IGIHE.com > Amakuru > U Rwanda
Gasabo: Abaturage bamwe baranenga kwangirizwa na koperative “Va mu Mwijima”

Gasabo: Abaturage bamwe baranenga kwangirizwa na koperative “Va mu Mwijima”


Yanditswe kuya 1-04-2013 - Saa 09:24' na Faustin Nkurunziza

Abagize koperative Cyaruzinge Va mu mwijima (CO.C.VAM), yo mu karere ka Gasabo, Umurenge wa Ndera Akagali ka Cyaruzinge ntibavuga rumwe n’abaturage ishaka ko bayibera abanyamuryango mu kubaka amazu ajyanye n’igihe, inyuza ibikorwa byayo mu masambu yabo.

Koperative “Va mu Mwijima”, imaze kugira abanyamuryango 32, ikora ibikorwa byo gukata ibibanza n’imihanda, ariko ikaba itagira ibiro, ntiyumvikana n’abaturage bamwe mu bikorwa ikorera mu masambu yabo, kuko bavuga ko ibangiriza.

Uko ikibazo giteye

Iyi koperative yasabye abaturage batuye mu kagali ka Cyaruzinge kwishyirahamwe bakubaka amazu agendanye n’igihe, ikahacisha imihanda inyura hagati y’amazu yabo kugira ngo batazagurirwa amasambu yabo n’abaturutse ahandi.

Cyakora bamwe mu baturage banze gushyigikira icyifuzo cy’abashinze iyo koperative, ngo kuko basanga bashaka kubimura ku ngufu kugira ngo n’ibarambirwa bagurishe ibyabo hasigaranwe n’abifite.

Iyi koperative yananiwe kumvikana n’abaturage irangije yirara mu mirima yabo icamo imihanda n’ibibanza itemagura n’insina zabo.

Abaturage bamwe baguye mu kantu

Nsengiyumva Augustin, umwe mu baturage wa Cyaruzinge, avuga ko nta bisobanuro bihagije abaturage bahawe kugira ngo babe batanga ubutaka bwabo ngo bunyuzwemo imihanda.

Nsengimana ati “ Nk’abaturage ntitwanze ko hakorwa ibikorwa by’iterambere, ariko ikibazo ni uko ibikorwa by’umuturage byangizwa ntibyishyurwe, kandi gushyirwa muri koperative bikaba ku ngufu.”

Iyi koperative, Nsengimana avuga ko yamusabye gucisha umuhanda mu isambu ye, arabemerera ariko n’aho yabahaye barengejeho banangiza insina ze n’ibiti byari bihateye.

Iki kibazo ahuriyeho na Kamegeri Faustin, we wasabwe gusenya inzu ye kugira ngo hacemo umuhanda kandi nta ngurane ahawe, ngo basanga koperative itagakwiriye gukora ibikorwa nk’ibyo itabanje kugaragaza amafaranga yo kwishyura abaturage.

Abaturage kandi bakomeza bavuga ko mu ikatwa ry’iyo mihanda inyuzwa mu masambu yabo, bidakorwa kimwe kuri bose, kuko hari abo bavuga ko bakomeye imihanda itanyuzwa mu masambu yayo. Batanga urugero rw’isambu ya perezida wa koperative, ngo yanze gucishamo umuhanda kandi ngo bigaragra ko hagombaga kunyuzwa umuhanda umanuka uhura n’indi.

Usibye ibyo ngo hari n’amafaranga ibihumbi 170 bakwa iyo ugiye kubaka inzu n’ibihumbi 90 yo kunyuza umuhanda imbere y’umuturage runaka.
Ikindi kandi, abaturage bavuga ko nta nzobere ishinzwe gukata iyo mihanda bikorwa n’ubundi na Perezida wa koperative.

Aho imihanda inyura hari ibikorwa by'abaturage bihangirikira kandi nta bwishyu bategereza

Nganirwa Emmanuel, Perezida wa koperative ya Cyaruzinge “Va mu mwijima”, igurisha ibibanza no gukora imihanda, avuga ko bafashe icyemezo cyo kwiteza imbere mu kagali kabo bakubaka amazu meza ajyanye n’igihe, ariko ngo kuba hari abaturage bagiye bangirizwa insina zabo n’indi myaka, nta kubyishyurwa kuko byakozwe ku nyungu za bose kugira ngo ibikorwa by’iterambere bibagereho, ati “ Hari abaturage batinda kumva ibyiza dushaka kubagezaho.”

Avuga ko abamaze kwitabira iki gikorwa cyo kwemera ko hacishwamo imihanda bagera ku kigereranyo cya 80%, naho 20% basigaye bakaba abo yita ko bagifite imyumvire mike.

Uyu muyobozi wa Koperative avuga ko ubuyobozi bw’Akarere ka Gasabo bwabasabye kwiyumvikanira ubwabo ku bijyanye no kuba abaturage bakwemera ko hacishwamo imihanda, kandi nta n’ingurane bahawe mu byakwangizwa byose.

Nduwayezu Alfred, Umunyamabanga Nshingabikorwa w’Umurenge wa Ndera, aganira na IGIHE, yavuze ko iki kibazo atakinjiramo cyane ngo kuko kireba abaturage ubwabo basabye ko bakwiyumvikanira bakubaka amazu ajyanye n’igihe ndetse hagacishwa imihanda myinshi muri utwo duce.

Nk’ubuyobozi bw’Umurenge bwabahaye imashini zo gukata imihanda, ibijyanye n’ibibazo byagiye bivukamo byo kwangiza imyaka y’abaturage basabye ubuyobozi bwa koperative kumvikana n’abo bangirije.

Nganirwa Emmanuel, Perezida wa koperative ya Cyaruzinge “Va mu mwijima”

Amafoto Faustin Nkurunziza

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO