Urubyiruko rufite imishinga itanga ibisubizo hakoreshejwe ikoranabuhanga rurahatanira miliyoni 10 Frw

Yanditswe na Mukaneza M.Ange
Kuya 12 Ukuboza 2017 saa 04:30
Yasuwe :
0 0

Umuryango Mpuzamahanga w’Ibihugu bikoresha ururimi rw’Igifaransa, OIF, ku bufatanye na KLab, batangije amarushanwa yo gukora porogaramu za mudasobwa ku rubyiruko rufite imishinga itanga ibisubizo, aho igihembo nyamukuru ku bazatsinda kingana n’ibihumbi icumi by’ama-euro asaga gato miliyoni 10 z’amafaranga y’u Rwanda.

Muri aya marushanwa yatangiye kuri uyu wa 12 Ukuboza 2017, imishinga 58 yatanzwe n’urubyiruko niyo iri guhatana. Ikaba yaratoranyijwe muri 250 yari yandikishijwe.

Mu muhango wo gutangiza ku mugaragaro aya marushanwa yiswe ‘Innovathon Francophonie (Innovation Marathon)’, Umuyobozi w’Ikigo LabFrancophone kibarizwa muri OIF, Arame Diaw, yavuze ko iki gikorwa kigiye kuba ku nshuro ya kabiri, kikaba cyaratangiriye muri Togo muri Gicurasi 2017.

Yakomeje avuga ko iki gikorwa cyatangiye nyuma y’uko byemejwe mu nama y’abakuru b’ibihugu na za guverinoma bikoresha igifaransa yabaye mu 2014, aho bagaragaje ubushake bwo gushyigikira no guteza imbere impano z’abagore n’urubyiruko.

Ati “Ikigamijwe ni uguha agaciro ubushake no guhanga udushya ku bagore n’urubyiruko bo mu bihugu bivuga igifaransa. Ikindi ni ukubaha ubushobozi bushingiye ku mafaranga buzatuma babasha kuba umusemburo w’iterambere mu bihugu byabo.”

Diaw yavuze ko imishinga iri guhatana ari ikoresha ikoranabuhanga mu gutuma abaturage bagera ku mazi meza n’isuku, kubona ingufu z’amashanyarazi kandi zihendutse, gufasha abarobyi bato kugera ku masoko, ndetse no gufasha abaturage kwihaza mu biribwa no gukora ubuhinzi burambye.

Umuyobozi Mukuru wa KLab, Mutangana Aphrodice, yavuze ko mu gihe cy’icyumweru cyose uru rubyiruko ruzubaka porogaramu zarwo binyuze mu matsinda, buri munsi hakazajya hagira amatsinda asezererwa kugeza hasigaye abahize abandi.

Imishinga itatu niyo izegukana ibihembo bizatangwa ku cyumweru, uwa mbere ukazahabwa 10 000 by’ama-euros mu gihe uwa kabiri uzahabwa 6 000 by’ama-euros, n’aho uwa gatatu ugahabwa 4 000 by’ama-euros. Uretse ibi kandi abatsinze bazamara umwaka wose bafashwa na KLab kunonosora porogaramu zabo ku buryo bazibyazamo ubucuruzi.

Umuyobozi Mukuru wa KLab, Mutangana Aphrodice, yavuze ko mu gihe cy’icyumweru cyose uru rubyiruko ruzubaka porogaramu zarwo binyuze mu matsinda / Ifoto: Africa Tech

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza