UTC yaguzwe asaga miliyari esheshatu mu cyamunara

Yanditswe na Cyprien Niyomwungeri
Kuya 25 Nzeri 2017 saa 05:11
Yasuwe :
0 0

Umuhesha w’Inkiko, Me Habimana Vedatse, yagurishije mu cyamunara inyubako ya UTC (Union Trade Center) y’umuherwe Rujugiro Ayabatwa Tribert iherereye mu Mujyi wa Kigali, kuri Miliyari esheshatu, miliyoni 877 n’ibihumbi 150 z’amafaranga y’u Rwanda.

UTC ni umwe mu mitungo yari iherutse gushyirwa ahagaragara nk’ibereyemo Leta imisoro. Ikigo cy’Imisoro n’Amahoro cyari giherutse gutangaza ko kiberewemo miliyari imwe na miliyoni 200, yararanye kuva mu 2007 kugera mu 2013 hiyongereyeho n’amande y’ubukererwe.

Igiciro fatizo cya miliyari esheshatu na miliyoni 639, ibihumbi 636 n’amafaranga 336 y’u Rwanda niyo yahereweho muri iki cyamunara. Hari hiyandikishije abantu n’ibigo 11 nk’abifuza kwegukana iyi nyubako ariko ibigo bibiri ari byo Kigali Investment Company; Four Unity Company n’undi witwa Kanyandekwe Pascal wapiganwaga ku giti cye nibo bahataniye kuyegukana. Muri aba, uwapiganwe bwa mbere ni Four Unity Company, abandi barakurikira.

Icyamunara cy’iyi nyubako cyabereye mu ruhame ku gicamunsi cyo kuri uyu wa Mbere guhera saa munani z’amanywa. Abashaka kuyigura bapiganwaga, umwe avuga ingano y’amafaranga yayigura, undi akayarenzaho bityo bityo.

Ikigo Kigali Investment Company limited nicyo cyabashije kwegukana iyi nyubako nyuma yo gutanga Miliyari esheshatu, miliyoni 877 n’ibihumbi 150 gihigitse abandi bari bagaragaje inyota yo kuyegukana.

Abo barimo; Four Unity Company Limited warushijwe miliyoni 10 z’amafaranga y’u Rwanda ku yatanzwe na KIC, na Kanyandekwe wavuyemo agejeje kuri miliyari esheshatu, miliyoni Magana arindwi mirongo ine na zirindwi n’ibihumbi ijana na mirongo itanu (6 747 150 000 Frw).

Nyuma ya cyamunara, umuhesha w’inkiko, Me Habimana, yasobanuye ko abaguze batanze sheki bityo bakaba batagomba kurenza ejo kuwa Kabiri batagejeje amafaranga kuri konti icungwa na Leta, ngo babone guhabwa icyangombwa cy’uko baguze muri cyamunara begukane umutungo wabo baguze.

Yagize ati “Amafaranga namara kugera kuri konti tuzakora raporo tumenyeshe ikigo cy’Igihugu cy’imisoro n’amahoro (RRA) ko gifata amafaranga yacyo hanyuma agomba kujya ahandi tuhavuge aho agomba kujya.”

Yakomeje asobanura ko igiciro fatizo bakigennye bahereye ku giciro abahanga mu byo gusuzuma agaciro k’inyubako bayihaye.

Rudasingwa James umwe mu bashoramari 10 bahuriye mu kigo cya KIC (Kigali Investment Company Limited), cyegukanye UTC, yatangaje ko cyatangiye mu 2006 kigatangirana no kubaka inyubako ya Kigali City Market izwi nk’isoko rya Nyarugenge n’izindi.

Yahumurije abasanzwe bakodesha muri iriya nyubako, avuga ko ubunararibonye basanganywe buzatuma bakomeza kubafata neza.

Yagize ati “Bitewe n’ubunararibonye dufite, iyi nzu izafasha kugira ngo umusaruro twabonaga wiyongere bifashe na Leta kubona indi misoro dore ko yagurishijwe kubera imisoro itatangwaga, no guha abantu benshi akazi.”

Rudasingwa yavuze ko UTC izaguma kuba inzu y’ubucuruzi nk’ibisanzwe, ariko ntiyatangaza niba bari bafata icyemezo cyo kuyivugurura cyangwa kuyirekera uko isanzwe yubatse.

Rujugiro afite imigabane 97% naho abandi banyamigabane bane bakagabana 3% mu muturirwa ‘UTC’ uri mu Mujyi wa Kigali, Akarere ka Nyarugenge. Imigabane ya Rujugiro muri UTC yacungwaga na Komisiyo y’Akarere ka Nyarugenge ishinzwe gucunga imitungo yasizwe na bene yo nk’uko itegeko ryo muri Kanama, 2015 ribiteganya.

Imigabane ya Rujugiro muri UTC yatangiye gucungwa na leta mu Ukwakira 2013 nk’umutungo wasizwe na benewo kuko Rujugiro yari amaze kuva mu gihugu kandi nta muntu asigiye uburenganzira bwemewe n’amategeko bwo kuwucunga.

Itegeko ryo muri Kanama 2015 ku micungire y’imitungo yasizwe na beneyo riha uburenganzira leta bwo gucunga imitungo yose itimukanwa cyangwa yimukanwa iri mu maboko y’abatayifitiye uburenganzira, beneyo bakaba barapfuye kandi nta muntu uriho wo kubazungura wemewe n’amategeko cyangwa batari mu Rwanda kubera impamvu zinyuranye kandi bakaba ntawe basize wo kuyicunga ubifitiye uburenganzira.

Iyo mitungo yashyizwe mu maboko ya za komisiyo zihariye mu turere, kuri ubu Akarere ka Nyarugenge kakaba gacunga imitungo igera kuri 70 irimo inzu 67 n’ibibanza bitatu. Aka karere kamaze gusubiza imitungo itandatu beneyo mu yo kacungaga.

Umuhesha w’Inkiko, Me Habimana Vedatse asobanura uko cyamura iri bukorwe
Umuyobozi mukuru w'Ikigo cya KIC (Kigali Investment Company Limited), cyegukanye UTC
Rudasingwa James umwe mu bashoramari 10 bahuriye mu kigo cya KIC (Kigali Investment Company Limited) cyegukanye UTC, Karangwa Gashabana Paul
Uwapiganwaga ku ruhande rwa Four Unity Company
Umuhesha w’Inkiko, Me Habimana Vedatse asinyira ko UTC iguzwe mu cyamunara

Amafoto : Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza