IGIHE.com > Amakuru > U Rwanda
Ihuriro rya kaminuza nyafurika ryo guteza imbere ubuhinzi ryatangije ishami ryaryo mu Rwanda

Ihuriro rya kaminuza nyafurika ryo guteza imbere ubuhinzi ryatangije ishami ryaryo mu Rwanda


Yanditswe kuya 30-01-2013 - Saa 07:46' na Jean Baptiste Micomyiza

Minisitiri w’Ubuhinzi n’Ubworozi mu Rwanda Dr. Kalibata Agnes, ku wa 29 Mutarama 2013 yafunguye ku mugaragaro ishami ry’u Rwanda ry’ihuriro nyafurika rya za kaminuza rigamije guteza imbere ubuhinzi rizwi nka RUFORUM (Regional Universities Forum for Capacity Building in Agriculture).

Ku ruhande rw’u Rwanda, kugeza ubu kaminuza yo mu Rwanda iri muri iri huriro ni Kaminuza Nkuru y’u Rwanda NUR.

Minisitiri Kalibata A. n'umuyobozi wa kaminuza nkuru y'u Rwanda Prof Lwakabamba Silas mu muhango wo gufungura ku mugaragaro ishami rya RUFORUM mu Rwanda

Minisitiri Karibata yavuze ko iri huriro rije rikenewe, kuko rikoze neza ryazagira uruhare mu kuzamura ubuhinzi bw’u Rwanda bikagira akamaro kanini mu iterambere ry’ubukungu bw’u Rwanda. Ati “U Rwanda rufite gahunda yo gukomeza kuvana abaturage mu murongo w’ubukene nk’uko umwaka ushize rwakuyemo abagera kuri miliyoni. Ihuriro nk’iri rigamije iterambere ry’ubuhinzi nta gushidikanya ko rikoze neza ryatuma ubuhinzi butera imbere, abahinzi bakunguka bityo tugakomeza gutera imbere mu bukungu.”

Impuguke mu buhinzi zakunze kunengwa ko zikorera akazi ko mu biro aho gusakaza ubumenyi bwabo mu bahinzi ngo buteze imbere uhuhinzi. Ku bwa Dr. Uwituze Solange, umuyobozi w’ishami ry’ubuhinzi muri kaminuza nkuru y’u Rwanda akaba n’umuyobozi wungirije w’abayobozi b’amashami y’ubuhinzi muri kaminuza ziri muri RUFORUM, ngo bagiye guhagurukira iki kibazo.

Agaragaza icyo iri huriro rizafasha, ati “Ishami rya RUFORUM ryafunguwe mu Rwanda zimwe mu ntego zaryo ni ukwegera abaturage bakagezwaho ubumenyi bwo guteza imbere ubuhinzi. Iri huriro rizatuma abashakashatsi, abahinzi, abaterankunga, abacuruzi n’abandi bose bafite aho bahurira n’ubuhinzi bazajya bakoranira hafi hagamijwe kuzamura urwego rw’ubuhinzi mu Rwanda.”

Impuguke mu buhinzi zari mu muhango wo gufungura ku mugaragaro ishami ry'u Rwanda rya RUFORUM

RUFORUM ryashinzwe mu mwaka wa 2004, ritangirira mu bihugu bitarenze bitanu ariko ubu rikorera muri za kaminuza zigera kuri 30 mu bihugu bigera kuri 17. Mu itangizwa ry’ishami ry’u Rwanda ry’iri huriro hari abayobozi batandukanye muri za kaminuza, mu miryango nterankunga, mu bucuruzi, mu nzego z’abahinzi, mu buyobozi bw’iri huriro ku rwego rwa Afurika no mu buyobozi bw’inzego z’ubutegetsi bwite za leta y’u Rwanda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO