Uwarokotse Jenoside yagaragaje uburyo bwakoreshwa hakaboneka imibiri y’abatutsi biciwe muri ESO-Butare

Yanditswe na Prudence Kwizera
Kuya 10 Gicurasi 2019 saa 08:19
Yasuwe :
0 0

Hashize y’imyaka 25 hataramenyekana irengero ry’imibiri y’Abatutsi bishwe muri Jenoside bicirwa ahari ishuri ry’aba sous-officiers i Butare, hari hazwi nka ESO-Butare.

Abatanga ubuhamya bavuga ko ahahoze ESO-Butare hicirwaga abatutsi benshi bahajyanywaga bavanywe mu Mujyi wa Butare, ku bitaro bya CHUB n’ahandi.

Kuri ubu hakorera Ishuri Rikuru ry’Imyuga n’Ubumenyingiro, IPRC Huye.

Mbaraga Clement warokokeye Jenoside yakorewe Abatutsi, yatanze ubuhamya agaragaza bamwe mu bigaga muri ESO-Butare kuri ubu bari mu nzego za Leta, asaba ko babazwa amakuru yimbitse.

Ati “Hari abigaga muri iri shuri kandi ibyo bikorwa byose barabibonye kandi bari mu gisirikari cyacu cya Leta iriho; abo bashobora gushakwaho amakuru kuko barahari, yewe hari n’abari mu nzego nkuru bari bari hano mu buyobozi bashobora gutanga amakuru y’uko byagenze.”

Umuyobozi Mukuru wa IPRC Huye, Dr Twabagira Barnabé, yavuze ko mu myaka igera kuri irindwi bamaze bahakorera nk’ishuri, nta mubiri n’umwe barabona ariko bagiye kugendera ku makuru bahawe na Mbaraga kugira ngo iyo mibiri iboneke ishyingurwe mu cyubahiro.

Ati “Ni inzira nziza, ni amwe mu makuru twahawe mazima; ngira ngo anabivuga nabashije kwandika bariya bantu yavuze […] ndumva ari amakuru meza yaduhaye ashobora kutuganisha ku kuri kwaba kwarabereye hano.”

Mu bice bitandukanye by’iyahoze ari Perefegitura ya Butare ni hamwe mu ho Jenoside yakorewe Abatutsi yakoranwe ubugome n’ubukana ihitana benshi.

Kuri uyu wa Kane ubwo muri IPRC Huye bibukaga ku nshuro ya 25 Jenoside yakorewe Abatutsi, ubutumwa bwahatangiwe bw’ibanze ku gusaba abari kubyiruka guharanira kunga ubumwe no kwimika urukundo birinda amacakubiri n’ingengabitekerezo ya Jenoside.

Bakoze urugendo rwo kwibuka baturuka kuri IPRC Huye berekeza ku rwibutso rwa Jenoside rwa UR-Huye
Bashyize indabyo ku rwibutso rwa UR-Huye
Bamwe mu baje kwibuka Jenoside muri IPRC-Huye bateze matwi ubuhamya bwa Mbaraga Clement
Mbaraga Clement yatanze ubuhamya agaragaza bamwe mu bigaga muri ESO-Butare, asaba ko babazwa amakuru y'ahari imibiri y'abahiciwe
Umuyobozi Mukuru wa IPRC Huye, Dr Twabagira Barnabé yavuze ko amakuru bahawe na Mbaraga bagiye kuyabyaza umusaruro
Umuyobozi Mukuru w'ishuri ry'u Rwanda ry'Imyuga n'ubumenyingiro, Dr Gashumba James

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza