Umwanditsi Ilibagiza wigeze kubonana na Papa, yavuye imuzi Amabonekerwa ya Kibeho

Yanditswe na IGIHE
Kuya 13 Ugushyingo 2017 saa 10:26
Yasuwe :
0 0

Immaculée Ilibagiza ni umunyarwandakazi uvuka mu Mataba ku Kibuye mu Ntara y’Uburengerazuba utuye muri Leta Zunze Ubumwe za Amerika, akaba umwanditsi w’ibitabo wari i Kibeho ubwo Bikira Mariya yahabonekeraga. We ubwe n’amaso yabonye ibitangaza byahabereye, yumva n’ubutumwa bwahatangiwe atabubariwe n’abandi.

Uyu mubyeyi w’imyaka 45 y’amavuko ufite abana babiri, mu minsi ishize yagize amahirwe yo guhura n’aba Papa babiri ba Kiliziya Gatolika. Yabonanye amaso ku maso ndetse aramukanya na Papa Benedigito wa XVI, anaherutse kubonana na Papa Francis i Roma. Agira uruhare mu kuzana i Kibeho abanyamahanga bashaka kuhasura ngo bamenye amateka ajyanye n’amabonekerwa.

Ilibagiza yanditse ibitabo bigera ku icumi harimo ibivuga kuri Jenoside yakorewe Abatutsi nk’umwe mu bayirokotse, yandika n’ibindi bivuga kuri Bikira Mariya nk’umwana wakuze amukunda cyane.

Igitabo cye Left To Tell, cyasohotse mu 2006 cyakoze amateka akomeye cyane mu gusomwa mu bice bitandukanye ku isi aho agaruka cyane ku mateka ye muri Jenoside yakorewe Abatutsi.

Mu kiganiro na IGIHE, Ilibagiza yagarutse ku buhamya bwatangiwe i Kibeho nk’umwe mu bantu bari bahari icyo gihe, anavuga byimbitse kuri Kiliziya bivugwa ko zasabwe na Bikira Mariya nk’umwe mu bari kugira uruhare kugira ngo zubakwe.

Iki ni igice cya mbere cy’ikiganiro twagiranye na Ilibagiza aho kigaruka cyane ku mabonekerwa nyir’izina, mu gice cya kabiri tuzagaruka ku bijyanye n’iyubakwa ry’izo kiliziya rikomeje guteza uruntu runtu muri iki gihe.

Immaculée Ilibagiza muri Nzeri 2015, yahuye na Papa Francis amushyikiriza kimwe mu bitabo yanditse

Ikiganiro kirambuye

IGIHE: Uhurira he n’amabonekerwa ya Kibeho ko uzana abanyamahanga benshi i Kibeho, ukanandika ibitabo kuri Kibeho?

Ilibagiza: Ibya Kibeho nabikunze kera. Ariko burya ibintu bigira itangiriro. Nakuriye mu muryango w’abagatolika kandi wasengaga, basaza banjye bize mu iseminari yo ku Nyundo. Kera mfite imyaka 11, ndibuka umwarimu wacu, yadusomeye inkuru y’abana b’i Fatima, ukuntu abana batatu, basuwe na Bikira Mariya. Atubwira ukuntu bari abashumba, kandi bakundaga kuvuga ishapule. Atubarira ukuntu yabigishije gukunda gusenga, cyane cyane ishapule. Atubwira ukuntu habaye n’igitangaza cy’izuba ryahindutse ukundi, riramanuka, ibyo bimara iminota 12, abari barwaye barakize, impumyi zirahumuka, abafite ubumuga buragenda. Icyo gitangaza kibonwa n’abantu bagera ku bihumbi 70. Mu mitekerereze y’abana, ntangira kwibaza nti natwe dukoze nk’abana b’i Fatima twabonekerwa.

Nshaka inshuti zanjye Jeannette na musaza we Clement, tuba batatu nk’abana b’i Fatima, dutangira kujya dukurikira ihene z’iwacu, ngo tube abashumba, tukavuga ishapule tuzi ko nidukora nk’abana b’i Fatima, Bikira Mariya azadusura.

Twabona umurabyo tukiruka, tuziko aje. Twamaze nk’ukwezi, tuza kwibaza impamvu Bikira Mariya ataza, tuti buriya ni uko tugomba gutegura ahantu hitaruye azaza kutubonekera hazakwirwa abantu. Mu gihe tutarajya gutegura ahantu handi, twari kujyayo nko ku wa Gatandatu ukurikira, Bikira Mariya aba abonekeye i Kibeho. Mbese mbyinjiramo ntyo, kuko nabaga nk’umwiteguye n’ubundi.

IGIHE: Ko mwari mukiri bato, iby’amabonekerwa mwabyakiriye mute?

Ilibagiza: Papa yari ahagarariye amashuli abanza y’abagatulika, ni padiri mukuru wabimubwiye bwa mbere witwaga Clement Kanyabusozo. Nkibyumva iyo nkuru sinayakiye neza, narababaye biranandiza. Papa yakundaga abana, akunda no gusenga, atugira inama yo kujya kureba Padiri tukamusaba ko yajya atumenyesha ubutumwa bwa Bikira Mariya atanga i Kibeho kuko natwe butureba. Padiri na we aradukundira, akajya adufatira amajwi y’amabonekerwa akadutumira tukumva.

IGIHE: Benshi mu Rwanda bumva ibya Kibeho nk’inkuru ya kera batahagazeho, wowe ubizi ute?

Ilibagiza: Kubonekerwa byatangiye ku itariki ya 28 Ugushyingo 1981. Hari nka saa sita n’igice z’amanywa, mu ishuri ryisumbuye rya Kibeho ry’abakobwa ritegekwa n’ababikira b’Abenebikira.

Ayo masaha umunyeshuri wahigaga witwaga Alphonsine Mumureke arimo yarurira abandi banyeshuri ibyo kurya, abura bagenzi be, yibona ari ahantu heza cyane, hadatuwe nta n’ibiti bihari, ngo abona umugore utagira uko asa imbere ye, muto mu myaka, hagati ya 20-25, wambaye nk’umugeni ikanzu y’umweru n’ivala y’umweru de...

Ubwo uwo mugore ngo akamubonamo umubyeyi we w’impuhwe zirengeje. Ngo yari ahagaze mu rumuri rwaka kurusha izuba, ariko kandi rutababaza amaso. Abaza uwo mubyeyi uko yitwa, amubwira ko yitwa “Nyina wa Jambo”. Amubwira ko azakomeza kujya aza kumusura akamutuma.

Alphonsine aratotezwa cyane ntibemere ibyo ababwira, yinginga Bikira Mariya ngo abonekere undi munyeshuri kugira ngo bemere batege amatwi ubutumwa bwe. Bikira Mariya aza kubonekera undi munyeshuri, Natalia Mukamazimpaka, uwo munyeshuri we aza no kubonekerwa na Yezu ubwe. Abantu koko batangira kubyemera, ariko bagishidikanya, hashize iminsi abonekera uwabatotezaga noneho witwaga Marie Claire Mukangango. Abantu babona kwemera ari benshi.

IGIHE: Ese wigeze uhagera wowe ubwawe ngo ubone abo bakobwa babonekerwa? Byamaraga igihe kingana iki?

Ilibagiza: Najyaga njyayo mu mabonekerwa n’ababyeyi banjye barahazaga. Iyo Bikira Mariya yazaga mu ruhame, yabateguje, yamaraga nk’amasaha ane. Ku italiki ya 15 Kanama 1982 yamaze amasaha umunani.

Ibonekerwa ryose rigira ibyihariye. Ahenshi Bikira Mariya yabonekeye nka Lourdes mu Bufaransa, i Fatima muri Portugal, tuzi ko yajyaga amara akanya gato, ariko Bikira Mariya yubaha umuco wabo asuye. Nko muri Mexique yaje asa n’ubwoko bwaho, yambaye nkabo. Mu Rwanda rero, yubashye umuco wacu, umubyeyi ntasura umwana iminota 15, yamuteguje, ahubwo aza gutanga inama, akabaza amakuru, agasura mbese. Bikira Mariya yitwaye mu Rwanda nk’umubyeyi w’umunyarwanda, aza avuga ururimi rw’ikinyarwanda ahubwo rimwe na rimwe ngo agaca n’imigani.

Ikindi yakoze mu Rwanda atakoze ahandi, yigishije indirimbo agasaba ko abantu bamubyinira, tugashayaya, akanishima, ati mujye mubyina mutekereza amagambo y’indirimbo, mutekereza uwo mubyinira, ati nabyo ni isengesho. Akita abantu indabo ze.

IGIHE: None se byaje kwemerwa gute ko ari amabonekerwa ya nyayo?

Ilibagiza: Byamaze gukwira hose, nyakwigendera Musenyeli Gahamanyi Jean Baptiste ashyiraho umutwe w’abantu b’abahanga bazabikurikirana bakiga ubutumwa bahabwa, n’abaganga bagapima abana babonekerwaga ngo barebe ko batabyigira cyangwa atari ubundi burwayi. Ibyo rero byatumye Kiliziya ibyitaho.

Kubera ko rero iyo Bikira yazaga yabwiraga uwo azabonekera igihe azagarukira, inkuru yakwiraga vuba, uwo munsi, abantu babaga ari benshi cyane. Musenyeli abibonye atyo yubakisha ahantu hitaruye, aho bitaga “podium”, hazitiye, bagasasaho ubwatsi bw’inshinge, akaba ariho ababonekerwa bapfukamaga. Bikira Mariya yemera kubasanga aho hanze, anavuga ko abyishimiye, ko ashaka ko abantu baza ari benshi kumva ubutumwa bwe. Agasubiramo kenshi ati, “Ndabakunda, ndabakunda, ndabakunda, ni mwe naziye, nimwe naziye, nimwe naziye kuko nabonaga ko hari ibyo munkeneyeho.”

IGIHE: Twagiye twumva n’abandi babonekerwaga i Kibeho batari abo bakobwa batatu gusa. Ngo hari n’ababonaga Yezu, hari icyo ubiziho?

Ilibagiza: Nibyo habaye n’abandi baje kubonekerwa bakaza kuri podium, bakabakurikirana nk’abandi ariko rero Kiliziya yaje kwemeza batatu gusa kugeza ubu. Hakabamo ababona Bikira Mariya gusa n’ababona Yezu na Bikira Mariya.

Natalia Mukamazimpaka yabonekewe na bombi, uwitwa Valentine Nyiramukiza wari umunyeshuri muri primaire nawe abona bombi, hari uwitwaga Segatashya Emmanuel witabye Imana, we yakunze kubonekerwa na Yezu. Hari uwitwa Agnes Kamagaju wabonye bombi nawe. Hari Stephanie Mukamurenzi n’uwitwa Vestine Salima we yari n’umuyisilamu.

Twabajije Musenyeli Misago akiriho, impamvu batemeye Yezu bakemera Bikira Mariya, atubwira ko ibya Yezu birushya gukurikirana, ngo wenda bizagarukwaho, ati ‘simvuze ko batabonekewe’.

IGIHE: Ababaga baje kureba se mwagiraga icyo mwumva cyangwa se mwamenyaga mute icyo Bikira Mariya avuze?

Ilibagiza: Bikira Mariya iyo yazaga, twe twumvaga ijwi ry’ubonekerwa gusa ariko kenshi akamusaba gusubiramo. Hakaba nubwo ubonekerwa abaza Bikira Mariya, ati “ese ko ari njye na we gusa, kuki unsaba gusubiramo?” Undi ati “nagusabye gukora ugushaka kwanjye, ukore icyo ngusabye”.

Njyewe nagize amahirwe yo kumenya byinshi kuko nanditse ibitabo kuri Kibeho, bituma mpura na benshi bari babyegereye. Nahawe raporo na bamwe mu bacungaga abana babonekerwaga, ibiganiro bagiranaga nyuma y’amabonekerwa n’ibindi. Kandi nsura Alphonsine aho ari mu Butaliyani, nkaba naraganiye kenshi na Natalia aduha ibiganiro ku byo yabonye.

IGIHE: Ni iki cyari gikubiye mu butumwa bwa Bikira Mariya ubwo yabonekeraga i Kibeho?

Ubutumwa ni bwinshi, yavuze ko yaje kwibutsa ibyo Umwana we Yezu yatwigishije akiri ku isi. Kukwibutsa ko Imana idukunda, ko ubuzima bw’isi bushira, ko tugomba gukorera kurenzaho, ubuzima buhoraho. Aratubwira ati, “hajya mu ijuru uwarikoreye.” Yagize ati, “Nimwicuze, nimwicuze, nimwicuze, nimuhinduke mugarukire Imana. Nimusabe imbabazi zigitangwa kuko igihe cyazo kiri hafi kurangira.”

Rimwe yaravuze ati “Isi imeze nabi cyane igiye kugwa mu rwobo. Isi yarigometse, isi yameze amenyo, isi yuzuye ibyaha bitabarika, nta rukundo nta n’amahoro yifitemo.”

Yaravuze ngo, aratumurikira ntitugende, nyamara umwijima wacura tugasiganwa. Ati “Ndaza mukampunga, ndababwira ntimwumva, ndabereka ntimubona.” Yavuze ko ababajwe n’ukwemera guke n’ukutihana kw’abantu b’iki gihe. Ngo ababajwe kandi n’uko abantu badohotse ku muco mwiza, tukitabira ingeso mbi, tukishimira ikibi.

Yadusabye kuvuga ishapule kenshi, buri munsi, no gusengana umutima udafite uburyarya. Yasabye abantu ko bakora ingendo nyoboka-Mana, nko kujya gusura Kibeho n’ahandi hose yiyerekanye, umuntu ajyanywe n’isengesho. Yatwigishije isengesho ry’ishapule y’ububabare, asaba ko tumufasha kuyigisha abandi ku isi yose, atanga n’amasezerano ko abazarivuga azabafasha ku buryo bw’umwihariko mu bibazo bahura nabyo mu buzima bwabo.

IGIHE: None se ko ibihugu ari byinshi, abana be ari benshi, bariya bakobwa bigeze bamubaza impamvu yatoye u Rwanda?

Ilibagiza: Nibyo koko ibyo ni ibibazo abantu bose bibazaga bigitangira. Umwe wamubajije, yaramushubije ati, “Hano mu Rwanda ndacyahabona imitima iciye bugufi, itihambiriye ku mafaranga.” Arongera ati “Naje kuko nabonaga ko hari ibyo munkeneyeho nk’umubyeyi wanyu.”

Ariko kandi Bikira Mariya yavuze kenshi ko nubwo yatoye u Rwanda, agatuma abanyarwanda, ubutumwa atangira i Kibeho, ko butareba u Rwanda gusa, cyangwa se Afurika gusa, ahubwo ko bureba isi yose. Yatanze ubutumwa bwihariye ku Rwanda, ariko ubutumwa bwinshi yatanze bureba buri kiremwa muntu wese.

IGIHE: Kuki nta bantu bakibonekerwa muri iki gihe? Ubundi ababonekerwaga byarangiye ryari, mu wuhe mwaka?

Ilibagiza: Bose bagiye bahagarika kubonekerwa ibihe bitandukanye, kandi bakagira agahinda, ko gusezera, bakarira cyane. Ariko uwo yabonekeye bwa mbere Alphonsine Mumureke yabonekerwaga itariki yabonekeweho bwa mbere 28 Ugushyingo buri mwaka, kugeza amusezeyeho kuri 28 Ugushyingo 1989, ariko amumenyeshako azajya agaruka ari wenyine kumusura ko atagiye burundu. Natalia byamaze umwaka, Marie Claire, asezerwa nyuma y’amezi atandatu abonekewe.

IGIHE: Ababonekewe ubu bari he?

Ilibagiza: Uwitwaga Marie Claire Mukangango, yitabye Imana muri Jenoside, uwitwa Alphonsine Mumureke, ni umubikira mu bataliyani ubu, uwitwa Natalia Mukamazimpaka aba i Kibeho ubu. Abandi bataremerwa, Segatashya Emmanuel yarapfuye nawe muri Jenoside, Agnes Kamagaju ari i Kibeho nawe, Valentine Nyiramukiza aba mu Bubiligi. Vestine Salima ngo yarapfuye na Stephanie Mukamurenzi ntawe uzi aho ari, bamwe bavuga ko yapfuye.

IGIHE: Watubwira muri make ku bitabo wanditse?

Ilibagiza: Ibizwi mu bitabo nanditse, ni icyitwa, “Left To Tell (Gusigarira Kubara Inkuru)”, nanditse uko narokotse jenoside, umuryango wanjye wishwe, ariko nibanda ku masomo navanyemo. Byabaye ibihe bikomeye, ariko kandi byanyegereje Imana kurushaho.

Umuntu wese amaherezo arapfa, ariko ubuzima bwa nyuma y’ubu, nibwo bukomeye, kandi tugomba kubukorera, mbona ko ari nacyo kinini cyazanye Bikira Mariya i Kibeho. Ubundi nanditse igitabo cyitwa, “Our Lady of Kibeho - (Bikira Mariya wa Kibeho)”, no ku isengesho rya Rozari, “The Rosary: Isengesho Ryankijije” ngo nsangize abandi ibimfasha mu buzima bwanjye.

Immaculée Ilibagiza yashinze umuryango ufasha abana b’imfubyi n’abakene aho ubishyurira amashuri akanagira uruhare mu gufasha abafite uburwayi bwa ‘autisme’ mu Rwanda. Ibi abifatanya no kwamamaza ubutumwa bwa Bikira Mariya ahanini ku mabonekerwa ya Kibeho mu bice bitandukanye by’isi.

Immaculée Ilibagiza yasazwe n’ibyishimo ubwo yahuraga na Papa Francis aho yatangaje ko byari bimwe mu bihe byiza yagize mu buzima bwe
Ilibagiza ari kumwe na bamwe mu bihaye Imana akunda kuzana gusura Kibeho bagasobanurirwa amateka yaho
Ilibagiza ni umwe mu bagize uruhare kugira ngo abanyamerika babe bagiye kubaka i Kibeho Kiliziya yasabwe na Bikira Mariya
Ilibagiza yanditse ibitabo bigera ku icumi harimo ibivuga kuri Jenoside yakorewe Abatutsi nk’umwe mu bayirokotse, yandika n’ibindi bivuga kuri Bikira Mariya nk’umwana wakuze amukunda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza