Zimwe mu nzibutso za Jenoside yakorewe Abatutsi zigiye guhuzwa

Yanditswe na Ferdinand Maniraguha
Kuya 2 Kamena 2019 saa 11:12
Yasuwe :
0 0

Zimwe mu nzibutso za Jenoside yakorewe Abatutsi zitujuje ibyangombwa zigiye guhuzwa, kugira ngo zitabweho neza hagamijwe kurushaho kubungabunga amateka ya Jenoside yakorewe Abatutsi.

Iteka rya Perezida ryasohotse kuwa 27 Gicurasi 2019, rishyiraho uburyo bwo guhuriza hamwe inzibutso za Jenoside yakorewe Abatutsi, kugira ngo zirusheho gucungwa neza no kubungabungwa mu gihe kirambye.

Iri teka riteganya ko mu guhuriza hamwe izi nzibutso hitabwa nibura kuri imwe mu mpamvu zirimo kwimura imva zose z’abazize Jenoside yakorewe Abatutsi, imibiri izirimo igashyingurwa mu nzibutso za Jenoside yakorewe Abatutsi; inzibutso zubatse ahantu hahanamye hatuma zishobora gusenyuka cyangwa kwangizwa n’ibiza bitewe n’imiterere y’aho zubatse n’inzibutso zirimo imibiri iri munsi y’igihumbi uretse inzibutso zifite amateka yihariye ku buryo kuyabungabunga byagorana.

Mu bindi bizashingirwaho hahuzwa inzibutso za Jenoside yakorewe Abatutsi harimo kuba zubatswe ahantu hatorohereza abantu kuzisura kandi aho hantu hakaba hadashobora gutunganywa; kuba zegeranye kandi amateka yerekeranye n’itegurwa n’ishyirwa mu bikorwa rya Jenoside yakorewe Abatutsi y’aho zubatse ari amwe no kuba ziri ahantu hari urusaku kandi hadatanga ituze.

Umunyamabanga Nshingwabikorwa wa Komisiyo y’Igihugu Ishinzwe Kurwanya Jenoside (CNLG) Dr Bizimana Jean Damascène, yabwiye IGIHE ko icyifuzo ari ugusigaza inzibutso zizajyamo amateka kandi zifite umwanya uhagije ku buryo n’abanyeshuri bajya bajya kuhigira.

Yavuze ko Leta yifuza gusigarana inzibutso ifitiye ubushobozi bwo gukomeza kwitaho uko bikwiriye.

Ati "Hari n’izo usanga zaragiye zubakwa n’abantu ku giti cyabo kandi ubundi inzibutso ni iza Leta, ni yo izitaho ikazicunga. Icyifuzo ni uko habaho inzibutso Leta ifitiye ubushobozi bwo kuzitaho igihe cyose kugira ngo ayo amateka azahoreho."

Hari zimwe mu nzibutso zatangiye guhuzwa nk’aho mu minsi ishize imibiri yari mu nzibutso enye zo mu karere ka Nyamasheke yahurijwe mu rwibutso rwa Jenoside rwa Gashirabwoba.

Mu karere ka Nyamagabe, imibiri y’abazize Jenoside yakorewe Abatutsi yari mu rwibutso rwa Gasaka n’iyari mu rwibutso rwa Diyosezi Gatolika ya Gikongoro yahurijwe mu rwibutso rwa Murambi.

Jenoside yakorewe Abatutsi muri Mata 1994 yahitanye abasaga miliyoni mu gihe cy’amezi atatu.

Umunyamabanga Nshingwabikorwa wa CNLG, Dr Bizimana Jean Damascène, avuga ko iki gikorwa kizafasha mu kubungabunga inzibutso za Jenoside yakorewe Abatutsi n'amateka zibitse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza