Undi Munyarwanda ufungiye muri Uganda ashobora kwitaba Imana

Yanditswe na Musangwa Arthur
Kuya 14 Nzeri 2019 saa 01:38
Yasuwe :
0 0

Amezi asaga 16 arihiritse Abanyarwanda babiri, Emmanuel Rwamucyo Rwamukinuzi na Rutayisire Augustin, bafungiye muri Uganda mu buryo butemewe n’amategeko.

Rwamucyo na Rutayisire batawe muri yombi ku wa 26 Gicurasi 2018, bafatiwe i Mbarara mu Burengerazuba bwa Uganda, bashinjwa gutunga imbunda ariko amakuru yizewe ahamya ko ntazo bigeze batunga.

Ikindi kirego bashyizweho n’icyo kuba intasi z’u Rwanda; iki cyamaze kuba icyita rusange ku binyoma Uganda ishinja Abanyarwanda bashimutirwa ku butaka bwayo, bakanakorerwa iyicarubozo.

Aba bombi barafashwe bafungirwa ahantu hatazwi gusa ku wa 26 Werurwe 2019 bagejejwe imbere y’Urukiko rwa Gisirikare rwa Makindye.

Ubwo bagezwaga imbere y’urukiko ntibigeze bashinjwa icyaha cy’ubutasi ahubwo ibintu byarahindutse, Mukama Moses Kandiho, ushinzwe Umutekano mu gace ka Ruborogota mu Karere ka Isingiro, avuga ko Rwamucyo yagize uruhare mu mugambi w’ubujura.

Nutazi amategeko yakumva neza ko yahonyowe kuko abasivili badakwiye kuburanishwa mu Rukiko rwa Gisirikare.

Mu gukemura iki kibazo Urukiko rurengera Itegeko Nshinga rya Uganda, mu 2005 rwavuze ko inkiko za gisirikare zidafite ububasha bwo kuburanisha abasivili, byaba byitwa ko bafatanywe intwaro cyangwa batazifite. Rwongeyeho ko rutagomba kubaburanisha kuko rwashyiriweho kugenzura imyitwarire y’ingabo za Uganda, UPDF.

Nyuma y’amezi asaga atandatu, Rutayisire agaragaye mu rukiko, kuri ubu ubuzima bwe aho afungiye muri Gereza ya Luzira iri mu Mujyi wa Kampala buri mu kaga ndetse abo mu muryango we bafite impungenge ko ashobora kwitaba Imana.

Amakuru yizewe yanditswe na Virunga Post agaragaza ko Rutayisire Augustin, Umunyarwanda umwe uri mu bihumbi by’abafungiye muri Uganda amerewe nabi cyane.

Umwe mu bamubonye aho afungiye yavuze ko yakorewe iyicarubozo rihambaye ririmo gukubitwa, kwicishwa inzara no kurazwa hasi ku isima yakonjeshejwe.

Muri Gicurasi 2018, Mukama Moses Kandiho [umuvandimwe wa Brig Gen Abel Kandiho uyobora CMI] ushinzwe Umutekano mu gace ka Mbarara, nibwo yataye muri yombi abashoramari b’Abanyarwanda babiri barimo Rutayisire Augustin na mugenzi we Rwamucyo Emmanuel. Bakorewe iyicarubozo rigamije kubacunaguza.

Umwe yagize ati “Mu cyumweru gishize muri Gereza ya Luzira, Augustin ntiyari yemerewe kugera kuri matela, yararaga ku isima ikonje. Yakubiswe n’abacungagereza bimutera ibikomere mu gatuza, hafi y’urukenyerero no mu mugongo ndetse ubu arakorora agacira amaraso.’’

Amakuru yizewe avuga ko Rutayisire yakumiriwe ku gukoresha ikoranabuhanga ndetse yanyazwe telefoni yamufashaga kuganira n’umuryango we.

Muri Gicurasi uyu mwaka, Rutayisire yacuriwe umugambi wo kwicwa aho yahawe ifunguro ririmo ibice by’amacupa yasewe. Icyo gihe yagize amahirwe ajyanwa mu bitaro, agarura ubuyanja.

Abatangabuhamya bazi neza akaga Rutayisire arimo n’Abanyarwanda bafite ababo bafungiye muri gereza za Uganda, aho bahohoterwa ndetse bagafungirwa ahantu hatazwi, bagaragaza ko Uganda ifitiye urwango u Rwanda.

Byatangiye ubwo Perezida wa Uganda, Yoweri Kaguta Museveni, yatangiraga gufasha imitwe irwanya Leta y’u Rwanda igamije kuruhungabanyiriza umutekano irimo RNC ya Kayumba Nyamwasa, FLN, FDLR n’indi.

Muri Uganda kandi iyo mitwe yahawe rugari ari naho icurira imigambi yose igamije guhungabanya umutekano w’u Rwanda, yewe na Perezida Yoweri Museveni yiyemereye ubwe ko yagiranye inama na bamwe mu bagize RNC barimo Gasana Eugène Richard na Mukankusi Charlotte.

Kuva icyo gihe, ibihumbi by’Abanyarwanda bakorera ingendo muri Uganda n’abahatuye batangiye gutabwa muri yombi, bagakorerwa iyicarubozo n’ibindi bikorwa bibabaza umubiri.

Inzego z’Umutekano by’umwihariko urw’Ubutasi mu Gisirikare cya Uganda, CMI n’urushinzwe Umutekano Imbere mu gihugu (ISO) zikorana bya hafi n’abahagarariye RNC mu kuyishakira abayoboke.

Abasesenguzi bagaragaza ko zimwe mu mpamvu izi nzego zishingiraho mu guta muri yombi no guhonyora Abanyarwanda ari uburyo bwo kubemeza ku ngufu kwinjira mu mutwe w’iterabwoba wa Nyamwasa nubwo nta musaruro bitanga.

Ubuhamya bwa bamwe mu bavuye mu menyo ya rubamba muri Uganda bugaragaza ko abenshi bemeye kurenganywa bazizwa ubusa aho kwemera kwifatanya n’inyangarwanda.

Ubundi buryo bukoreshwa na CMI, ISO ifatanyije na RNC ni ukwinjira mu duce turimo Abanyarwanda bashaka urubyiruko rwo kwinjiza mu barwanyi ba Kayumba; banashaka Abanyarwanda bameze neza barimo abahinzi bakomeye, abashoramari n’abandi bafite agatubutse batanga ubufasha bw’amafaranga n’ibikoresho yo gushyigikiraibikorwa bya RNC.

Abanze gutatira igihango bafitanye n’u Rwanda cyo kutaruhemukira ni bo bisanga batangiye gutotezwa, bagakangishwa kwica, bakanihanangirizwa bikomeye.

Abarebera hafi politiki y’imibanire y’ibihugu byo mu Karere banavuga ko Abanyarwanda bandi bafatwa ari abakire bafite imitungo bafatwa kugira ngo bacuzwe utwabo, basigwe iheruheru.

Bavuga ko inzego z’umutekano za Uganda zikoresha imbaraga z’umurengera mu guhonyora uburenganzira bwabo mu cyo bise guhangana n’umwanzi wa Uganda.

Uburyo buhuriweho bukoreshwa na CMI, ISO na RNC mu kugaragaza Abanyarwanda nk’abanyamakosa ni ukubatwerera ibyaha byo ‘kuba ba maneko’, ‘kwinjira mu gihugu binyuranye n’amategeko’ no ‘gutunga intwaro bitemewe.’

Iyi turufu ni nayo isigaye inakoreshwa n’abasirikare bo ku mipaka n’abarinda abagororwa bashaka kuronka amafaranga ya ruswa bakuye mu maboko y’Abanyarwanda b’inzirakarengane.

Aha unaniwe gutanga ruswa ashobora kumara imyaka ibiri akoreshwa imirimo y’agatunambwenu irimo ubuhinzi n’ubworozi muri gereza za Kabale, Kisoro n’izindi ziri hafi y’umupaka.

Ibibazo bya Rutayisire byatangiye ubwo yavaga i Kigali muri Gicurasi 2018, yerekeza muri Uganda mu bikorwa by’ubucuruzi.

Mu buhamya bw’umugore we yavuze ko ubwo Rutayisire yari i Mbarara, yahuye n’inshuti ye Emmanuel Rwamucyo amuherekeza kuri banki aho yagombaga kubitsa miliyoni 140 z’amashilingi.

Ubwo baparikaga imodoka yabo bahise bagotwa na Moses Kandiho [umuvandimwe wa Kandiho uyobora CMI]; yababwiye ko bakekwaho uruhare mu mugambi w’ubujura, abategeka kwicara hasi, bahita batabwa muri yombi.

Moses Kandiho yahise atangira kuvugira kuri telefoni ndetse mu kanya nk’ako guhumbya, hasesekaye imodoka nini, hasohokamo abasirikare bayobowe na Maj. Mushambo ushinzwe iperereza mu Gisirikare cya UPDF.

Umwe mu bagize umuryango wa Rwamucyo yavuze ko “Kuko bari bazi neza ibyo bari gukora, bahise basanga Rwamucyo, bafata imfunguzo z’imodoka ye barayifungura.’’

Mu masegonda make amafaranga yose yari amaze kugenda. Abasirikare bahise bakora ikinamico yo gusaka imodoka ya Rwamucyo basangamo imbunda; uko ni ko ikirego cyari icy’ubujura cyahindutse icyo gutunga imbunda bitemewe.

Umugore wa Rutayisire yakomeje avuga ko aba bombi bahise binjizwa mu modoka bajyanwa muri Gereza ya Gisirikare i Mbarara aho bakubiswe bikomeye.

Bamaze ibyumweru batotezwa, baza kuhavanwa bajyanwa ku Cyicaro Gikuru cya CMI i Kampala, aho bakomeje gukorerwa iyicarubozo mbere yo koherezwa muri Gereza ya Luzira.

Rwamucyo na Rutayisire batawe muri yombi binyuranye n’amategeko. Bafashwe mu buryo buhutiyeho, basahurwa amafaranga yabo ndetse ntibahabwa ubutabera.

Umunsi umwe nibwo bajyanywe mu Rukiko rwa Gisirikare rwa Makindye baraburanishwa kandi ari abasivili, icyemezo gihabanye n’Itegeko Nshinga rya Uganda.

Ubusabe bwose bwa Ambasade y’u Rwanda muri Uganda bwo gusabira aba bashoramari guhabwa ubutabera, kwemererwa gusura bwateshejwe agaciro nkuko iki gihugu cyabigize umuco ku Banyarwanda benshi bashimutwa.

Ubuzima bwa Rutayisire bugeze ahabi nyuma yuko undi Munyarwanda aherutse guhitanwa n’ibikomere yagiriye muri gereza yafungiwemo muri Uganda.

Hategekimana Silas watawe muri yombi ku wa 25 Gicurasi 2019, afungirwa muri Uganda. Yaje kurekurwa ajugunywa ku mupaka wa Kagitumba ku wa 12 Kamena 2019. Nyuma yo kurekurwa yakomeje kubabara, anahura n’ibindi bibazo byatumye ku wa 31 Kanama 2019 yitaba Imana.

U Rwanda na Uganda biheruka gusinya amasezerano agamije guhagarika umwuka mubi uri hagati y’ibihugu byombi, yashyiriweho umukono i Luanda muri Angola, ku wa 21 Kanama 2019.

Kuva yasinywa, Uganda yatangiye kuyonona ku isegonda ya mbere kuko Abanyarwanda bakomeje gufatwa no gufungwa binyuranye n’amategeko.

Ibimenyetso bya mbere nyuma y’isinywa ry’aya masezerano ntibyabaye kubahiriza nibura imwe mu ngingo zayo, kuko Uganda yahise ifunga bimwe mu binyamakuru bikomeye byo mu Rwanda ngo bitabasha gusomwa n’abantu bari muri icyo gihugu, ivuga ko bibangamiye umutekano wayo.

I Kigali hategerejwe itsinda rizoherezwa na Guverinoma ya Uganda mu nama izahuriza hamwe ibihugu byombi ku ishyirwa mu bikorwa ry’ayo masezerano.

Gereza ya Luzira iri mu zifungirwamo Abanyarwanda benshi bafatirwa muri Uganda
Ubuzima bwa Rutayisire umaze umwaka n'amezi asaga ane afungiye muri gereza buri mu kaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza