Umwami wa Maroc yoherereje Perezida Kagame ubutumwa bw’ishimwe

Yanditswe na Philbert Girinema
Kuya 24 Ukwakira 2016 saa 03:27
Yasuwe : XX
0

Ubwo yari akubutse mu Rwanda mu ruzinduko yari amazemo iminsi itandatu, Umwami wa Maroc, Mohammed VI yoherereje Perezida Kagame ubutumwa bw’ishimwe.

Ubwo butumwa bugira buti “Mu gihe mvuye mu kirere cy’igihugu cyanyu, aho nsoje uruzinduko rw’akazi muri Repubulika y’u Rwanda, nashakaga kubashimira byimazeyo, no kubereka ko nezerewe kubera uburyo budasanzwe mwanyakiriyemo hamwe n’abo twari turi kumwe.”

Muri ubwo butumwa, Umwami wa Maroc yanagaragaje uburyo yanyuzwe n’ibiganiro yagiranye na Perezida Kagame, aho avuga ko byari ingirakamaro.

Ati “Nshimishijwe cyane kandi no kuba uru ruzinduko rugiye kongera imbaraga mu mibanire y’ibihugu byacu, hashingiwe ku masezerano twashyizeho umukono, areba inzego zitandukanye.”

Umwami wa Maroc yanagaragaje ishyaka afitiye gukomeza gukorana n’Umukuru w’Igihugu cy’u Rwanda mu kubaka uburyo bugezweho kandi bwiza mu butwererane, buzatuma barushaho gukora ibyo abaturage babifuzaho, mu gufasha kugera ku iterambere rirambye, umutekano n’umudendezo wa Afurika, ndetse no mu guhangana n’inzitizi ziboneka.

Umwami wa Maroc, Mohammed VI yageze mu Rwanda kuwa kabiri w’icyumweru gishize, asoza uruzinduko rwe ku cyumweru tariki ya 23 Ukwakira.

Mu minsi itandatu yamaze mu Rwanda, ibihugu byombi byashyize umukono ku masezerano y’ubutwererane mu nzego zinyuranye, arimo 19 yashyizweho umukono kuwa Gatatu tariki 19 Ukwakira, arebana n’ishoramari mu mabanki, ubutwererane n’imikoranire isesuye hagati yabyo, korohereza abafite pasiporo z’abadipolomate kuva mu gihugu bajya mu kindi n’andi.

Umwami wa Maroc yahise akomereza uruzinduko rwe muri Tanzania.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza