IGIHE.com > Amakuru > U Rwanda
Ibiyaga bya Bugesera bikomeje guhitana abantu abaturage barasabwa kubyitondera - Polisi

Ibiyaga bya Bugesera bikomeje guhitana abantu abaturage barasabwa kubyitondera - Polisi


Yanditswe kuya 31-01-2013 - Saa 11:43' na ORINFOR

Umuvugizi wa Polisi mu Ntara y’Iburasirazuba, Supt Benoit Nsengiyumva, arahamagarira aboga mu biyaga n’imigezi by’Akarere ka Bugesera kubyirinda, kuko hari abntu bakomeje kubigwamo.

Supt Benoit Nsengiyumva yabitangaje nyuma yo kumva urupfu rw’umunyeshuri w’ishuri rikuru nderabarezi rya Kigali warohamye mu kiyaga cya Cyohoha y’epfo ku wa mbere hashize ahita apfa.

Ku itariki ya 28 Mutarama 2013 saa tanu n’igice z’amanywa hamenyekanye inkuru ibabaje y’umusore witwa Nkundimana Emmanuel ukomoka mu karere ka Nyaruguru, wari urangije umwaka wa mbere mu Ishuri rikuru Nderabarezi rya Kigali ( KIE ), arohamye mu kiyaga cya Cyohoha y’Epfo.

JPEG - 18.1 ko
Boga mu biyaga nta muntu uri hafi wabatabara bagize ikibazo bakaba bapfira mu kiyaga

Nk’uko byatangajwe n’Umunyamabanga Nshingwabikorwa w’Umurenge wa Kamabuye, Muyengeza Jean de Dieu, wabashije kugera aho uwo munyeshuri yarohamiye, ngo Nkundimana yari agiye gusura inshuti ye ituye mu murenge wa Kamabuye witwa Bikorimana Noel, bajyana kuri icyo kiyaga batembera.

Nkundimana ngo yabwiye mugenzi we ko azi koga, barogana, bava ku mwaro bajya mu mazi hagati, hanyuma Nkundimana aza gutakambira mugenzi we ko ananiwe, undi na we aramusanganira agerageza kumwogana ariko amurusha imbaraga bacubirana hasi mu kiyaga, nyakwigendera aherayo kuko mugenzi we yananiwe kumuvanayo ngo amugeze ku nkombe.

Nk’uko umunyamabanga nshingwabikorwa w’Umurenge wa Kamabuye yabitangarije Imvaho Nshya ngo abaturage bakeka ko ashobora kuba yarafashwe n’ibinya (ibyo bita imbwa kubakora siporo) ari mu kiyaga, kuko yatakambiye mugenzi we ko ananiwe, agerageza kumurohora biranga.

Umuvugizi wa Polisi mu ntara y’IBurasirazuba, Superitendant Benoit Nsengiyumva, akimara kumva iyo nkuru y’uwo munyeshuri warohamye, ubwo yari mu murenge wa Kamabuye, yasabye abaturage kwitondera koga mu biyaga by’Akarere ka Bugesera, kuko bikunze guteza impanuka zitwara ubuzima bw’abantu, byaba mu kurohama cyangwa kuribwa n’inyamaswa zibirimo.

Ingona nazo zihitana bamwe mu bagiye muri ibyo biyaga byo mu Bugesera

Nsengiyumva ati “Icyo dukangurira abaturage ni uko bakwiye kwirinda kujya ku biyaga koga, kuko bibamo inyamaswa ziryana, kandi biba birimo isayo, nta n’uri hafi wabatabara mu gihe bagiriye ikibazo mu mazi.”

Hashize igihe kitari gito ibiyaga uko ari 9 byo mu karere ka Bugesera bitwara ubuzima bw’abaturage, abenshi baribwa n’ingona abandi bakarohama bagiye koga.

Ubuyobozi na bwo mu nama zitandukanye ntibuhwema gukangurira abaturage kwitondera ibyo biyaga, ariko ntihagipfa gushira ukwezi utumvise uwo ingona cyangwa imvubu byakomerekeje cyangwa byambuye ubuzima.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO