IGIHE.com > Amakuru > U Rwanda
Impamvu abanyamakuru bamaze kuba intyoza bava kuri Radio Salus

Impamvu abanyamakuru bamaze kuba intyoza bava kuri Radio Salus


Yanditswe kuya 15-03-2013 - Saa 02:14' na Muhirwa Térence

Kuva Radio Salus yashingwa mu mwaka wa 2005, abantu benshi bakomeje kwibaza impamvu abanyamakuru bayo iyo bamaze kuba intyoza mu mwuga w’itangazamakuru bayicika.

Mu gusubiza izi mpungenge bisaba kujya mu mateka y’ishingwa ry’iyi Radiyo ya Kaminuza Nkuru y’u Rwanda i Butare.

Ubwo yatangiraga ibiganiro byayo mu kwezi k’Ugushyingo 2005 ku bufatanye na UNESCO, imwe mu ntego zayo yari uguha ubumenyingiro abanyeshuri bo mu Ishuri ry’Itangazamakuru rya Kaminuza Nkuru y’u Rwanda (EJC), kugira ngo itangazamakuru mu Rwanda rizabashe kubona abanyamakuru b’umwuga barikora uko bikwiriye.

Mu myaka itatu gusa nyuma yo gufungura imiryango kw’iyi radio, abanyamakuru barenga 100 bari bamaze kubona ubwo bumenyi mu itangazamakuru, ndetse bashakishwa n’ibitangazamakuru bitandukanye byo mu Rwanda kubera ubumenyi n’ubunararibonye bari bamaze kuvana kuri Radio Salus.

Uko umwaka utashye, abarangije muri Kaminuza amashuri yabo mu cyiciro cya kabiri basimbuzwa abandi banyeshuri bashya bakeneye na bo kwihugurira kuzakora kuri Radio.

Iri simburana niryo ryayobeye abantu benshi bibwira ko Radio Salus igira uburangare maze abanyamakuru b’abahanga bakayicika. Ibi rero si ko biri kuko mu nshingano zo kwigisha, uhawe ubumenyi akarangiza amashuri ye ya Kaminuza, ahabwa impamyabumenyi ye akajya hanze gushaka akazi nk’abandi.

Gusa icyo Radio Salus yakemuye ku baba barayikozeho bakiri abanyeshuri ni uko ibitangazamakuru bitandukanye bihita bibaha akazi bwangu nta n’ibizamini bakoreshejwe kubera izina baba barubakiwe na Radio Salus, izina iyi radiyo yubatse mu gihugu no hanze yacyo.

Bamwe mu bo twavuga ni nko muri ORINFOR : Ndengeyingoma Jean Claude, Theoneste Nisingizwe, Rudakemwa Sangano, Bienvenu Redemptus, Umutoni Carine n’abandi bari mu banyamakuru beza kandi bakunzwe kuri Radio Rwanda na Televiziyo.

Mu bitangazamakuru byigenga na ho usanga bishimira gukoresha abanyamakuru baciye kuri Radio Salus. Urubuga rw’imikino kuri Radio 10, Flash, CFM, Isango Star n’ahandi bikunzwe kubera Jado Castar, Rutamu, Jado Dukuze n’abandi barezwe na Radio Salus.

Si mu mikino gusa kandi usangamo ingemwe zakuriye kuri Radio Salus, kuko mu myidagaduro, amakuru n’ibindi biganiro usanga hari amaradiyo wumva ugashaka kuyitiranya na Radio Salus kubera amajwi uba usanzwe uhamenyereye. Mike Karangwa, Isheja Sandrine, Claude Kabengera, Oswald Mutuyeyezu n’abandi, ni bamwe mu basize bubatse izina kuri Radio Salus utibagiwe Barada, Jado Fils n’abandi nk’abo.

Uku gukundwa kw’abanyamakuru bo kuri Radio Salus ni na ko kwatumye mu gihe cyose iyi Radio yagiraga ibizazane bya tekinike, abakunzi bayo barakomezaga kuyinambaho ku buryo aho ikiriye yabasubiranye aho yumvikanira hose. Inkuru zicukumbuye n’ibiganiro birimo ubwenge akaba ari ibanga rituma iyi Radiyo y’abanyabwenge iza ku isonga mu zikunzwe.

Radio Salus, Radio ya Bose, ikaba yumvikanira kuri 97.0 no kuri 101.9, ndetse no ku murongo wa internet www.salus.nur.ac.rw. Ifite kandi n’urukuta kuri facebook rumaze gukundwa n’abatari bake, kuri www.facebook.com/Radiosalus. Nawe tuguhaye karibu.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO