IGIHE.com > Amakuru > U Rwanda
Bamwe mu basizwe iheruheru  n’ ibiza bagobotswe

Bamwe mu basizwe iheruheru n’ ibiza bagobotswe


Yanditswe kuya 2-04-2013 - Saa 12:40' na Jean de Dieu Serugendo

Kuri uyu wa mbere, Akarere ka Nyarugenge kahaye ibikoresho by’ibanze imiryango mirongo itanu (50) yo mu Murenge wa Gitega yasenyewe n’imvura n’umuyaga mu mminsi ishize .

Akarere kageneye iyo miryango ibikoresho birimo amasafuriya, amasahani, ibikombe, ibiringiti, amasabune ndetse n’abagore bahabwa ibitenge.

Uwari uhagarariye Akarere, Sengiyumva Théogène ushinzwe imicungire y’ibiza, yashimiye abaturage bagaragaje umuco mwiza wo gucumbikira bagenzi babo bari basenyewe n’imvura n’umuyaga, ko bigaragaza indangagaciro z’Abanyarwanda mu bufatanye n’ubumwe mu kwikemurira ibibazo.

Yakomeje asaba aba baturage gutekereza impamvu basenyewe n’imvura n’umuyaga bakihutira kumva ko ari imiturire mibi iri ku isonga y’icyo kibazo, abasaba ko abatuye mu mazu bakodesha bayimukamo bakajya gukodesha ahandi; naho abatuye mu mazu yabo bakumva inama bagirwa zo gutura ahatabateza ibibazo.

Abaturage bashimye inkunga bahawe kandi batangaza ko inama bagirwa n’ubuyobozi bazagerageza kuzishyira mu bikorwa mu gushaka ahandi baba hadashyira ubuzima bwabo mu kaga. Ikindi ni uko ubwo aba baturage bahabwaga ibi bikoresho; harimo abari bamaze kwimuka aho bari batuye bakaba baragiye gutura ahandi.

Icyo gikorwa cyo gufasha imiryango yasenyewe n’imvura n’umuyaga giteganyijwe no mu Murenge wa Kimisagara, aho imiryango mirongo itanu nayo izahabwa ibyo bikoresho byatanzwe na Minisiteri y’imicungire y’ibiza no gucyura impunzi (MIDIMAR).

Ubuyobozi bw’Akarere ka Nyarugenge bukomeje gukangurira abaturage bamenyeshejwe ko batuye ahantu habi igihe icyo ari cyo cyose hashyira ubuzima bwabo mu kaga; ko bahimuka bakajya gutura ahari imiturire iboneye cyane cyane mu Midugudu.

Ibi bikoresho byafashishijwe abahuye n’ibiza, byabonetse ku bufatanye n’Umuryango wa Croix-Rouge y’u Rwanda.

Abahuye n'ibiza bahabwa ibikoresho
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO