IGIHE.com > Amakuru > U Rwanda
Gutwika imirambo byemejwe

Gutwika imirambo byemejwe


Yanditswe kuya 15-11-2012 - Saa 11:14' na Jotham Ntirenganya

Inteko Ishinga Amatetegeko y’u Rwanda, yemeje itegeko rishyigikira uburyo bwo gutwika imirambo nk’ubundi buryo bwo gushyingura kugira ngo hazigamwe ubutaka hanarengerwa ibidukikije.

Iri tegeko ritanga uburenganzira ku muntu wese uzifuza ko umuntu we wapfuye yashyingurwa amaze gutwikwa hakabikwa ivu, nk’uko amakuru dukesha The New Times abigaragaza.

Agaragaza icyo iri tegeko rizafasha imbere y’inama rusange y’Inteko yari iyobowe na Rose Mukantabana ku wa kabiri w’iki cyumweru, Umuyobozi wa komite ishinzwe imibereho myiza mu Nteko, Mwiza Esperance yavuze ko gutwika imirambo atari agahato ko ahubwo bizajya bituruka ku bushake bwa buri muntu.

Yongeyeho ati ”Mu gihe itegeko rizaba ryatangiye gushyirwa mu bikorwa irimbi ryose riri mu Rwanda rizaba rifite aho imirambo itwikirwa.”

Kuri ubu mu Rwanda Abahinde ni bo bamenyereye gushyingura imirambo bayitwitse kuko biri no mu muco wabo.

Nk’uko itegeko ribiteganya, Akarere kazajya gashyiraho ahantu hazwi hagenewe gushyirwa umuyonga w’umurambo wamaze gutwikwa, icyakora mu Buhinde bo ivu barijugunya mu biyaga n’inzuzi cyangwa inyanja.

Iri tegeko rikomeza rivuga ko umuntu ufite uburenganzira kuri ‘Nyakwigendera’ azajya agaragaza aho yifuza gutwikira umurambo ndetse n’aho gushyira ivu, ariko akagaragaza impapuro yahawe n’abaganga zerekana impamvu y’urupfu rwa Nyakwigendera.

Abadepite babyakiriye bate?

Depite Kantengwa Juliana, ati ”Aho kongera umubare w’amarimbi, hashyirweho ahantu henshi ho gutwikira imirambo. Ibyo byarengera ubutaka.”

Gusa, Mwiza yagaragaje ko umuco Abanyarwanda basanganywe utabemerera kumva vuba uburyo bwo gutwika imirambo, kuko asanga no mu gihe iri tegeko ryigwagaho abantu babyumvaga barumirwaga bagatangara cyane.

Umuhinde waganiriye na The New Times avuga ko iyo batwika umurambo bifashisha ibiro 100 by’inkwi bagatwikana n’amavuta y’inka bakongeramo n’amase kugira ngo ntibibangamire ibidukikije, nyuma y’ amasaha abiri umurambo ugahinduka ivu.

Minisitiri w’umuco ni we uzagena uburyo imirambo izajya itwikwamo ndetse n’aho iryo vu rizajya rishyirwa hagendewe ku gitabo cy’ amategeko y’u Rwanda mu ngingo yaryo ya 32.

Gusa, hari umuhinde utarashatse kwivuga amazina yabwiye The New Times ko mu mwaka ushize bashatse gutwika umurambo, nyamara REMA(Rwanda Environmental Management Authaurity), yarabangiye ku mpamvu yise izo kurengera ibidukikije.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO