Imbuto Foundation yizihije isabukuru y’imyaka 10

Kuri uyu wa Kane tariki ya cyenda Kanama 2012, muri Serena Hotel Imbuto Foundation yizihije imyaka 10 imaze ikora ibikorwa bitandukanye, birimo guteza imbere uburezi bw’umwana w’umukobwa, kurihirira amashuri abana b’abahanga batishoboye, gufasha imiryango itandukanye, uburyo bwo kwirinda icyorezo cya SIDA, guhashya malariya n’ibindi.

Uyu mahango witabiriwe n’abantu batandukanye barimo abafatanyabikorwa babo, ndetse n’abagiye bafashwa n’uyu muryango mu buryo butandukanye.

Ibikorwa bya imbuto foundation byatangiye mu mwaka wa 2002, bitangira yitwa PACFA, yari igamije cyane cyane kurwanya icyorezo cya SIDA, ndetse no kugarurira icyizere ababana n’ubwandu bwa virusi itera SIDA.

Nyuma y’imyaka itanu y’ibikorwa bya PACFA, nibwo yaje guhinduka Imbuto Foundation, ndetse ibasha no gukomeza kwagura ibikorwa byayo.

Muri uyu muhango wo kwizihiza imyaka icumi Imbuto Foundation imaze, hatanzwe ubuhamya n’abantu batandukanye bafashijwe n’uyu muryango.

Niyonzima Jean Damascène barihiye amashuri, Honorée ubana n’ubwandu bwa virusi itera SIDA bafashije binyuze mu muryango Family Package, ndetse na Nshimiyimana François wahawe igihembo na Imbuto Foundation kuko yihangiye imirimo.

Aba bose batanze ubuhamya bashimiye cyane Jeannette Kagame washinze Imbuto Foundation, ku bw’ibikorwa bye by’urukundo, ku bufasha butandukanye yabahaye ndetse n’ubumuntu abagaragariza, bamwizeza ko ineza yabagiriye nabo ariko bazagenzereza abandi bababaye.

Jeannette Kagame n'abo bari kumwe mu kwizihiza imyaka 10 ya Imbuto Foundation

Jeannette Kagame, mu ijambo rye yashimiye cyane abitabiriye kiriya gikorwa, abafatanya bikorwa babo ndetse n’abakozi bose ba Imbuto ku bw’itange bwabo mu mirimo yabo ya buri munsi.

“Imbuto Foundation yishimiye kubashimira ihereye ku bayobozi b’igihugu ndetse n’imiryango itandukanye ku buryo mwadufashije”.