IGIHE.com > Amakuru > U Rwanda
Bimwe mu by’ingenzi byaranze umwaka wa 2012 mu Rwanda

Bimwe mu by’ingenzi byaranze umwaka wa 2012 mu Rwanda


Yanditswe kuya 31-12-2012 - Saa 15:46' na Emile Nsabimana na Emmanuel Kanamugire

Umwaka wa 2012 wabayemo byinshi haba mu Rwanda no mu mahanga, mu nzego no mu byiciro bitandukanye. Urubuga igihe.com ibyo byose rwabibagejejeho uko byakabaye, ariko tugiye kwibukiranya iby’ingenzi muri byo bikwiye no kutazibagirana mu mateka.

Ubutabera

Umukuru wa FDU yarakatiwe

Umwaka wa 2012 usize umukuru w’umutwe wa politiki utaremerwa mu Rwanda FDU Inkingi, ari we Ingabire Umuhoza Vicoire, akatiwe igifungo cy’imyaka umunani nyuma yo guhamywa ibyaha by’ubugambanyi bwo kugirira nabi ubutegetsi hakoreshejwe iterabwoba, n’cyaha cyo gupfobya Jenoside.

Ingabire Victoire yakatiwe gufungwa imyaka umunani

Ingabire yakatiwe atari mu rukiko, kuko muri Mata yavuze ko nta butabera yahabwa n’urukiko rwamuburanishaga agahitamo kutitajya yitaba Urukiko.

Uyu mwanzuro ukimara gufatwa impande zombi zagaragaje ko zitishimiye ibiwukubiyemo, 2012 ukaba usize uruhande rwa Ingabire n’urw’ubushinjacyaha zarajuriye iki cyemezo mu Rukiko rw’Ikirenga.

22 bakatiwe n’Urukiko Rukuru ku byaha by’Iterabwoba mu gutera ibisasu

Abakatiwe ku byaha byo gutera ibisasu mu bice bitandukanye by’u Rwanda kuva mu mwaka wa 2008 barimo n’abasirikare bafitanye isano n’umutwe wa FDLR ukorera muri Repubulika Iharanira Demokarasi ya Congo.

Muri 30 baregwaga 10 bahanishijwe gufungwa burundu, umunani bagirwa abere naho abandi bagenda bahabwa ibihano bitandukanye.

Imirimo y’Inkiko Gacaca yararangiye

Ku itariki ya 18 Kamena, ni bwo ku rwego rw’igihugu imirimo Inkiko Gacaca zishingiye ku muco nyarwanda wo hambere wo gukemura ibibazo binyuze mu muryango yashojwe ku mugaragaro.

Izi nkiko ariko ntizavuzweho rumwe, kuko bamwe mu banyamahanga batiyumvishaga uko abantu batize amategeko baca imanza bigashoboka ; icyakora byagaragaye ko zakemuye byinshi mu bibazo bikomoka kuri Jenoside yakorewe Abatutsi muri Mata 1994.

Hari byinshi Inkiko Gacaca zagezeho mu kunga Abanyarwanda

Ubwo Gacaca zasozwaga ku mugaragaro, Mukantaganzwa Domitilla wari uzikuriye yatangaje ko imanza zose zitarangiye bitewe n’impamvu zirimo ko bamwe mu bakekwagaho ibyaha batagiye baboneka.

Mukantaganzwa yagaragaje ko nta mpungenge ku manza zizaboneka nyuma, kuko zizashyikirizwa izindi nkiko. Gacaca zarangije imirimo yazo ziburanishije imanza zisaga miliyoni n’ibihumbi 900.

Abantu miliyoni n’ibihumbi 600 Gacaca zabahamije ibyaha, naho ibihumbi 270 zibagira abere.

2012 urangiye Mugesera ataburanishijwe mu mizi

Nyuma y’amezi 11 ageze mu Rwanda muri Mutarama 2012, Dr Mugesera Leon ntaraburanishwa mu mizi mu rubanza ashinjwamo ibyaha birimo icyo gushishikariza Abahutu kwica Abatutsi hashingiwe ku ijambo yavugiye ku Kabaya muri mitingi ya MRND yabaye mu mwaka w’1992.

Urubanza rwa Mugesera rumaze umwaka hafi rutaraburanishwa mu mizi

Ku ya 24 Mutarama 2012 ni bwo Mugesera yageze mu Rwanda avuye muri Canada, aho yaburaniye asaba kutoherezwa mu Rwanda ariko Urukiko rukuru rw’iki gihugu ruza gufata umwanzuro ko yoherezwa kuburanishirizwa mu Rwanda.

2012 urangiranye n’urubanza rwa nyuma mu zizaburanishwa na ICTR

Urukiko Mpuzamahanga Mpanabyaha rwashyiriweho u Rwanda ICTR (International Criminal Tribunal for Rwanda), muri uyu mwaka rwaciye urubanza rwa Ngirabatware Augustin wari Minisitiri w’Imari n’Igenamigambi muri ‘Leta y’Abatabazi,’ ari na we wa nyuma wakatiwe na rwo agahabwa igihano cyo gufungwa imyaka 35. Hari ku ya 20 Ukuboza 2012.

Augustin Ngirabatware ni we wa nyuma waciriwe urubanza na ICTR

Kuva ubu ICTR ruzaburanisha gusa imanza z’ubujurire mu zo rwaciye, kugeza mu mwaka wa 2014. N’ubwo ariko TPIR rusoza imirimo, ruracyafite ikibazo cyo kubonera ibihugu bamwe mu bo rwagize abere badashaka gusubira mu Rwanda.

Politiki

Umuryango FPR Inkotanyi wizihije isabukuru y’imyaka 25 umaze uvutse

Uyu muryango wavukiye mu gihugu cya Uganda mu mwaka w’1987, ubwo hizihizwaga iyi sabukuru Perezida Paul Kagame akaba n’Umuyobozi Mukuru wawo yashimye by’umwihariko bamwe mu bagize uruhare mu rugamba rwo kubohora igihugu rwatangijwe na FPR ; aba kandi bakaba baranagize uruhare rukomeye mu ishingwa ryawo.

Mu birori byabaye ku wa 20 Ukuboza, Perezida Kagame yashimye abitanze bagahara ubuzima bwabo ku nyungu rusange z’Abanyarwanda.

Ku ikubitiro Perezida Kagame yashimye ubutwari bwa Maj Gen Gisa Fred Rwigema wabaye umuyobozi wa FPR igitangira, ndetse n’Uwari Umwungirije icyo gihe Kanyarengwe Alexis.

Yubile ya FPR yitabiriwe n'Abanyacyubahiro batandukanye

Hashimwe kandi Maj Bayingana Peter, Rutabayire Modeste na Inyumba Aloisea.

N’Ubwo atabarondoye bose, Perezida Kagame yavuze ko abo atarondoye batibagiranye ko ahubwo bazakomeza kuvugwa.

U Rwanda rwizihije isabukuru y’imyaka 50 rubonye ubwigenge

Mu kwizihiza iyi sabukuru byabaye ku ya mbere Nyakanga 2012, Perezida wa Repubulika y’u Rwanda Paul Kagame yavuze ko kuba akarengane karageze mu Rwanda bikwiye kuruviramo imbaraga zirwubaka.

Iyi sabukuru yizihirijwe rimwe n’imyaka 18 u Rwanda rumaze rwibohoye politiki y’ivangura n’igitugu, mu birori byitabiriwe n’imbaga y’Abanyarwanda hamwe n’abashyitsi barimo Perezida wa Tanzania Jakaya Kikwete, Visi Perezida wa Uganda Edward Sekandi, Visi Perezida wa Mbere w’u Burundi Therence Sininguruza, Abayobozi bakuru bo muri Guverinoma, Hon. Jean Ping wo muri Komisiyo ya Afurika yunze Ubumwe.

Perezida Kagame yavuze ko iyi yubire ari umwanya wo kureba ibyagezweho no gutegura imigambi mishya yo kubaka ejo hazaza h'igihugu

Perezida Kagame yavuze ko iki ari igihe cyo kwisuzuma no gusubiza amaso inyuma hakarebwa ibyagezweho, ukaba n’umwanya wo kureba imbere mu kubaka neza ejo hazaza h’u Rwanda. Yagize ati “Uyu munsi ukubiyemo ibintu bibiri : Ubwingenge no kwibohoza. Byose bikubiyemo ibibazo mu nzira twanyuzemo, ariko kandi biduha n’amahirwe menshi kugira ngo duhangane n’ibyo bibazo. Ariko icya ngombwa, byose bishingira kuri twe kuko twiha agaciro.”

Andi makuru

U Rwanda rwahakanye ibirego bya raporo za Loni zirushinja gufasha M23

Mu mwaka wa 2012 by’umwihariko muri Kamena, havuzwe amakuru y’ibyegeranyo by’Umuryango w’Abibumbye Loni bishinja u Rwanda gutera inkunga abarwanyi b’umutwe wa M23 urwanya Leta ya Repubulika Iharanira Demokarasi ya Congo.

Ibi birego leta y’u Rwanda yarabihakanye ivuga ko nta shingiro bifite, icyakora ibihugu by’u Bwongereza, u Buholandi, u Budage, Suede na Leta Zunze Ubumwe za Amerika byayishingiyeho bihagarika zimwe mu nkunga byahaga u Rwanda.

Minisitiri Mushikiwabo yatanze ibisobanuro mu nteko

Nyuma yo guhagarikirwa inkunga Leta y’u Rwanda yagaragaje ko ibabajwe n’uyu mwanzuro, igaragaza ko abayikoze cyane cyane uwari ukuriye itsinda ry’impuguke za Loni Steve Hege bari bafite izindi nyungu za politiki.

U Rwanda rwashimangiye ko iyi raporo n’ibyemezo byafashwe na bimwe mu bihugu biyishingiyeho nta cyo bizahungabanya ku bukungu bw’igihugu.

Minisitiri w'ingabo na we yasobanuriye abagize Inteko iby'ikibazo cya Congo

Mu gukomeza kwamagana ibikubiye muri raporo y’impuguke za Loni kandi, ba Minisitiri Louise Mushikiwabo w’Ububanyi n’Amahanga na Kabarebe James w’ingabo bagiye gusobanurira Inteko ishinga amategeko ibijyanye na yo.

Kuvanaho ubuhunzi ku Banyarwanda byarasubitswe

Ishami ry’Umuryango w’Abibumbye ryita ku mpunzi UNHCR, ryatangaje ko gukuraho ubuhunzi ku mpunzi z’Abanyarwanda byari biteganyijwe ku ya 30 Kamena cyimuriwe ku ya 30 Kamena mu mwaka wa 2013.

Aho u Rwanda rugeze ntibikwiye ko hari Umunyarwanda waba acyiruka amahanga nk'impunzi

UNHCR yatangaje ko yafashe iki cyemezo nyuma yo kubisabwa na bimwe mu bihugu bicumbikiye impunzi, ubwazo na zo zikaba ziri mu bari basabye ko iki cyemezo kitashyirwa mu bikorwa kuva cyatangazwa. Hari kandi n’imwe mu miryango mpuzamahanga iharanira uburenganzira bwa muntu yari yaragaragaje ko iki cyemezo kidakwiye.

Iki cyemezo cyo gukuraho ubuhunzi ku banyarwanda kireba abahunze u Rwanda mbere y’Ukuboza 1998.

Ikigo gishinzwe ibarurishamibare cyagaragaje ko Abanyarwanda biyongereyeho hafi 30% mu myaka 10 gusa

Imibare yashyizwe ahagaragara n’iki kigo yagaragaje ko umubare w’Abanyarwanda ugenda uzamuka, mu ibarura ryakozwe muri Kanama.

Iri barura ryaragaragaje ko Abanyarwanda bavuye kuri miliyoni umunani mu mwaka wa 2002, mu gihe cy’ibarura bakaba baregeraga miliyoni 11.

Hakwiye ingamba mu kuboneza urubyaro kuko n'ubwo umubare w'Abanyarwanda wiyongera ubuso bwarwo bwo ntibuhinduka

Iyi mibare igaragaza ko uyu muvuduko w’ubwiyongere bw’Abanyarwanda ukabije, mu gihe nyamara ubuso batuyeho budahinduka.

Hatangijwe ikigega cyo gushyira hamwe ubushobozi

Ikigaga ’Agaciro Development Fund’ kigamije guhuza ubushobozi bw’Abanyarwanda mu kwikemurira ibibazo no kwiteza imbere, cyatangijwe ku mugaragaro na Perezida w’u Rwanda Paul Kagame ku ya 23 Kanama.

Abanyarwanda mu byiciro n'inzego bitandudkanye bitabiriye gutanga inkunga mu kigega Agaciro

Perezida Kagame yavuze ko ibi ari umuhigo w’Abanyarwanda wo kwiha agaciro no kurema igihugu bundi bushya, ndetse no kugiteza imbere. Yavuze ko uyu muhigo wo kumva ko guteza imbere igihugu ari inshingano z’Abanyarwanda bose, kubusanya na wo bikaba byaba ari ukwibeshya.

Kuri uyu munsi iki kigega cyahise gishyirwamo amafaranga arenga miliyari y’u Rwanda, 2012 ukaba urangiye miliyari 26 zisaga zaramaze gukusanywa.

Amakuru ajyanye n’ibiza

Imvura n’umuyaga byangije byinshi

Ku ya12 Ugushyingo, mu karere ka Bugesera imvura irimo umuyaga yashenye inzu 300 z’abaturage ; hanangirika imyakamu mirenge ya Mwogo na Ntarama.

Umuyaga hari ibyo wangije by'umwihariko mu karere ka Bugesera

Bimwe mu bisenge by’inzu byaragurutse, abagizweho ingaruka n’uyu muyaga bakaba baravuze ko utaramaze igihe kirekire nyamara ukangiza byinshi.

Raporo ya Minisiteri ishinzwe gucyura impunzi no gukumira ibiza

Ku ya munani Ukwakira, Minisiteri ishinzwe gucyura impunzi no kurwanya ibiza yatangaje ko kuva muri Mutarama uyu mwaka kugeza muri Nzeri ibiza byari bimaze guhitana abantu basaga 60, inzu 1920 zarasenyutse, imirima y’umuceri, ibishyimbo, urutoki n’ibigori ingana na hegitari 2387 na yo ikangirika.

Mu bice bimwe na bimwe amazi yarengeraga inzu

Ibikorwa remezo na byo ntibyasigaye, kuko raporo yashyizwe ahagaragara yerekanaga ko imihanda 11, ibiraro bitanu, ibyumba 19 by’amashuri, insengero umunani n’ibiro by’ubuyobozi birenga bine byangiritse.

Amakuru y’akababaro

Uwari Minisitiri w’Umuryango yitabye Imana

Inyumba Aloisea wari Minisitiri w’Iterambere ry’Umuryango, ku ya gatandatu Ukuboza 2012 ni bwo hamenyekanye inkuru y’uko yapfuye azize indwara.

Nyakwigendera Inyumba hari byinshi yagejeje ku muryango nyarwanda

Inyumba yari umwe mu bashinze Umuryango FPR Inkotanyi, akaba kandi yaragiye ashingwa imirimo ikomeye mu Rwanda kandi akuzuza neza inshingano ze.

Inyumba yavutse mu 1964, mbere yo kuba Minisitiri w’Umuryango akaba yari umwe mu bagize Sena y’u Rwanda kuva mu mwaka wa 2004.

Perezida Kagame na Madamu we mu guherekeza nyakwigendera Inyumba

Inyumba Aloisea kandi yabaye minisitiri muri Guverinoma y’inzibacyuho nyuma ya Jenoside yakorewe Abatutsi mu Rwanda, aho yari Minisitiri w’Uburinganire n’Iterambere ry’umuryango kuva mu 1994 kugeza mu 1999.

Umunyarwanda Turatsinze Theogene yiciwe muri Mozambique

Mu murwa mukuru wa Mozambike ari wo Maputo, ku wa G13 Ukwakira nijoro abantu batamenyekanye bashimuse Umunyarwanda Turatsinze Theogene bamukuye iwe aho i Maputo, nyuma baramwica.

Umugore we yiyambaje Polisi umugabo akiburirwa irengero, baza kubona imodoka ya Turatsinze mu bilometero birindwi uvuye ku nkengero z’inyanja y’Abahinde.

Abanyarwanda bahaye icyubahiro nyakwigendera Turatsinze

Imodoka basinze nyirayo atayirimo, ariko nyuma baza kubona umurambo wa Turatsinze ku nyanja y’Abahinde ku itariki ya 14 Ukwakira 2012.

Umurambo we wazanywe mu Rwanda, ari na ho washyinguwe mu cyubahiro.

Umwe mu bagize KGB ntiyabashije kurangiza 2012

Muzika nyarwanda n’Abanyarwanda muri rusange, babuze umuhanzi Hirwa henry waririmbaga mu itsinda rya Kigali Boys rizwi nka KGB.

Yaguye mu kiyaga cya Muhazi

Yapfuye ku itariki ya mbere Ukuboza arohamye mu kiyaga cya Muhazi mu Ntara y’Iburasirazuba.

Ni inkuru yababaje benshi barimo abahanzi nyarwanda, banakoze indirimbo yo kuzirikana ku gahinda batewe no kubura Hirwa.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO