Uwari Gitifu wa Nyabimata yaregeye indishyi mu rubanza rwa Nsabimana ‘Sankara’

Yanditswe na IGIHE
Kuya 17 Mutarama 2020 saa 12:03
Yasuwe :
0 0

Nsabimana Callixte wiyise Sankara wahoze ari umuvugizi w’umutwe witwara gisirikare wa FLN, kuri uyu wa Gatanu yasubiye mu rukiko, mu rubanza rwe haboneka uwaregeye indishyi z’ibyangijwe n’ibikorwa by’umutwe yari abereye umuvugizi.

Nsabimana wafatiwe muri Comores mu mwaka ushize, aregwa ibyaha 16 birimo Iremwa ry’umutwe w’ingabo ritemewe, Icyaha cy’iterabobwoba ku nyungu za politiki, gukora no kugira uruhare mu bikorwa by’iterabwoba, gutanga amabwiriza mu gikorwa cy’iterabwoba, kuba mu mutwe w’iterabwoba, icyaha cyo kugambana no gushishikariza abandi gukora iterabwoba, ubwicanyi n’ubwinjiracyaha bw’ubwicanyi.

Aregwa kandi gufata bugwate, gukwiza amakuru atariyo cyangwa icengezamatwara rigamije kwangisha leta y’u Rwand amu bihugu by’amahanga, guhakana Jenoside, kwiba yitwaje intwaro, gutwika, kugirana umubano na leta y’amahanga hagamijwe gushoza intambara, gukora cyangwa gukoresha impapuro mpimbano, gukubita no gukomeretsa ku bushake no gutanga, kwakira no gushishikariza kwakira ibikomoka ku iterabwoba.

Nsabimana wari umuvugizi w’umutwe wa FLN wigambye ibitero byagiye bigabwa mu gice cyegereye Pariki y’Igihugu ya Nyungwe, kuri uyu wa Gatanu yari imbere y’Urukiko Rukuru, mu rugereko ruburanisha ibyaha Mpuzamahanga n’ibyambukiranya imbibi ruri i Nyanza.

Iburanisha ryaherukaga gusubikwa ku wa 24 Ukuboza 2019, nyuma y’uko ubushinjacyaha bugaragaje ko bwamenye amakuru ko muri dosiye ya Nsabimana hajemo abandi bakekwaho gukorana na we barimo uwitwa Private Muhire Dieudonné, bityo bwifuza ko habanza gukurikiranwa neza iyo dosiye hakamenyekana niba koko ifitanye isano n’iya Nsabimana kugira ngo urubanza ruzaburanishirizwe hamwe.

Nk’uko RBA yabitangaje, Ubushinjacyaha kuri uyu wa Gatanu bwatangaje ko nyuma y’iperereza ryakozwe rishingiye ku isesengura ry’imanza zombi, bwasanze ihuriro riri hagati ya Nsabimana na Private Muhire ari uko bari mu mutwe umwe wa MRCD na FLN gusa.

Ubushinjacyaha bwavuze ko urukiko rukuru ari rwo rugomba kuburanisha Nsabimana Callixte na ho Private Muhire akaburanishwa n’urukiko rwa Gisirikare.

Urukiko rwatangiye iburanisha rutinzeho gato nyuma yo kugaragarizwa umwe mu baregeye indishyi z’akababaro yatewe n’ibitero byagabwe n’inyeshyamba za FLN.

Uyu ni uwari Umunyamabanga Nshingwabikorwa w’Umurenge wa Nyabimata mu Karere ka Nyaruguru Nsengiyumva Vincent batwikiye imodoka bakanamukomeretsa mu ijoro ryo ku wa 19 rishyira 20 Kamena 2018, wagaragaye muri uru rubanza ari kumwe n’umwunganira mu mategeko.

Ubushinjacyaha bwatangiriye ku cyaha cyo kurema umutwe w’ingabo utemewe, butangira bugaragaza ko kuva mu mwaka wa 2007 ubwo Nsabimana yari akiri umunyeshuri muri Kaminuza Nkuru y’u Rwanda i Butare, yakunze kugirana amakimbirane na bagenzi be, imyitwarire yatumye anirukanwa burundu muri kaminuza.

Buvuga ko muri 2013 yahungiye hanze y’u Rwanda ajya muri Afurika y’Epfo ahita yifatanya na RNC umutwe na wo urwanya Leta y’u Rwanda uyobowe na Kayumba Nyamwasa.

Ubushinjacyaha buvuga ko uyu Nsabimana yaje gushinga ishyaka rya RLM ryaje kwihuza n’andi mashyaka nka CND na PDR Ihumure, iyi mitwe yose yaje kwishyira hamwe ikora impuzamashyaka MRDC ihagararirwa na Paul Rusesabagina maze Nsabimana Callixte afatanya na Irategeka baba abavisi Perezida ba MRCD ari na yo yaje gushinga umutwe wa Gisirikare witwa FLN, Nsabimana ahita awubera umuvugizi yiha n’ipeti rya Majoro.

Ubushinjacyaha buvuga kandi ko bitari bikwiye ko umusivile yiha ipeti mu ya Gisirikare atarabyize.

Mu rubanza rw’abantu 25 bafungiwe mu Rwanda baregwa kuba mu mutwe wa P5, nabwo izina Pte Muhire Dieudonne ryagarutsweho, ari nayo mpamvu bashyikirijwe urukiko rwa Gisirikare kandi ari abasivili, hashingiwe ku isobekerana ry’imanza zombi, aho urwa Pte Muhire na bagenzi be ruri mu rukiko rukuru rwa Gisirikare.

Urukiko rumaze kumva ibyo Ubushinjacyaha burega Nsabimana, rwanzuye ko urubanza ruzakomeza ku wa 28 Mutarama 2020, hagaragazwa ibimenyetso by’ibyo byaha ndetse na Nsabimana yiregura.

Inkuru bisa: Nsabimana Callixte ‘Sankara’ yemereye urukiko ibyaha 16 anasaba imbabazi –Uko iburanisha ryagenze https://www.igihe.com/amakuru/u-rwanda/article/nsabimana-callixte-sankara-yagejejwe-imbere-y-urukiko

Imodoka y'uwari Umunyamabanga Nshingwabikorwa w'Umurenge wa Nyabimata yaratwitswe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza