IGIHE.com > Amakuru > U Rwanda
Kamonyi : Abaturage basabwa guhinga inanasi

Kamonyi : Abaturage basabwa guhinga inanasi


Yanditswe kuya 1er-03-2013 - Saa 02:22' na IGIHE

Abahinzi batuye mu Mudugudu wa Kigarama mu Kagari ka Sheri mu Murenge wa Rugalika, barasabwa kwitabira ubuhinzi bw’inanasi kuko ari ubuhinzi bufite akamaro mu bukungu bw’umuryango.

Ibi babisabwe n’Umunyamabanga Nshingwabikorwa w’Umurenge wa Rugalika Rukimbira Emmanuel, mu muganda wo kuri uyu wa Kane tariki ya 28 Gashyantare 2013, wahuje ubuyobozi bw’Umurenge hamwe n’abaturage bo muri uyu Mudugudu wa Kigarama.

Umunyamabanga Nshingwabikorwa w’uyu Murenge yongeyeho ko nta kibazo cy’isoko ry’inanasi abazitabira ubu buhinzi bazagira, kuko Akarere kagiye kubaka isoko bazajya bacururizamo izo nanasi rikazubakwa muri Kigarama, ndetse ubuyobozi bukazakomeza gukora ubuvugizi ku bigo bikomeye no mu nganda zitunganya uyu musaruro hagamijwe kubashakira isoko rihoraho.

Ku ruhande rw’Ubuyobozi bw’Akarere, Mukiza Justin ushinzwe ubuhinzi avuga ko kwitabira ibikorwa by’ubuhinzi ari ingirakamaro, kandi ko nk’ubuyobozi bazakomeza kuba hafi aba bahinzi. Mukiza yibukije ko Akarere gafite inshingano zo kwegereza abahinzi imbuto y’inanasi kandi iyi mbuto ikaba itangirwa ubuntu ku bufatanya n’ikigo cy’Igihugu gishinzwe guteza imbere ubuhinzi bw’imboga n’imbuto, NAEB.

Ni ubwa mbere abaturage b’uyu Mudugudu wa Kigarama bagiye guhinga inanasi, iki gihingwa kikaba kije kiyongera ku bindi byatoranyijwe ku kuba bitanga umusaruro ufatika birimo imyumbati, ibigori, ibishyimbo ndetse na Kawa.

Faustin Ntakirutimana Ushinzwe Itangazamakuru mu Karere ka Kamonyi

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO