IGIHE.com > Amakuru > U Rwanda
Ibihangano bigomba kunganira Kawa, Icyayi n’amabuye y’agaciro -Dr Harebamungu

Ibihangano bigomba kunganira Kawa, Icyayi n’amabuye y’agaciro -Dr Harebamungu


Yanditswe kuya 31-01-2013 - Saa 07:20' na Emmanuel Kanamugire

Umunyamabanga wa Leta ushinzwe amashuri abanza n’ayisumbuye, Dr Harebamungu Mathias, avuga ko ashyigikiye ko ibihangano bishingiye ku buvanganzo bigomba gutezwa imbere bigatanga umusaruro ugeza ku bukire abahanzi, bikinjiza amadovize nk’Ikawa, Icyayi n’amabuye y’agaciro mu Rwanda.

Gasana Jerome, Umuyobozi wa WDA, Dr Harebamungu Mathias Umunyamabanga wa Leta muri MINEDUC, Dorcy Rugamba Umuyobozi wa RAI

Dr Harebamungu yagaragaje ko ashyigikiye ubuhanzi mu nama yabereye i Kigali ku wa 30 Mutarama, ihuje abakozi b’Ikigo gishinzwe guteza imbere ubumenyingiro (WDA), abahanzi bo mu Rwanda n’abaturutse mu bihugu bitandukanye bafite aho bahuriye n’ibijyanye n’umuco w’ubuhanzi, abayobozi b’ibigo by’amashuri n’izindi nzego zitandukanye mu Rwanda.

Dr Harebamungu Mathias Umunyamabanga wa Leta muri MINEDUC

Muri iyi nama yateguwe n’umuryango Rwanda Arts Initiative, Umuryango nyarwanda ugamije guteza imbere ubuhanzi bushingiye ku buvanganzo, ku bufatanye na WDA, Dr Harebamungu yatangaje ko ubuhanzi ari inkingi y’amajyambere ahamye, ko bukwiye kubyazwa umusaruro kugera no ku rwego mpuzamahanga, bigakiza nyira wo bukunganira urwego Kawa, Icyayi n’amabuye y’agaciro bifitiye akamaro ubukungu bw’u Rwanda mu kwinjiza amadovize.

Yavuze ko mu bahanzi babaye ibirangirire mu myaka yashize, babaga bafite indi mirimo bakora bigaragara ko nta mahirwe menshi babubonagamo.

Harebamungu yatangaje ko ubu hashyirwa imbaraga mu kuvugurura ishuri ry’ubugeni n’ubuhanzi ryo ku Nyundo, rigashakirwa ibikoresho n’abarimu babifitiye ubushobozi.

Yasabye urubyiruko kugana muri rusange amashuri y’ubumenyingiro batitaye ku myumvire ya bamwe ko kuminuza ari byo bikiza.

Gasana Jerome, Umuyobozi Mukuru wa WDA

Umuyobozi mukuru wa WDA, Gasana Jérôme yavuze ko nyuma y’uko hatangijwe ibyo guteza imbere gukora imisatsi, guteza imbere ububaji, amahoteli n’ubukerarugendo, ubu hagezweho guteza imbere ubuhanzi bushingiye ku buvanganzo, burimo gukora filime, kwandika indirimbo, kuririmba, gukina amakinamico n’ibindi.

Gasana yatangaje ko usibye kwigisha gucuranga ibikoresho by’umuziki ubu hatekerezwa uburyo ibikoresho by’umuziki byajya bikorerwa mu Rwanda, bikazashyirwa mu bikorwa mu myaka itarenze ibiri iri imbere.

Iyi nama yabanjirijwe n’ibikorwa byari bigamije gukangurira urubyiruko rwo hirya no hino mu gihugu kuba rwakwitabira guhindura ubuhanzi bushingiye ku buvanganzo umwuga.

Ku wa Gatandatu ushize urubyiruko ruba mu kigo ngororamuco cya Iwawa rugizwe n’abasore n’inkumi barenga 2,000 beretswe filime ndetse hanakorwa ibiganiro bigamije kubakangurira kwitabira ubuhanzi bushingiye ku buvanganzo. Ibi bikorwa byakomereje i Musanze, i Save ndetse n’i Kirehe.

Dorcy Rugamba Umuyobozi wa RAI

Umuyobozi wa Rwanda Arts Initiative Dorcy Rugamba, yatangarije IGIHE ko mu gutegura ibi bikorwa by’ubukangurambaga ku rubyiruko hari hagamijwe kurugaragariza ko mu myuga ibyara inyungu, harimo n’ubuhanzi bushingiye ku buvanganzo burimo gukora sinema, ikinamico ndetse n’indi mirimo iyiherekeza.

Kuva mu gihe gishize mu Rwanda harashyirwa imbaraga zikomeye mu myigishirize y’imyuga, aho hamaze gushingwa amashuri atanga inyigisho ku bumenyingiro n’andi atandukanye kuri ubu yaravuguruwe bigizwemo ahanini uruhare na WDA.

Amafoto : Steven Ndizeye

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO