Zaki Ameer yabwiye abiga muri Kaminuza ya Kigali ko igishoro cya mbere ari igitekerezo

Yanditswe na Tombola Felicie
Kuya 23 Nzeri 2017 saa 08:23
Yasuwe :
0 0

Mu ruzinduko umunya-Australia Zaki Ameer ukomoka muri Sri Lanka agirira mu Rwanda, yagiranye ibiganiro n’abanyeshuri biga muri Kaminuza ya Kigali, ahishura ko inzira rukumbi yo kugera ku bukire ari ukugira ibitekerezo byagutse ndetse no kuba uzi neza ibyo ushaka kugeraho aho kuba ikibazo cy’igishoro.

Zaki Ameer w’imyaka 38, yatangiye ubushabitsi ubwo yari afite imyaka 25, nibwo yatangije ikigo Dream Design Propery cyari gifite urwunguko rwa miliyoni 6.8 z’amadorali ya Amerika mu mwaka ushize.

Yatangiye agura inzu ziciriritse akongera akazigurisha , yagiye akomeza kwaguka amaze kugira ibigo bitandukanye ndetse igitabo yasohoye cyitwa ’Dream Design Do’ cyaguzwe asaga miliyoni eshatu z’amadorali mu myaka ibiri gusa.

Kuva muri 2012 amaze gufasha abantu kugura inzu zisaga 1100, yashinze ikigo gitanga ubufasha mu by’ishoramari, mu bwubatsi no kugura amazu ndetse afite inzu ze 15 yaguze muri Australia.

Uyu rwiyemezamirimo yatumiwe mu Rwanda n’Ikigo INTEch Investments Ltd kiyoborwa na Hana Hallaj ,ngo aganirize urubyiruko mu nzego zitandukanye uko rwabasha kwagura ibitekerezo inzozi zarwo zikaba impamo.

Ku mugoroba wo kuri uyu wa Gatanu tariki ya 22 Nzeri 2017, ni bwo yaganirije abanyeshuri bo muri Kaminuza ya Kigali abagaragariza ko kugira ibitekerezo byagutse ari byo by’ingenzi mu gihe umuntu ashaka kugera ku bukire.

Ati “ Niba ushaka kugera ku bukire, utangira wibaza icyo ushaka kugeraho mu buzima bwawe. Niba utazi icyo ushaka, wagera ute aho ushaka kugera? Mwemerere ubwonko bwanyu gutekereza ibintu bishya, mubukoresheje."

Yabwiye abanyeshuri ba Kaminuza ya Kigali ko igihe cyose umuntu ashaka kuraga abana ubukire agomba kuba afite inzozi ndetse yaba adafite uburyo akabwishyiriraho.

Ati “ Iyo ufite inzozi ukaba nta buryo ufite ubwishyiriraho (creating opportunity). Nta perezida uzaguha amafaranga, nta muyobozi uzakoresha ibitekerezo byawe,ugomba gukoresha ubwonko bawe amafaranga ukayavana muri abo bantu ahubwo.”

Abibaza ikibazo cy’igishoro yabakuriye inzira ku murima

Umunyeshuri Nkusi Frank yamubajije uburyo umuntu yatangira kuba rwiyemezamirimo kandi nta gishoro.

Zaki ati “ Igikomeye ni igitekerezo,sinshobora gutangira ahantu ubucuruzi ntabona neza ko ikenewe muri ako gace ndetse ngo njye kuri buri rugo ngo mbaze abantu ko bajya bayikenera. Iyo birangiye ushobora gutangiza udufatanga dute ugujije cyangwa utwo watse inshuti. Iyo uguzemo inkweto ebyiri ukaza ukazigurisha, ejo usubirayo ukazana eshatu.”

Yavuze ko na we ariko yatangiye agura inzu ziciriritse yayigurisha akagura indi bityo bityo.

Abanyeshuri ba Kaminuza ya Kigali batangaje ko bishimiye kuganirizwa n’umuntu ukiri muto kandi wageze kubyo abifuriza byo kuba abakire.

Umutoni Francine ati “ Zaki twamwishimiye ibyo avuga by’uko umuntu agomba guhera ku bintu bito bito akagenda azamuka birashoboka kuko na we ni rwo rwego yahereyeho.”

“ Nakunze ko adusaba guhera ku bintu biboneka aho dutuye ariko tukabizana mu bundi buryo butari bumenyerewe; ikindi nishimiye ni uko yadusabye ko tugomba kwikorera aho kugira ngo umuntu atangize ibihumbi 20 ahite atangirana n’umukozi wo kuzahemba kandi wagomba kubyikorera igihe ukirimo kwiyubaka."

Ubuyobozi bwa Kaminuza ya Kigali bwasabye abayenyeshuri kubyaza umusaruro impanuro bahawe kuko umuntu atangira hakiri kare kugira ngo azagere aho yifuza agifite imbaraga zo kwishimira ibyo yagezeho.

Abanyeshuri ba Kaminuza ya Kigali bakurikiye ibiganiro bagejejweho na Zaki
Abayobozi ba Kaminuza ya Kigali na bo bari bitabiriye ikiganiro cya Zaki
Hana Hallaj, Umuyobozi Mukuru wa Intech, Ikigo cyatumiye Zaki Ameer kikaba gifitanye ubufatanye na Kaminuza ya Kigali
Rwiyemezamirimo Zaki Ameer aganiriza abanyeshuri ba Kaminuza ya Kigali
Zaki yahawe urwibutso na Kaminuza ya Kigali

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza