IGIHE.com > Amakuru > U Rwanda
Hari abatawe muri yombi bazira isesereza n’ipfobya rya Jenoside

Hari abatawe muri yombi bazira isesereza n’ipfobya rya Jenoside


Yanditswe kuya 9-04-2013 - Saa 05:22' na IGIHE

Polisi rero irihanangiriza abantu bakomeje kugaragaza ingenga bitekerezo n’amagambo akomeretsa abacitse kwicumu rya jenoside yakorewe abatutsi aho kubahumuriza no kubafata mu mugongo kubireka.

Polisi y’u Rwanda dukesha iyi nkuru, ibi ibitangaje nyuma y’ aho mu ijoro ryo kuwa 7 rishyira uwa 8 Mata 2013 mu Karere ka Kicukiro Umurenge wa Nyarugunga uwitwa Mukanoheri Alice yabwiye uwitwa Isingizwe Janine amunyuzeho iwe mu rugo baganira ati “Harya ngo barabeshya ngo barabamaze kandi nkibona amazuru yabo”.

Na none mu Karere ka Nyarugenge, Umurenge wa Muhima uwitwa Nzamwitakuze Alexis mu gihe yarimo atanga ubutumwa ku ndangurura majwi yabajijwe na Ntubabare Catheline aho igikorwa cyo kwibuka kiri bubere maze akamusubiza ati ”Wowe ko uri Umuhutukazi urabishakira iki? Uziryamire ibyo bireba Abatutsi”, si aha gusa ariko kuko no mu Karere ka Nyaruguru uwitwa Rwanga Wenceslas yatonganye na Nyirahora Vestine akamubwira ngo azamusangisha abana be bishwe muri Jenoside. Aba bose bakaba bari mu maboko ya Polisi mu gihe hagikorwa iperereza.

Na ho mu Karere ka Ngororero, Umurenge wa Gatumba Umukecuru witwa Umugiraneza Vestine w’imyaka 45 yatemewe inka n’abantu bataramenyekana bayisanze mu kiraro ubwo yari yitabiriye ibiganiro byo kwibuka Jenoside atuyemo.

Icyaha nikiramuka kibahamye bazahanishwa ingngo ya 116 Ihanwa ry’icyaha cy’ihakana n’ipfobya rya Jenoside yakorewe Abatutsi umuntu aho bavuga ko umuntu wese agaragaje mu ruhame haba mu mvugo, mu nyandiko, mu mashusho cyangwa ubundi buryo ubwo ari bwo bwose ko atemera Jenoside yakorewe Abatutsi, uyipfobya, ugerageza gusobanura cyangwa kwemeza ko yari ifite ishingiro cyangwa uhishira cyangwa wonona ibimenyetso byayo ahanishwa igifungo kirenze imyaka itanu (5) kugeza ku myaka icyenda (9).

N’ingingo ya 135 Ingingo ya 135 ivuga umuntu wese ukoze icyaha cy’ingengabi tekerezo ya jenoside n’ibindi byaha bifitanye isano na yo ahanishwa igifungo kirenze imyaka itanu (5) kugeza ku myaka icyenda (9) n’ihazabu y’amafaranga y’u Rwanda kuva ku bihumbi ijana (100.000) kugeza kuri miliyoni imwe (1.000.000).

Twabibutsa ko ubwo yagezaga ijambo ritangiza imihango yo kwibuka Jenoside yakorewe Abatutsi, Perezida Kagame yavuze ko jenoside ari icyaha cyibasira inyoko muntu kitagira umupaka kandi kidasaza akaba ariyo mpamvu u Rwanda ruzakomeza gukurikirana abakoze Jenoside aho baba bari hose bagashyikirizwa ubutabera, ndetse n’abapfobya n’abahakana jenoside bakarwanywa aho baba bari hose.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO