Ku bwa Clinton, iyo Amerika iba yarohereje ingabo mu Rwanda, abantu 300,000 bari kurokoka

Uwahoze ayobora Leta Zunze Ubumwe z’Amerika Perezida Bill Clinton yatuye avuga ko iyo Leta Zunze Ubumwe z’Amerika ziba zarohereje ingabo zo gutabara Jenoside yakorewe abatutsi igitangira mu mwaka wa 1994, nibura abantu barenga “300,000” muri miliyoni irenga yishwe bari kubasha kurokorwa.

Mu kiganiro CNBC Meets’ yagiranye n’umunyamakuru Tania Bryer, Clinton yasobanuye ko kunanirwa gutabara u Rwanda mu gihe cya jenoside yakorewe Abatutsi, igahitana abantu barenga miliyoni imwe, ari imwe mu mpamvu yatumye atekereza ishingwa rya Clinton Foundation.

Clinton ukunze kugaragaza ko yashegeshwe n’uburyo Leta yari ayoboye yitwaye kubyarimo birabera mu Rwanda mu 1994 yagize ati “Iyo tuba twaragiye mu Rwanda hakiri kare, nizera ko twari kubasha kurokora nibura kimwe cya gatatu cy’abishwe…byangizeho ingaruka zikomeye.”

Nubwo Clinton yemera ko Leta Zunze Ubumwe z’Amerika zititaga kuri Afurika mu 1994 nk’uko bimeze kuri ubu, yavuze ko iyo afata icyemezo cyo kohereza umutwe w’ingabo zigizwe n’abasirikare 10,000 mu Rwanda, ibihumbi by’abantu yizera neza ko batari kwicwa.

Mu myaka 19 ishize nyuma ya Jenoside yakorewe Abatutsi, benshi mu mpuguke z’abanyamateka ndetse n’izindi nzobere bakomeje gutunga agatoki umuryango mpuzamahanga, cyane ibihugu by’ibikomerezwa, ku kuba bitarateye ingabo mu bitugu umutwe w’ingabo za Loni wari mu Rwanda muri icyo gihe.

Inyandiko zari zaragizwe ibanga zashyizwe ahagaragara mu mwaka wa 1994 zagaragaje ko Leta yari iyobowe na Clinton yari ifite amakuru nyayo “ku mugambi wariho wo gutsemba Abatutsi bose” mbere y’uko Jenoside itangira.

Mu mwaka w’ 1998, Perezida Bill Cinton wari ukiri ku butegetsi yagiriye uruzinduko mu Rwanda. Nubwo yagarukiye ku kibuga cy’indege mpuzamahanga cya Kanombe, mu ijambo yahavugiye yasabye imbabazi ku myitwarire y’igihugu cye n’umuryango mpuzamahanga mu gihe cya Jenoside yakorewe Abatutsi.

Muri urwo ruzinduko yakoze mu mezi ya mbere y’umwaka w’1998, Clinton yagize ati “Umuryango mpuzamahanga, kimwe n’ibihugu byo muri Afurika, bikwiye kwemera uruhare rwabyo muri aya marorerwa… Ntitwatabaye vuba bishoboka nyuma y’uko ubwicanyi butangira. Ntituba twaremeye ko inkambi z’impunzi zihinduka indiri y’abicanyi. Ntitwahise twita buriya bwicanyi izina nyabwo bwari bukwiye : ‘jenoside’.”

Kuri ubu Clinton abinyujije mu muryango “Clinton Global Initiative” akora iyo bwabaga mu gushakira inkunga zitandukanye zo gufasha u Rwanda, by’umwihariko mu rwego rw’ubuzima n’ubuvuzi.

Perezida Clinton ubwo yagiriraga uruzunduko rwe rwa mbere mu Rwanda tariki 25 Werurwe 1998, hano yarimo ageza ijambo ku barokotse Jenoside ku kibuga mpuzamahanga i Kanombe

Hano ni mu mwaka wa 2006 ubwo Clinton yagiriraga urugendo i Rwinkwavu mu karere ka Kayonza, ubwo yanasuraga ikigo nderabuzima cyaho

Clinton ari kumwe n'umukobwa we w'ikinege Chelsea ku kibuga cy'indege cya Kanombe nyuma y'uruzinduko bari bamazemo iminsi mu Rwanda