Umwe ufite ingengabitekerezo ya jenoside agereranywa n’urubuto rwaboza izindi

Yanditswe na Mathias Hitimana
Kuya 12 Mutarama 2017 saa 10:40
Yasuwe :
0 0

Komisiyo y’Igihugu yo Kurwanya Jenoside irahamagarira abanyarwanda n’inshuti zabo aho bari hose ko bakwiye kurushaho gufatanya kurwanya ingengabitekerezo ya jenoside, kuko n’iyo yaba umuntu umwe uyifite yaba ameze nk’urubuto ruboze rushobora kuboza izindi.

Umuyobozi Mukuru Ushinzwe Ubushakashatsi kuri Jenoside muri Komisiyo y’Igihugu yo Kurwanya Jenoside (CNLG), Dr Jean Damascene Gasanabo, yagarutse kuri ubu butumwa bureba buri wese ubwo kuri uyu wa 11 Mutarama 2017 hatangizwaga umushinga w’isanamitima uhuriweho n’imiryango isanzwe ikora ibikorwa by’isanamitima, ubumwe n’ubwiyunge hamwe no kubaka amahoro arambye irimo KARUNA, IRDP, AEGIS TRUST na HROC (Healing and Rebuilding Our People).

Yavuze ko n’iyo yaba umuntu umwe ufite ingengabitekerezo ya jenoside akwiye kwegerwa akigishwa.

Yagize ati “Niyo yaba ari umuntu umwe ufite ingengabitekerezo ya jenoside, uwo muntu ni nk’urubuto ruri mu mufuka w’izindi mbuto, rwa rubuto ruboze rutuma izindi mbuto nazo zibora. Niyo yaba ari umwe ufite ingengabitekerezo ya jenoside tugomba kumushaka tukamwigisha agahinduka.”

Dr Gasanabo yavuze ko kurwanya ingengabitekerezo ya jenoside ari urugamba rureba abanyarwanda bose n’inshuti z’u Rwanda.

Umuyobozi Mukuru Ushinzwe Ubushakashatsi kuri Jenoside muri CNLG, Dr Jean Damascene Gasanabo

Agaruka ku ngufu CNLG ishyira mu kurwanya ingengabitekerezo ya Jenoide, yavuze ko ikoresha uburyo butandukanye burimo n’ibiganiro bitangirwa umunsi umwe muri Kaminuza 45 zo mu Rwanda.

Yakomeje agira ati “Buri tariki ya 9 z’ukwezi kwa 12 buri mwaka twatangiye igikorwa cyo kujya muri kaminuza zose zo mu Rwanda iza Leta n’izigenga tugatanga ibiganiro[…]twashyizeho na Club zo kurwanya ingengabitekerezo ya jenoside kandi tubona bitanga umusaruro.”

Mu cyumweru cyo kwibuka ku nshuro ya 22 Jenoside yakorewe Abatutsi mu Rwand, Polisi y’igihugu yataye muri yombi abantu bagera kuri 40 bakekwaho ingengabitekerezo ya Jenoside.

Tariki ya 23 Mata 2016, ubwo yifatanyaga n’abaturage bo mu Murenge wa Kibeho mu karere ka Nyaruguru, kwibuka ku nshuro ya 22 Jenoside yakorewe Abatutsi by’umwihariko abaciwe muri uyu Murenge, Minisitiri w’Intebe Anastase Murekezi, yavuze ko kuba hakiri abanyarwanda bagaragaza ibikorwa bihakana bikanapfobya Jenoside yakorewe abatutsi, hakwiye ingamba zikomeye zo kubikumira no kubirandura burundu.

Icyo gihe yavuze ko umwe mu miti yafasha kurandura burundu ingengabitekerezo ya Jenoside mu banyarwanda, ari uko abo igaragayeho bajya baburanishirizwa mu ruhame aho bakoreye ibyaha kugira ngo bibere abandi isomo ryo kureka ikibi.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244