Urukiko rwanzuye gukora iperereza ku buryo Col. Byabagamba na Rtd. Brig. Gen. Rusagara bafunzwemo

Yanditswe na Ferdinand Maniraguha
Kuya 31 Gicurasi 2019 saa 02:01
Yasuwe :
0 0

Urukiko rw’Ubujurire rwafashe umwanzuro wo gukora iperereza ku buryo Col. Tom Byabagamba wigeze kuyobora Umutwe w’Ingabo urinda abayobozi bakuru, Brig. Gen. (rtd) Frank Rusagara na Sgt. (rtd) Kabayiza François bafunzwemo, nyuma yo kurutakambira bavuga ko bafunzwe mu buryo bunyuranyije n’amategeko.

Muri Werurwe 2016 Col. Byabagamba yakatiwe gufungwa imyaka 21 no kwamburwa impeta zose za gisirikare; Rtd. Brig. Gen. Frank Rusagara ahanishwa gufungwa imyaka 20 mu gihe Rtd. Sgt. Kabayiza François we yakatiwe gufungwa imyaka itanu anacibwa ihazabu y’ibihumbi 500.

Ni nyuma yo kubahamya ibyaha birimo gukwiza nkana ibihuha, gusebya leta no gutunga imbunda binyuranyije n’amategeko.

Mu iburanisha ruherutse, Ubushinjacyaha bwatangiye busaba urukiko kutakira ubujurire bw’abaregwa buvuga ko bwatanzwe igihe kigenwa n’amategeko cyararenze, abaregwa nabo batanga inzitizi y’uko barekurwa by’agateganyo bakaburana bari hanze, kuko bafunzwe mu buryo bunyuranyije n’amategeko.

Abaregwa bagaragaje ko bafungiwe muri gereza itemewe kandi bafungiwe mu kato, bitandukanye n’ibyo bategetswe ku buryo byagize ingaruka ku buzima bwabo.

Kuri uyu wa Gatanu nibwo urukiko rwafashe umwanzuro ku nzitizi zatanzwe n’ababurana. Urukiko rwasanze inzitizi yatanzwe n’Ubushinjacyaha bwa gisirikare yo kutakira ubujurire nta shingiro ifite.

Rwemeje ko mbere yo gufata icyemezo ku nzitizi zatanzwe n’abaregwa yo gufungurwa by’agateganyo mbere y’uko urubanza ruburanishwa mu mizi, urukiko ruzabanza gukora iperereza aho bafungiye.

Umucamanza yavuze ko iburanisha rizongera gufungurwa kuwa 13 Kamena 2019 saa mbili n’igice za mu gitondo kugira ngo ababuranyi bagire icyo bavuga ku byavuye mu iperereza rizaba ryamaze gukorwa n’urukiko.

Icyakora, umucamanza yemeje ko iburanisha mu mizi rizakomeza kuwa 05 Kamena 2019 saa tatu n’igice za mu gitondo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza