IGIHE.com > Amakuru > U Rwanda
Gatsibo: Abakoze Jenoside barasabwa gutanga amakuru y’ahari imibiri y’abishwe

Gatsibo: Abakoze Jenoside barasabwa gutanga amakuru y’ahari imibiri y’abishwe


Yanditswe kuya 12-04-2013 - Saa 18:07' na James Habimana

Ubuyobozi bw’akarere kaGatsibo burahamagarira abireze bakemera icyaha kugaragaza no gutanga amakuru y’ahari imibiri y’abishwe muri Jenoside yakorewe Abatutsi ngo bashyingurwe mu cyubahiro.

Akarere ka Gatsibo kasabye abafite amakuru y’ahari imibiri itaraboneka nyuma y’aho imibiri isaga 69 yashyinguwe mu rwibutso rwa Jenoside rwa Kiziguro kuri uyu 11 Mata, amakuru yatanzwe n’abarokotse Jenoside abagize uruhare mu kubica barinumiye.

Ruboneza Ambroise, umuyobozi w’Akarere ka Gatsibo, avuga ko abavandimwe b’abishwe n’izindi nshuti aribo bagize uruhare mu kugaragaza ahari iyo imibiri.

Aganira na IGIHE Ruboneza yagize ati “Uko byagenda kose ntituzahagarika gukomeza gukangurira abireze bakemera icyaha gutanga amakuru, ibi kandi turizera ko bigiye gukomeza guhabwa ingufu n’ibi biganiro byashyizwe ku rwego rw’Imidugudu, aho bazakomeza kwerekwa ko gutanga amakuru aribyo bibaha amahoro muri bo.”

Imibiri yashyinguwe kuri uyu wa 11 Mata, yavanywe mu Mirenge ya Kiramuruzi, Murambi, Kiziguro n’ahandi, abenshi muri bo bakaba barishwe tariki ya 10 Mata 1994 muri Paruwasi ya Kiziguro ubwo interahamwe zari zaratojwe n’uwari Burugumesitiri wa Komini Murambi, ziraraga mu Batutsi bari bahahahungiye.

Iki gikorwa cyitabiriwe n’abavandimwe, inshuti n’abahagarariye amadini muri aka karere ka Gatsibo, cyabanjirijwe n’umunota wo kwibuka imibiri isaga ibihumbi 11 ishyunguwe muri rwibutso rwa Kiziguro.

Komini Murambi ni imwe mu zari zigize Perefegitura y’Umutara, hiciwe Abatutsi benshi cyane cyane muri Paruwasi ya Kiziguro, bigizwemo uruhare na Burugumesitiri Gatete Jean Baptiste wari waratoje interehamwe kugeza ubu akaba afungiwe Arusha, aho yahanishijwe igifungo cya burundu.

Ruboneza Ambroise, umuyobozi w’Akarere ka Gatsibo
Ku rwibutso rwa Kiziguro
Uwributso rushyinguyemo imibiri y'abazize Jenoside yakorewe Abatutsi
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO