Urukiko rw’ikirenga rwishimiye ko nta mukandida n’umwe mu matora waruregeye

Yanditswe na Evariste Nsengimana
Kuya 9 Kanama 2017 saa 11:05
Yasuwe :
0 0

Perezida w’Urukiko rw’ikirenga, Prof Sam Rugege, yashyikirijwe raporo z’agategenyo z’indorerezi ku matora ya Perezida wa Repubulika yo ku wa 4 Kanama 2017, yishimira ko kugeza ubu nta kirego na kimwe kirakirwa kiregerwa ku matora.

Izo raporo yashyikirijwe kuri uyu wa 8 Kanama 2017, zirimo iya Sosiyete Sivile Nyafurika (MOESCA) n’iy’indorerezi z’Abanya-Afurika batuye i Burayi (African Diaspora in Europe).

Raporo z’ibanze z’izi ndorerezi zigaragaza ko uhereye ku myiteguro y’amatora no mu matora nyirizinakugeza hatangajwe ibyavuyemo by’agateganyo, byakozwe mu mucyo kandi byubahirije amahame ya Demokarasi.

Mu biganiro izo ndorerezi zagiranye na Prof. Sam zatangaje ko u Rwanda ari gihugu gikwiye kubera ibindi isomo ku bijyanye no gutegura ndetse no gutora abayobozi.

Umuyobozi w’indorerezi z’Abanya-Afurika batuye i Burayi, Amokon Eba, yabwiye RBA ko amatora yo mu Rwanda ashimangira ko ubuyobozi na demokarasi ko ari iby’abenegihugu ndetse ko imbuto basoroma kuri Perezida Kagame ari igisobanuro kigaragaza ko bakimukeneye.

Yagize ati “Ubutegetsi ni ubw’abaturage, demokarasi se ni iki? uburengerazuba bufite demokarasi yabwo, abanyafurika natwe tukagira iyacu kandi demokarasi, ubutegetsi ni iby’abaturage namwe murabyumva. Abanyarwanda bafashe icyemezo, baravuga bati ‘umuyobozi wacu nyuma ya Jenoside yakorewe Abatutsi yadukoreye ibi byose bityo niba manda ye yarangiye tumwongere amahirwe asoze ibyo agomba kutugezaho. Ntimwite ku bivugwa n’ibihugu byo mu Burengerazuba bw’Isi, nibo baducamo ibice.”

Bimwe mu byakunzwe kugarukwaho n’ibihugu by’amahanga izo ndorereiz zinenga, harimo kuba bivuga ko abanyarwanda bari bafite ubwoba mu gihe cy’imyiteguro no mu matora.

Amokon yakomeje asobanura ko Kagame yamenye kare umugambi w’ibihugu byo mu Burengerazuba bw’Isi ahitamo gushyira imbere inyungu z’abanyafurika.

Yongeye ati “Vuba aha Perezida Kagame niwe uzaba uyoboye Umuryango wa Afurika yunze Ubumwe, twishimiye ko urubyiruko rwa Afurika ruzigira ku bunararibonye bwe azanabugeza kuri Afurika”

Perezida w’Urukiko rw’Ikirenga, Prof Sam Rugege, yavuze ko izo raporo z’indorerezi zizafasha gukemura utubazo duke tujyanye n’amatora nubwo nta gushidikanya ko tutazigera tugaragara bitewe n’uko abanyarwanda baba biteguye neza ibikorwa byo gutora.

Yashimye ko kugeza uyu munsi nta kirego na kimwe Urukiko rw’ikirenga rurakira kijyanye n’imigendekere y’amatora.

Yagize ati “Nkatwe nk’Urukiko rw’ikirenga twakabaye twitegura imanza ku kuburanisha ibitaragenze neza mu matora. Niko bikunze kugenda mu bihugu bimwe byo muri Afurika. Ahandi bashyiraho abacamanza bihariye kuko baba bazi ko byanze bikunze ko hagomba kubaho imvururu no kutumvikana ku byavuye mu matora ariko mu Rwanda tugira amahirwe ko ari igihugu gitekanye, uko amatora yacu yagenze neza nk’uko indorerezi zabivugaga, tukaba tutiteze ibindi bibazo bizavuka bivuga ku matora.”

Amategeko y’amatora ategenya ko Urukiko rw’ikirenga rushobora kwakira ibirego birebana n’amatora mu gihe kitarenze amasaha 48 nyuma y’uko Komisiyo y’Igihugu y’amatora itangaje by’agategenyo ibyavuye mu matora.

Umuyobozi w’indorerezi z’Abanya-Afurika batuye i Burayi, Amokon Eba ashyikiriza raporo Perezida w’Urukiko rw’ikirenga, Prof Sam Rugege (Ifoto/ TNT)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza