IGIHE.com > Amakuru > U Rwanda
Gisagara: Munyakayanza yishwe anizwe, ashinjwa kwiba inyanya

Gisagara: Munyakayanza yishwe anizwe, ashinjwa kwiba inyanya


Yanditswe kuya 13-04-2013 - Saa 13:00' na Deus Ntakirutimana

Munyakayanza Teophile wari utuye mu murenge wa Rwaza mu karere ka Gisagara yishwe anizwe na Bangamwabo Jean Bosco amushinja kumwiba inyanya mu ijoro ryo ku wa kane tariki ya 11 Mata 2013.

Nk’uko tubikesha urubuga rwa polisi yigihugu, ubuyobozi bwa Polisi mu karere ka Gisagara bwatangaje ko ngo mbere y’uko ubu bwicanyi buba, Bangamwabo yari aryamiye amajanja mu murima we w’inyanya kugira ngo arinde abajura bari bamaze igihe bitwikira ijoro bakamwiba.

Bangamwabo yavuze ko ubwo yari mu murima we araririye inyanya ze, ngo zari zimaze igihe zibwa, yaje kurabukwa umuntu ahagana saa saba zijoro arimo agendagenda mu murima nyuma aza no kumwirukankana, ari na bwo yaje kumuta ku munigo kugeza ubwo ashiriyemo umwuka.

Bangamwabo yiyemerera kuba yarishe Munyakayanza ngo n’ubwo atari abigambiriye kuko ngo yitabaraga. Polisi yaje kumenya aya makuru nyuma yuko bamwe mu baturanyi batabaye ubwo bumvaga gutaka kudasanzwe kwa nyakwigendera.

Umuvugizi wa Polisi mu ntara y’amajepfo Chief Supt. Hubert Gashagaza nyuma yo kwamagana iki gikorwa, avuga ko ari ubunyamaswa, yasabye abaturage kwirinda kwihanira bityo uwarenganijwe cyangwa uwibwe akihutira kujyana ikirego mu nzego z’ubutabera. Yakomeje asaba abaturage muri iyo ntara kwihangira imirimo ishobora kubateza imbere, kurusha kumara amasaha menshi bashyize amaboko mu mifuka, ari na byo biviramo bamwe kwirirwa bashakisha abo bakwiba.

Gashagaza yasabye abaturage kugira umuco wo guhanahana amakuru ku gihe, kugira ngo bene ibi byaha by’ubwicanyi ndetse n’ibindi bitandukanye bibashe kurwanywa no gukumirwa.

Mu gihe Bangamwabo yahamwa n’iki cyaha cyo kwihanira byavuyemo urupfu, azahanishwa igihano cy’igifungo cya burundu nk’uko bitegangwa n’ingingo ya 140 yo mu gitabo cy’amategeko ahana y’ u Rwanda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO