IGIHE.com > Amakuru > U Rwanda
Inkongi y’umuriro yatikije byinshi muri 2012

Inkongi y’umuriro yatikije byinshi muri 2012


Yanditswe kuya 31-12-2012 - Saa 12:22' na Olivier Muhirwa

Umwaka wa 2012, wavuzwemo impanuka nyinshi zaturutse ku nkongi z’umuriro, aho hahiye amazu atuwemo, imodoka, n’amashyamba byakongotse, ariko by’ubwihariko hahiye inzu z’urubyiniro zigera kuri enye zirimo eshatu zo muri Kigali n’imwe yo mu Karere ka Ruhango.

Twifuje kubagezaho rero zimwe mu nkuru twakoze ku IGIHE mu mwaka wa 2012, twanditse zijyanye n’izi nkongi

1. Down Town na La Classe

Inzu iherereye mu Mujyi wa Kigali imbere ya BCR yibasiwe n’inkongi y’umuriro, 40 ku mugoroba wo kuwa Gatanu tariki ya 3 Kanama 2012.

Iyo nzu yahiye igabanijemo ibice bitatu, hamwe hakorera farumasi yitwa Farma vie, ahandi hari akabari kitwa Down town Restaurant, ahandi hari Resirora yitwa La Classe.( Down Town na La Classe ni hamwe mu hari hakunzwe kubyinira abantu benshi muri Kigali).

2. Inkongi y’umuriro yahinduye Cadillac umuyonga

Ku isaha ya saa munani z’ijoro irengaho iminota mike yo ku wa Gatatandatu tariki ya 17 Ugushingo, kamwe mu tubyiniro kazwi muri Kigali, Cadillac VIP kibasiwe n’inkongi y’umuriro.

Bamwe mu baganiriye na IGIHE icyo gihe bari kuri Cadillac banze ko dutangaza amazina yabo, batangaje ko mbere gato y’uko inkongi ifata Cadillac habanje kuza abavugabutumwa bigisha ijambo ry’Imana, basaba abinjiragamo guhunga. Abo bavugagabutumwa b’ijambo ry’Imana, ngo bazengurutse twinshi mu tubyibiro two muri Kigali. andi hose.

3. Muhanga : Akabyiniro ka Orion kahindutse umuyonga

Nyuma y’uko utubyiniro La Class, Down town, na Cadillac two mu Mujyi wa Kigali twafashwe n’inkongi y’umuriro mu mwaka wa 2012, mu Mujyi wa Muhanga na ho inzu y’urubyiniro yari ihari yitwa Orion Club yarahiye ihinduka umuyonga.

Aka kabyiniro kari mu nzu yitwa EXOTICA, y’uwitwa Kabayiza Lambert, yafashwe n’inkongi y’umuriro ku mugoroba wo kuri uyu wa Gatanu tariki ya 21 Ukuboza 2012.

4. Urusengero rwa ADEPR ku Kinamba

Ku itariki ya 26 Ugushyingo 2012, inkongi y’umuriro yatwitse urusengero rwa ADEPR ruherereye ku Kinamba, mu Kagari ka Kamutwa, Umurenge wa Kacyiru mu Karere ka Gasabo, Umujyi wa Kigali.

Iyi nkongi yafashe uru rusengero yahereye mu gisenge hejuru ahakorera abapasiteri n’abandi bashinzwe imirimo muri urwo rusengero.

Mu byangijwe n’iyi nkongi harimo intebe n’ibikoresho bya muzika abaririmbyi bakoreshaga, ahasengerwa na ho hari hamaze gufatwa ariko ku bufatanye bwa Polisi n’abaturage babasha guhosha iyi nkongi.

5. Imodoka eshatu zibasiwe n’inkongi y’umuriro mu Gatsata

Imodoka zigera kuri eshatu zibasiwe n’inkongi y’umuriro mu magaraje akorera mu ishyirahamwe "Icyerekezo" mu Murenge wa Gatsata. Abakorera muri ayo magaraje bavuze ko byatewe n’ipoto y’umuriro (ibyuma by’amashanyarazi) yagize ikibazo ita ibishashi by’umuriro bikongeza imodoka zari mu magaraje.

Ubuyobozi bwa EWSA bwo bwavugaga ko iyo nkongi yatewe n’urusinga rw’umuriro ruturuka mu igaraji rujya mu rindi runyuze munsi y’amabati.
Imodoka zigera kuri eshatu ndetse n’ibikoresho byifashishwa mu bukanishi bw’imdodoka nibyo byibasiwe n’inkongi y’umuriro biragakongoka.

Polisi y’Igihugu yaje gutabara mu kuzimya uyu muriro wo muri Nyakanga 2012, yakoresheje imodoka zabugenewe mu kuzimya umuriro, abakozi bakorera muri ayo magarage bavugaga ko icyo kibazo cyatewe n’ipoto yaturitse ibishashi byayo bigatwika imodoka.

Umuyobozi wa EWSA ishami rya Muhima Habyarimana Paul yavugaga ko EWSA ntaruhare ibifitemo.

6. Gisagara : Inkongi y’umuriro yibasiye ishyamba

Mu karere ka Gisagara mu Murenge wa Gikonko, inkongi y’umuriro yatwitse ishyamba riri ku buso bwa hegitari imwe.
Amakuru yatangazwaga na Polisi muri Nyakanga 2012 ubwo iyi nkongi yabaga, yabugaga ko umuntu utaramenyekana yashyize umuriro mu ishyamba, nyuma abaturage bafatanije na Polisi bagerageza kuwuzimya.

Polisi y’u Rwanda yahamagariye abaturage gukomeza kuba maso cyane cyane mu bihe by’impeshyi, yihanangiriza abanywa itabi ndetse n’abakora imirimo y’ubuhinzi kwirinda gushyira umuriro aho babonye hose.

7. Nyarutarama: Iduka rye ryibasiwe n’inkongi y’umuriro

Iduka rya Kuradusenge Emmanuel riherereye i Nyarutarama, kuwa Kabiri tariki ya 12 Kamena 2012 ryibasiwe n’inkongi y’umuriro yatewe n’ikibazo cy’amashanyarazi ya EWSA (court circuit) nyuma yo guhabwa na Banki ya Kigali inguzanyo ya miliyoni eshatu yo kongeramo ibicuruzwa.

Iri duka rye tyahiye yari amaze amezi abiri afashe inguzanyo muri Banki ya Kigali ya miliyoni 3 z’amafaranga y’u Rwanda, aho yari amaze kwishyuramo ibihumbi 310 by’amafaranga y’u Rwanda.

Gusa ngo ajya gufata iyi nguzanyo bitewe n’uko yari iy’ubucuruzi, yahawe ubwishingizi bwa SORAS.

8. Nyabugogo : Tagisi yari mu igaraji yafashwe n’inkongi y’umuriro

Mu gitondo cyo kuri uyu wa mbere tariki 3 Nzeri 2012, mu igaraji yo kuri sitasiyo HASS y’i Nyabugogo tagisi yafashwe n’inkongi y’umuriro ku bw’amahirwe ntiyagira uwo ihitana.

9. Musanze : Buji yateye inkongi y’umuriro uhitana umuntu umwe

Mu Murenge wa Kinigi, Akagari ka Kampanga, Umudugudu wa Muhe ho mu Karere ka Musanze haraye hahiye amazu y’ubucuruzi 6 biturutse ku nkongi y’umuriro yaturutse kuri buji hapfa umuntu umwe.

Iyi nkongi y’umuriro yatangiye ku isaha ya saa ine z’ijoro ryo ku wa 28 Ukuboza rishyira ku wa 29 Ukuboza 2012, ubwo Hitimana Gregoire wari umucuruzi w’inkweto zizwi ku izina rya boda boda yafatishaga buji agahita asinzira atayijimije.

Uku gushya kw’izi nzu kwahitanye umuntu umwe kwabayeho nyuma y’uko mu Rwanda hari hamaze iminsi hashya inzu akenshi zihuriramo abantu benshi nk’utubari, utubyiniro n’izindi ariko ntizitware ubuzima bw’abantu.

10. Kigali : Inkongi y’umuriro yibasiye inzu ituwemo

Ku mugoroba wo ku wa Gatatu tariki ya 19 Ukuboza 2012, inkongi y’umuriro yibasiye inzu y’umuturage mu Kagali k’Amahoro imbere y’ahitwa kwa Kiruhura mu Murenge wa Muhima mu Karere ka Nyarugenge, ku bw’amahirwe ntihagira uhagwa, usibye ibintu byinshi byahatikiriye.

11. Nyamasheke : Amazu abiri y’ubucuruzi yibasiwe n’inkongi y’umuriro

Iyi nkongi y’umuriro yabereye mu Mudugudu wa Karambo, Akagali ka Kigoya, Umurenge wa Kanjongo, ku itariki ya 03 Gashyantare 2012, yatumye umucuruzi witwa Manirafasha atakaza ibifite agaciro k’ibihumbi 600, Mugabushaka Alexis we yatakaje iby’ibihumbi 280,000 n’amafaranga ibihumbi 16, naho Niyonsaba Jean Pierre we atakaza ibifite agaciro k’ibihumbi 180.

Nyuma y’aho Polisi mu Karere ka Nyamasheke imenyeye iyi mpanuka, yaje gutabara igerageza kuzimya umuriro yifashishije imodoka za kizimyamwoto.

Chief Superintendent Reverien Rugwizangoga ushinzwe gukumira impanuka ziturutse ku muriro yasabye abaturage kwirinda icyatera bene izo mpanuka kuko zihitana abantu benshi. Yabasabye kuba maso mu bihe by’ubushyuhe kuko nabwo buri mu byongera imanuka.

12. Kacyiru : Inzu yahiye, ibyarimo byose biba umuyonga

Muri Gashyandare inkongi y’umuriro yafashe inzu mu Murenge wa Kacyiru mu Kagari ka Kamatamu, Umudugudu w’Uruhongore, ku bw’amahirwe abari mu nzu bararokoka.

Iyi nzu yari ituwemo n’umuryango wa Twagirimana Theoneste ndetse ni nayo bashakiragamo ubuzima babinyujije mu bucuruzi bakoreragamo kuko bari bafitemo butike (boutique).

Ubwo Polisi yarwanaga no kuzimya umuriro nibwo umukozi wa EWSA nawe yaje gukupa umuriro.

Iyi nzu yahiriyemo ibintu bifite agaciro ka miliyoni esheshatu n’amafaranga atazwi umubare.

13. Inkongi y’umuriro yahitanye umwana mu nkambi ya Gihembe

Mu kwezi kwa Mata 2012, inkongi y’umuriro yafashe inzu mu nkambi ituyemo abaturage b’impunzi baturutse muri Repubulika Iharanira Demokarasi ya Kongo ya Gihembe mu Karere ka Gicumbi ihitana umwana w’imyaka itanu.

Iyi nkongi yatewe na buji yaje gufatisha igodora yari iryamweho na nyakwigendera Elias Mucunguzi w’imyaka itanu y’amavuko. Abatuye muri iyi nkambi bavuga ko babonye uyu muriro ahagana saa munani z’ijoro bagahitabatangira kuwuzimya.

Polisi yasabye abantu bose kuba maso igihe bakoresha itara rishobora guteza ibibazo bakajya bakabanza kurizimya mbere yo kuryama.

14. Rubavu : Ikamyo yari itwaye lisansi yahiye irakongoka

Imodoka y’ikamyo yari twaye litiro zigera ku bihumbi 40 za lisansi yarahiye irakongoka mu masaha ya saa tanu za mugitondo, kuri uyu wa Gatatu tariki ya 4 Nyakanga 2012, ubwo yaburaga ikirometero kimwe ngo igere mu Mujyi wa Gisenyi, yari mu Murenge wa Rugerero Akarere ka Rubavu.

Iyi kamyo yavaga mu gihugu cya Tanzania yerekeza mu Mujyi wa Goma muri Repubulika Iharanira Demukarasi ya Congo, yari ifite pukali T986BWW.

Bamwe mu babonye iyi nkongi y’umuriro buvugaga ko bashima Imana kubona nta muntu iyi nkongi yahitanye, ndetse no kuba iyo kamyo itahiriye hagati y’amazunabyo ngo ni amahirwe akomeye, kuko iyo ihahira byarikwangiza byinshi utaretse n’ubuzima bw’abantu bwashoboraga kujya mu kaga.

15. Gisozi : Ibishyingiranwa bye byabaye umuyonga ubukwe bwegereje

Kuwa 12 Ugushyingo 2012, ahagana mu ma saa tanu za mu gitondo, ku Gisozi mu Mujyi wa Kigali inzu ya Mugabo Jerôme yafashwe n’inkongi y’umuriro ibyari mu nzu byose biba umuyonga, harimo n’ibyo umukobwa we yari kuzashyingiranwa.

Iyo mpanuka yabereye mu Mudugudu wa Kumukenke, Akagari ka Ruhango, Umurenge wa Gisozi mu Karere ka Gasabo.

Muri rusange mu mwaka wa 2012, hagiye nhavugwa inkongi za hato na hato, aho abenshi batungaga agatoki umuriro w’amashanyarazi ya EWSA kuba nyirabayazana w’izi nkongi.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO