UTB yahaye impamyabumenyi abarenga 600 ibahishurira ibanga rizabafasha kuzibyaza umusaruro

Yanditswe na Evariste Nsengimana
Kuya 7 Gicurasi 2019 saa 08:32
Yasuwe :
0 0

Kaminuza y’Amahoteli, Ubukerarugendo, Ikoranabuhanga n’Ubucuruzi (UTB), yahaye impamyabumenyi abanyeshuri 663 barangije amasomo mu byiciro bitandukanye, ibahishurira ko ibanga ryo kuzibyaza umusaruro ari ugukunda umurimo.

Abo banyeshuri barimo 473 barangije icyiciro cya kabiri cya kaminuza, na 190 barangije muri gahunda y’imyuga n’ubumenyingiro.

Ibirori byabereye muri Kigali Convention Centre ku wa 7 Gicurasi 2017, byafatanyijwe no guha abanyeshuri 1207 icyemezo cy’uko bahuguwe amasomo y’ikoranabuhanga.

Byitabiriwe n’inzobere mu burezi, abanyeshuri, imiryango n’inshuti zabo, abafatanyabikorwa ba UTB n’abandi.

Perezida wa UTB ari nawe wayishinze, Zulfat Mukarubega, yashimiye Perezida Kagame ku bwitange yagize mu kuzamura iterambere ry’u Rwanda no guhesha agaciro umugore ari nabyo byamufashije kugera aho ageze.

Yabwiye abasoje amasomo ko nubwo barangije amasomo, urugamba rukomeye ari urwo basigaje rwo guhashya ubukene mu gihugu no kugiteza imbere bazageraho bashyira mu bikorwa imyuga bize muri UTB.

Ati “Kugira ngo mubigereho ni ugukunda umurimo. Utakunze umurimo ntacyo wageraho. Hari ukuba indashyikirwa, gukora cyane amasaha menshi ukaryama macye. Hari ukuba inyangamugayo kuko utabaye yo ntacyo wageraho.”

Yakomeje agira ati “Murasabwa byinshi nk’urubyiruko, ubu ni mwebwe Rwanda rw’ejo. Nkuko mwize muri UTB uburyo mwihangira imirimo ariko burya iyo ukora byiza hari inkunga uba uteye igihugu. Mu mikorere muzage munoza ibyo mukora. Utanogeje ibyo ukora, niyo wakwigangira imirimo ntacyo wageraho."

Senateri, Prof. Nkusi Laurent, yavuze ko ubumenyi abarangije bakuye muri UTB yizeye ko buhagije mu kubafasha guhangana n’ibibazo bahura nabyo no gufasha Leta muri gahunda zo kwihutisha iterambere rirambye.

Umuyobozi mukuru wa UTB, Dr Callixte Kabera, yashimiye abagize uruhare kugira ngo uyu muhango ugerweho harimo abanyeshuri, abarezi n’abandi bafatanyabikorwa babafashije kubona aho bimenyereza umwuga.

Dr. Kabera yavuze ko umwihariko w’abarangije uyu mwaka ari uko uretse kuba bahawe impamyabumenyi z’amasomo bize, bose banafite ibyemezo by’uko bize kandi bashoboye gukoresha ikoranabuhanga, gitangwa n’ikigo mpuzamahanga cya ICDL.

Ati “Nizeye neza ko UTB yabahaye ubumenyi n’ibitekerezo bikenewe byo guhangana n’ibibazo mushobora kuzahura nabyo mu rugendo rwanyu."

Dr. Kabera yavuze ko guhabwa impamyabumenyi ari igikorwa bagezeho nyuma y’urugendo rurerure bakoze biga ariko bakarwitwaramo neza ariko ko bagikeneye gukomeza kongera ubumenyi.

Ati “Ariko nanone si iherezo ry’urugendo rwanyu rwo kwiga kuko mukeneye ubumenyi bwinshi bibafasha mu gufata ibyemezo bitandukanye. Ni muri urwo rwego UTB yitegura gusaba inama nkuru y’amashuri makuru na Kaminuza gutanga amasomo y’icyiciro cya gatatu cya kaminuza.”

Abahawe impamyabumenyi bavuze ko bishimiye intambwe bateye nyuma y’igihe kitari cyoroshye bifuza kubona izo mpamyabumenyi.

Ishimwe Olive urangiye mu masomo y’ubukerarugendo n’amahoteli yabwiye IGIHE ati “Nishimiye iyi ntambwe mbashije gutera. Ndashimira UTB ku bumenyi yampaye kandi nizeye ko buzamfasha mu guhangana n’ibibazo byugarije urubyiruko birimo ubushomeri.”

Muri uyu muhango abanyeshuri bahize abandi babishimiwe. Bahawe ikirango cy’uko bitwaye neza n’ibindi bihembo byatanzwe n’abafatanyabikorwa ba UTB birimo mudasobwa, amatike y’indege n’ibindi bikoresho.

UTB kandi yashimiye abafatanyabikorwa bayo bafasha abanyeshuri mu kwiga, ivuga ko ari umusanzu ukomeye batera mu burezi.

Kuva mu 2008, UTB imaze gutanga impamyabumenyi n’impamyabushobozi ku banyeshuri barenga 4600; muri bo abasaga 85% yarabakurikiranye isanga babonye akazi mu bigo bitandukanye ndetse barimo n’abashinze ibigo birenga 73 mu rwego rwo kwihangira imirimo.

UTB ifite abanyeshuri basaga 6000, abenshi (4 900) biga mu ishami rya Kigali naho 1900 biga mu rya Rubavu.

Abanyeshuri bahawe impamyabumenyi harimo n'abasaga 1200 bahuguwe ikoranabuhanga na IDCL
Bamwe mu bahagarariye ibigo by'amashuri makuru na kaminuza bitabiriye umuhango wo gutanga impamyabumenyi muri UTB
Bamwe mu bize iby'amahoteli n'ubukerarugendo
Mu bahawe impamyabumenyi harimo abize amasomo y'ubukungu n'ikoranabuhanga
Abanyeshuri bari babukereye baherekejwe n'imiryango yabo
Abayobozi ba UTB bagiye gutangiza umuhango
Dr. Kabera yavuze ko kaminuza ayobora yahaye abarangije ubumenyi buzabafasha
Perezida wa UTB akaba ari nawe wayishinze, Mukarubega Zulfat
Umuyobozi wa UTB, Dr. Kabera Callixte ari gutanga impanuro
Itorero ry'umujyi wa Kigali ryasusurukije abantu ryari rifite indege nk'ikimenyetso cyo gushishikariza abantu kwihangira umurirmo bagamije guteza imbere igihugu
Ibirori byabereye muri Kigali Convention Centre

[email protected]

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza