UTB na RMI bagiye gufatanya mu bijyanye n’ubushakashatsi

Yanditswe na Emma-Marie Umurerwa
Kuya 17 Gicurasi 2019 saa 10:21
Yasuwe :
0 0

Kaminuza y’Ubukerarugendo, Ubucuruzi n’Ikoranabuhanga (UTB) n’Ikigo cy’Igihugu cy’Amahugurwa mu by’Imicungire y’Abakozi n’Umutungo (Rwanda Management Institute, RMI), basinyanye amasezerano y’ubufatanye yitezweho gushimangira imikoranire mu byiciro bitandukanye birimo n’ubushakashatsi.

Umuyobozi wa UTB, Dr Kabera Callixte, yavuze ko aya masezerano agamije guteza imbere umuco wo gusangizanya ubumenyi mu byiciro bafitemo uburanaribonye muri gahunda z’amasomo, kwihangira umurimo, guhanga udushya, uburinganire n’iterambere.

Ati “Aya masezerano agiye kudufasha ku mugaragaro gushyira mu bikorwa ubufatanye hagati y’ibi bigo bibiri, mu bijyanye n’uburanararibonye buri kigo gifite. Ubu bufatanye bufunguye amarembo kuko buzafasha abanyeshuri mu bijyanye n’ubushakatsi bukorwa ku mpande zombi ndetse no kumenya ku buryo bwisumbuyeho gahunda za Guverinoma.”

Yakomeje avuga ko ishyirwa mu bikorwa ry’amasezerano rigamije gushyigikira no guteza imbere ubumenyi bujyanye n’ubukungu igihugu cyiyemeje guhitamo.

Umuyobozi Mukuru wa RMI, Gasamagera Wellars, yavuze ko basanzwe bagirana amasezerano n’ibigo na kaminuza zitandukanye.

Ati “Iyi Kaminuza twayihisemo kubera ko ireba imyuga runaka kandi ikenewe cyane ku isoko ry’umurimo. Abarangije kwiga hano bahita bajya mu kazi, natwe rero turabakurikirana kugirango twongere tubahugure kuko iyo ukoze akazi imyaka ibiri ntugire ibishya wiyungura ubwenge buragimba. Tuzafatanya cyane mu bijyanye n’ubushakashatsi.”

Yakomeje avuga ko ubushakashatsi bazafatanya na UTB ari ubujyanye no kureba imikorere y’ibigo runaka ndetse n’icyo ibyo bigo byakora kugirango birusheho gutanga umusaruro n’ubundi butandukanye bitewe n’icyo buri rwego ruzaba rushyize imbere.

Iyi kaminuza yashinzwe mu mwaka wa 2008. Ifite abanyeshuri basaga 6000, abenshi biga mu ishami rya Kigali naho 1900 biga mu rya Rubavu.

Gasamagera Wellars uyobora RMI ashyira umukono ku masezerano
Dr Kabera ashyira umukono ku masezerano
Umuyobozi wa UTB, Dr Kabera Callixte amaze gushyira umukono ku masezerano y'ubufatanye na RMI
Uyu muhango witabiriwe n'abakozi ba UTB hamwe n'aba RMI

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza