UR-Huye Campus:Umuyobozi mushya yiyemeje ubufatanye no kutajenjekera abatubahiriza inshingano

Yanditswe na Prudence Kwizera
Kuya 16 Gashyantare 2017 saa 10:55
Yasuwe :
0 0

Umuyobozi mushya wa Kaminuza y’u Rwanda, ishami rya Huye, Dr Didace Muganga Kayihura, yavuze ko yishimiye imirimo mishya yahawe, kuko ko ari inshingano ikomeye yo kurerera igihugu, asaba abo bagiye gukorana kugira ubufatanye ndetse yiyemeje ko atazajenja imbere y’abatuzuza inshingano zabo.

Yabigarutseho kuri uyu wa Gatatu tariki ya 15 Gashyantare 2017, mu muhango w’ihererekanyabubasha wabaye hagati ye na Dr. Uster Kaitesi asimbuye kuri uwo mwanya, nyuma yuko na we ahawe inshingano nshya zo kuba Umukuru wungirije w’Urwego rw’Igihugu rw’Imiyoborere, RGB.

Dr Kayihura yatangaje ko icyo ashyize imbere ari ubufatanye no kutajenjekera abatubahiriza inshingano.

Yagize ati “Icyo nabasabye ni ukumva ko tugomba gukora nk’ikipe, tukajya inama umwe akumva undi, kandi akamukosora igihe bibaye ngombwa, mbese tukiyumvanamo nta kwishishanya. Ntibakwiye kuntinya bavuga ngo wowe uri umuyobozi ntacyo tukubwira, ariko nanjye nabibabwiye ku ikubitiro ko aho nzabona utana, atuzuza inshingano, bitazankundira ko mbiceceka nzamukosora”.

Bamwe mu banyeshuri biga muri iyo Kaminuza basabye umuyobozi mushya bahawe kuzita ku kibazo cya serivise kuko itifashe neza.

Emmanuel Rwigema wiga mu mwaka wa gatatu mu icungamutungo ati “Akabazo nifuza ko azadukemurira, abayobozi baduhaye bari munsi ya ‘Principal’ ntabwo bakunda kumva ibibazo byacu, ujya kubabwira ikibazo ufite bakakwereka ko nta mwanya bafite, ntabwo batwegera kandi natwe iyo tubegereye ntabwo bashaka kutwumva”.

Dr Uster Kaitesi mu ijambo rye yashimiye aabakozi bose bakoranye muri UR-Huye Campus, yemeza ko nubwo yahawe izindi nshingano umwuga wo kurera azawukomeza, agira inama uwamusimbuye yo kwegera abanyeshuri no kuba hafi y’abandi bakozi kandi akumva n’inama zabo.

Dr Kaitesi ati “Namugira inama yo kujya aganira n’abakozi, kuko abakozi ni abantu, ningombwa rero kuganira n’abakozi, abanyeshuri n’abandi bose. Ikindi ni ugutera umwete abarimu, abarimu bacu baritanga kenshi ariko hari ubwo ubona badahari cyane kugira ngo babere abana urumuri rukwiye, batange ingero nziza ku banyeshuri bari kurera”.

Dr Didace Muganga Kayihura wahawe inshingano zo kuyobora Kaminuza y’u Rwanda ishami rya Huye yari asanzwe ari umwarimu muri Kaminuza y’u Rwanda mu ishuri ry’amategeko, akaba no mu Rugaga rw’Abavoka.

Afite imyabumenyi y’ikirenga (PhD) mu bijyanye n’amategeko yakuye muri Kaminuza ya Utrecht yo mu Buholandi.

Ihererekanyabubasha hagati ya Dr Kayihura na Dr Kaitesi ryayobowe n’Umuyobozi mukuru wungirije wa Kaminuza y’u Rwanda, Prof Philip Cotton.

Dr Didace Muganga Kayihura, Umuyobozi mushya wa Kaminuza y'u Rwanda, ishami rya Huye
Dr Uster Kaitesi
Prof Philip Cotton ni we wayoboye umuhango w'ihererekanyabubasha

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza