IGIHE.com > Amakuru > U Rwanda
Impanuka z’ibinyabiziga zahitanye Abanyarwanda batari bake muri 2012

Impanuka z’ibinyabiziga zahitanye Abanyarwanda batari bake muri 2012


Yanditswe kuya 28-12-2012 - Saa 14:49' na Emmanuel Kwizera

Umwaka wa 2012 wabayemo impanuka ziturutse ku binyabiziga zitandukanye mu bice bitandukanye by’u Rwanda no ku Banyarwanda batandukanye, abenshi bakaba barahasize ubuzima naho abandi zibatera ubumuga butandukanye.

Muri iyi nkuru twegeranyije zimwe mu mpanuka zikomeye mu zo twabashije kumenya.

Ku ya 05 n’iya 06 Nyakanga : Impanuka zabaye kuri iyi minsi izo twamenye ni eshanu. Imwe muri zo yabereye muri Kigali mu Gatsata, aho ivatiri yagonze umubaji imuhereye ku maguru ikamutumbagiza mu kirere amanutse akubita umutwe mu kirahure ahita ajyanwa mu bitaro ku bw’amahirwe arakira.

Uyu mubaji yaragonzwe ku bw'amahirwe ararokoka

Ku ya gatanu Nyakanga mu karere ka Nyamasheke umuntu umwe yaguye mu mpanuka y’ubwato undi aburirwa irengero, ubwo batemberaga mu kiyaga cya Kivu. Abagenzi 10 barokowe na Polisi, abari mu bwato bose bakomoka mu murenge wa Gihombo bakaba bari bagiye mu bukwe bwabereye mu murenge wa Macuba.

Ku wa 05 Gashyantare, impanuka ya ‘Taxi Minibus’ yaberere mu Mudugudu wa Maremba mu Kagali ka Runyinya mu Murenge wa Hindiro mu Karere ka Ngororero yahitanye abantu batatu naho 12 barakomereka. yatewe n’umuvuduko ukabije watumye umushoferi ananirwa gukata ikorosi arenga umuhanda agonga igiti batatu barimo na we bahita bapfa.

Ku ya 10 Nzeri, aho imodoka zitwara abagenzi zisanzwe ziparika ahazwi nka Kicukiro Centre Mu Karere ka Kicukiro habereye impanuka yatewe n’ikamyo ya NPD Cotraco yaturukaga mu muhanda uva ku Rwibutso i Nyanza, yabuze feri igonga Coaster ebyiri, Hiace ebyiri, ivatiri imwe, moto ebyiri na velo moteri ebyiri, ihitana umumotari abandi bagera ku 10 bajyanwa kwa muganga ari inkomere. Kuko imodoka zose zari ziparitse zitegereje abagenzi, abari bamaze kuzigeramo bagiye baca mu birahuri by’imodoka barokoka batyo.

Ikamyo ya NPD COTRACO yagonze coaster ku Kicukiro

Ku wa 25 Gashyantare, imodoka ya Hiace ikorera kompanyi ya Sotra Tours yakoze impanuka, abantu bane barakomereka bikabije mu bantu 15 yari itwaye ubwo yavaga i Rubavu yerekeza i Kigali. Igeze i Musanze umushoferi wayo yataye umuhanda agonga iduka bitewe n’uburangare bw’umushoferi no gutwarira ku muvuduko ukabije kuko atari akibasha kubahiriza intera igomba gusigara hagati y’ibinyabiziga bibiri bishoreranye.

Umushoferi wari utwaye iyi modoka yataye umuhanda agonga iduka

Ku wa 28 Werurwe imodoka yo mu bwoko bwa RAVA4 yakoreye impanuka ku Kimihurura mu Karere ka Gasabo munsi ya Minisiteri y’Ingabo. Ubwo yazamukaga mu muhanda w’amabuye ishaka kwinjira muri kaburimbo, yahuye n’imodoka ya gisirikare, ishatse kuyibererekera yisanga muri metero 22 uturutse ku muhanda. Nta n’umwe wagize icyo aba.

Yisanze kuri metero 22 z'umuhanda

Ku wa 18 Nzeri, imodoka y’ivatiri yarimo Abanyarwanda yavaga mu Rwanda yerekeza i Kampala yagonganye n’ikamyo hafi y’Umujyi wa Masaka i Nkoni. Muri bane bari bayirimo abagore batatu bahise bapfa, umushoferi na we arakomereka bikomeye. Iyi ngo ishobora kuba yaratewe no kutamenyera imihanda yo muri Uganda, kuko ngo umushoferi w’Umunyarwanda ashobora kuba yaribeshye ku gice cy’umuhanda agomba kugendamo bityo agateza impanuka. Abari bari mu ikamyo ntacyo babaye n’ubwo imodoka yabo yangiritse.

Ku wa 12 Ugishyingo ubwo imodoka ya bus ya Sosiyeti KBS yavaga i Kigali yerekeza i Rusizi yakoreye impanuka mu Karere ka Kamonyi, umuntu umwe ahasiga ubuzima naho abagera kuri 27 barakomereka. Byatewe ko yananiwe gukata ikorosi riherereye haruguru gato y’ahari Urwibutso rwa Jenoside yakorewe Abatutsi i Kamonyi, irenga umuhanda.

Bisi ya KBS yakoze impanuka

Ku wa 17 Ukuboza : Mu Karere ka Kamonyi mu Murenge wa Runda Akagari ka Ruyenzi aho bita Nyagacaca imodoka yahitanye babiri batanu barakomereka bitewe n’imodoka y’ikamyo yo mu bwoko bwa Fuso yari itwaye umucanga yabuze feri ikagonga ikintu cyose yahuye na cyo harimo imodoka y’ivatiri yari iri hafi, iya Toyota ndetse na kiyosike ibona guhagarara.

Ku wa 28 Kanama : Ahitwa Gihundwe mu murenge wa Nzahaha mu karere ka Rusizi imodoka ya Minibus ifite ikirango cyo muri Repubulika Iharanira Demokarasi ya Congo CGO 4453 AA 22, iri mu muhanda uva Kamembe ukerekeza mu Bugarama yakoze impanuka yahitanye umwe naho 12 barakomereka bikomeye. Batandatu bakomeretse byoroheje bahita bataha iwabo muri Congo.

Iyi modoka yajyaga muri Congo

Ku wa 15 Ugushyingo, Karambizi Canisius wo mu karere ka Ruhango mu murenge wa Ruhango yagonzwe n’imodoka ya FUSO imuca amaguru ihita iburirwa irengero.

Yaragonzwe acika amaguru

Ku wa 10 Ugushyingo, ikamyo yaturukaga Kicukiro igana i Remera yabuze feri igeze muri rompuwe (rond point) ya Sonatube, mu gihe yari ibuze uko ikata ihitana umumotari. Ikamyo yaturutse Kicukiro ivuza amahoni, isanga uyu mu motari aparitse ihita imunyura hejuru ntiyanasamba.

Iyi ni yo yagonze umumotari ahita apfa

Ku wa 13 Nyakanga, abantu batanu bahitanywe n’impanuka y’imodoka yabereye mu Murenge wa Nyakiriba mu karere ka Rubavu. Iyi mpanuka yatewe n’imodoka yo mu bwoko bwa Tata yari ifite pulaki UAM 098V y’Ingande, yavaga i Kigali yerekeza mu Mujyi wa Gisenyi. Yacitse feri icakirana na tagisi mini bisi (ifite pulaki RAA 254 S) yavaga mu Mujyi wa Gisenyi yerekeza i Musanze. Abandi bagera kuri 14 barakomeretse harimo umunani bakomeretse mu buryo bukabije.

PNG - 381.9 ko
Tata yagonze tagisi

Imbere y’isoko ku Kicukiro Centre FUSO yagonze ibinyabiziga birenga 10. FUSO yamanutse yabuze feri ibanza kugonga ivatiri, na yo ihita igonga Tagisi yari itwaye abantu. Ivatiri yarakomeje igonga kwasiteri yari iparitse itegereje abagenzi. FUSO na yo yakomeje imanukana umuvuduko udasanzwe iba igonze indi tagisi yari iri imbere, bituma iyi tagisi na yo igonga moto esheshatu zari ziparitse zitegereje abagenzi.

Izi modoka zangiritse biturutse kuri FUSO imwe

FUSO yakomeje imanuka igonga indi kwasiteri (Coaster), bituma kwasiteri ita umuhanda ivogera ubusitani bw’Ikigo cy’Ishuri rya ETO Kicukiro igonga n’ipoto y’amashanyarazi iri aho hafi. FUSO yakomeje urugendo ihura n’imodoka y’Umunyamabanga Nshingabikorwa w’Umurenge wa Kicukiro iyigonga iyiganisha mu busitani bwa ETO Kicukiro, FUSO yo ikomeza kurusha imbaraga iyi modoka y’Umunyamabanga Nshingabikoirwa kugeza aho yayimenesheje urukuta (urupangu) rw’ikigo cya ETO yinjiramo imbere.

Ku wa 18 Nzeri, umumotari witwaga Théoneste yapfiriye mu kwishimira isubira ku ivuko ry’Ikipe ya Rayon Sports mu gikorwa cyo kwimuka kw’iyi kipe ijya i Nyanza. Abari muri uru rugendo bageze i Nyanza imodoka zirenga 100 zari zuzuye umuhanda zerekeza i Nyanza. Impanuka zoroheje, kubangamira abagenzi biri muri bimwe mu byaranze uru rugendo.

Ubwo Abareyo bishimiraga ko ikipe yabo isubiye ku ivuko hari uwahasize ubuzima

Ku wa 10 Ukwakira, Kamanzi Fredy w’imyaka itatu yagonzwe n’ikamyo ahita apfa mu Murenge wa Rwimbogo mu karere ka Rusizi. Ubwo uwo mwana yajyaga kwambuka umuhanda, abandi bana bane bari kumwe na we bagerageje kumurwanaho bagira ngo bamukize iyo modoka ariko kubera umuvuduko yari afite ahita akubitana n’iyo kamyo. Sezibera wari utwaye iyo kamyo yashatse kwiruka ariko abashinzwe umutekano wo mu muhanda baramufata.

Imodoka yagonze Kamanzi Freddy

Ku wa 17 Nzeri, umusore ukora akazi ko gukubura mu muhanda yagonzwe n’imodoka imukurura mu muhanda kugeza apfuye, iyi mpanuka ikaba yarabereye kuri metero 30 uvuye ku kigo cy’Igihugu cy’Ibarurishamibare.

Ahabereye impanuka

Mu ijoro ryo ku wa 26 Gicurasi, Umurerwa Sylvie wo mu mujyi wa Kigali yagonzwe n’imodoka ku buryo bukomeye. Uwamugonze yari yasinze. Nyuma yo gukomereka mu mutwe bamwe mu bari aho bibwiye ko yahise yitaba Imana, gusa ku bw’umutima utabara, umuhanzi Bull Dog n’Umunyamakuru Mc Tino bahise bihutira kumugeza kwa Muganga ngo ahabwe ubufasha bwihuse, ariko Imana yari yamaze kumwisubiza.

Sylvie yahitanywe n'imodoka

Mu gitondo cyo ku wa 17 Gicurasi, mu Rwanda ni bwo hatangiye kumenyekana amakuru y’uko Patrick Mafisango, umukinnyi wakiniraga ikipe ya Simba yo muri Tanzaniya, akaba kandi yari n’umukinnyi w’Ikipe y’igihugu Amavubi mu mupira w’amaguru yapfuye azize impanuka. Mafisango ngo yazize impanuka yatewe n’umuntu wari umutwaye kuri moto ahitwa Tazara, i Dar Es Salaam, ahagana saa kumi za mu gitondo ubwo Mafisango yerekezaga iwe atashye.

Patrick Mafisanga waguye muri Tanzania na we azize impanuka

Mu Karere ka Kamonyi aho bita mu Bishenyi na Kamiranzovu ku muhanda Kigali-Gitarama habereye impanuka yakozwe n’imodoka za sosiyete zitwara abantu n’ibintu Horizon Express yavaga i Muhanga yerekeza i Kigali na African Tours yavaga i Kigali igiye i Muhanga zagonganye hapfiramo abantu icyenda harimo n’umushoferi wa Horizon. Abandi 46 bakomerekeye bikabije. Iyi mpanuka yatewe n’uko imodoka zombi zirukaga cyane ku buryo nyuma yo kugongana zose zarenze umuhanda zigonga ibiti byo ku muhanda.

Izi zagonganiye mu karere ka Kamonyi

Birashoboka ko hari impanuka tutashyizemo. Niba hari iyo uzi tutagaragaje kandi ifite icyo yahungabanyije wabitumenyesha kugira ngo hagaragare impanuka zose zabaye, bityo n’abashinzwe kuzikumira babe bareba uko iki kibazo cyakemuka.

Ushobora kubitangaho igitekerezo kuri iyi nkuru, cyangwa ukatwandikira kuri ’e-mail’ yacu ari yo editor@igihe.com.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO