ntangiriro z’ikibazo yavugaga ko agiye kugerageza guhuza abavandimwe bari bamaze gucikamo ibice, ko agomba “kwicarana n’umuryango w’Abahindiro nkabasaba kwicarana bagakura umuvumo uri mu muryango wabo”.

Mu kiganiro na IGIHE, Pasiteri Mpyisi yavuze ko umwami yagombaga kwimikwa n’Abiru, kandi atumva neza uko ababanaga na Kigeli V Ndahindurwa bitwa Abiru.

Ati “None se umwami utavuzwe n’Abanyarwanda akimikwa n’abantu babiri, ko ari babiri bamwimitse, kandi bakamwimikira mu mahanga, ibyo ni ibyabo umuntu yabibabaza. Ikindi bariya bantu si Abiru b’ibwami. None se bakwimikira umwami mu mahanga atari Abiru kandi akimikwa n’abantu babiri, ese uwo mwami azaba umwami w’abantu babiri?”

“Ni uko nanjye mbireba, bazaba bavuga uwo mwami abantu azajya gutwara niba ari abo babiri. Niba ari benshi ntibarenze batanu.”

Mpyisi yakomeje avuga ko muri iki gihe hari kuba inama yiga kuburyo bwo gutabaza Kigeli V Ndahindurwa, inama igomba kwemeza igihe azatabarizwa n’uburyo bizakorwamo kuko “hari ibigomba kwitegurwa.”

Itangazwa rya Bushayija nk’umwami ryabaye nyuma gato y’uko abagombaga kuzana Umugogo w’Umwami bari bahagurutse muri Leta Zunze Ubumwe za Amerika, ritangazwa na Boniface Benzinge wari umujyanama n’umuvugizi w’Umwami.

Pasiteri Mpyisi ati “Uriya (Benzinge) kandi yari umukarani we (Umwami Kigeli). Niba umukarani yimika umuntu rero simbizi.”

Pasiteri Ezra Mpyisi wabanye n’umwami Kigeli V Ndahindurwa kuva mu buto

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244