Urugo mbonezamikurire rwatanze impinduka mu bana bari bafite imirire mibi

Yanditswe na Emma-Marie Umurerwa
Kuya 28 Mata 2019 saa 10:36
Yasuwe :
0 0

Ababyeyi b’abana bafite ikibazo cy’imirire mibi batangaza ko kubajyana mu bigo mbonezamikurire byatanze impinduka mu buzima bwabo.

Mu myaka ibiri ishize nibwo Leta y’u Rwanda yafashe icyemezo cyo kubaka mu duce dutandukanye tw’igihugu ibigo mbonezamikurire by’icyitegererezo mu rwego rwo guhangana n’ikibazo cy’imirire mibi ndetse no kugwingira byagaragara mu bana 38% bari munsi y’imyaka itandatu.

Bamwe mu babyeyi b’abana bari bafite ikibazo cy’imirire mibi harimo n’abagwingiye mu Murenge wa Nyarugunga mu Karere ka Kicukiro, bahamya ko Ibigo mbonezamikurire hari icyo byahinduye.

Mujawayezu Flora ni umwe muri bo yagize ati “Umwana wanjye kubera gucuka imburagihe yari afite ikibazo cy’imirire mibi. Ndibuka ko namuzanye hano umusatsi utangiye gucurama. Twarahageze batwigisha uko bategura indyo yuzuye, ndabikora none umwana ubona ko mu myaka itanu y’amavuko afite ntaho atandukaniye n’abandi bangana.”

Uwamahoro Claudette nawe ngo yari afite umwana ufite ikibazo cy’imirire mibi hamwe n’undi wagwingiye.

Mu buhamya bwe avuga ko “kubera imibereho mibi abana banjye babiri bari bafite ikibazo cy’imirire mibi, harimo umwe namenye ko yagwingiye ngeze mu Kigo Mbonezamikurire kubera ko adakora nk’ibyo abana bari mu kigero kimwe bakora. Nyuma yo kutwigisha uko bategura indyo yuzuye n’uburyo umwana arerwa, hari byinshi byahindutse.”

Umuhuzabikorwa wa gahunda y’Amarerero (Early Childhood Development:ECD) muri Nyarugunga, Massion Jean de Dieu, yatangaje ko icyo kigo gifite abana 120 bari hagati y’imyaka itatu n’itandatu gikurikirana, abandi bari munsi y’imyaka itatu bagakurikiranirwa mu ngo iwabo.

Ati “Twita ku burezi, usuku, imirire ndetse n’umutekano. Ibyo dukora ku bana tubikora no ku babyeyi tukabigisha isuku, gutegura indyo yuzuye, kubigisha uko bakora uturima tw’igikoni n’ibindi. Ibyo tubigisha byatumye habaho impinduka zigaragara ku bana dukurikirana umunsi ku munsi hano muri ECD Nyarugunga.”

Massion akomeza avuga ko iyo bagize umwana basanga afite ikibazo cyihariye bamwohereza ku Kigo Nderabuzima cya Nyarugunga cyangwa ku bitaro bya Kanombe.

Umukozi ushinzwe imibereho myiza y’abaturage mu Murenge wa Nyarugunga mu Karere ka Kicukiro, Kineza Bola Josiane, ahamya ko ECD Nyarugunga yazanye impinduka mu buzima bw’abana bo mu miryango itishoboye batuye muri uyu Murenge.

Naho Umukozi wa Porogaramu mbonezamikurire y’abana bato, ushinzwe abana, Kayitare Immaculée, atangaza ko ababyeyi bakwiye kwita ku buzima bw’abana cyane cyane abari munsi y’imyaka ibiri.

Ati “Abana 17% bari munsi y’imyaka itandatu nibo babona serivisi za ECD mu bigo mbonezamikurire 3971 biri hirya no hino mu gihugu kandi ubona ko hari impinduka zigaragara byagize ku buzima bwabo.”

Ubushakashatsi bwakozwe na Minisiteri y’Uburinganire n’Iterambere ry’Umuryango mu 2017, bwagaragaje ko ECD zirererwamo abana 246.580. Ni ukuvuga 10.645 (bari munsi y’imyaka itatu) naho 235,946 (bari hagati y’imyaka itatu n’itandatu).

Naho Ubushakashatsi bwa UNICEF bwo mu 2014 bwerekanye ko 63% by’abana mu Rwanda aribo bafite imikurire myiza n’ubushobozi bwo kwiga neza.

Umuhuzabikorwa wa ECD Nyarugunga, Massion Jean de Dieu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza