IGIHE.com > Amakuru > U Rwanda
Kayonza: Polisi yafunze abantu bakekwaho kunyereza amafaranga y’umurenge Sacco

Kayonza: Polisi yafunze abantu bakekwaho kunyereza amafaranga y’umurenge Sacco


Yanditswe kuya 24-01-2013 - Saa 06:49' na RNP

Polisi mu karere ka Kayonza kuri uyu wa 21 Mutarama yafunze abantu 5 bakaba bakekwaho kunyereza amafaranga 2.909.000 bakoresheje kashe mpimbano y’umurenge sacco ya Nyamirama, ndetse no kwigana umukono.

Nk’uko Polisi ikorera mu karere ka Kayonza ibitangaza, abo bose uko ari 5 ni abakozi b’iyo sacco ya Nyamirama, Polisi ikaba itatangaje amazina yabo kubera ko ikiri mu iperereza, bakaba barimo umuyobozi w’iyo sacco(gerant), umucungamutungo, ba abashinzwe gutanga amafaranga babiri, ndetse n’ushinzwe inguzanyo.

Polisi yo muri ako Karere ikomeza itangaza ko mu iperereza yakoze kandi rigikomeje, muri bo hari abafunguje compte, bakayandika ku muntu, bakajya bafata amafaranga ya sacco, bakayashyira kuri iyo compte, nyuma bakajya bayabikuza, ariko Polisi mu iperereza ikomeje, ikaba ikeka ko hashobora kuba hari n’abanyamuryango b’iyo sacco nabo batatangajwe amazina bafite uruhare muri ubu bujura ikaba ikibashakisha.

Umuvugizi wa Polisi mu ntara y’i burasirazuba superintendent Benoit Nsengiyumva yasabye abafite compte mu mirenge sacco kujya babaza buri gihe uko compte zabo zihagaze, aho yagize ati: “Abafite compte mu mirenge sacco, ibigo by’imari,no mu zindi banki, ndetse n’abayobozi b’ibyo bigo na banki, bakwiye kujya bareba uko compte zabo zihagaze inshuro nyinshi, kandi abakozi b’ibyo bigo by’imari nabo bakareba neza ku mafishi mbere yo guha amafaranga umunyamuryango baje babagana” .

Aba nibaramuka bahamwe n’icyaha, bazahanishwa ingingo ya 300 yo mu gitabo cy’amategeko ahana cy’u Rwanda, aho ivuga ko umuntu wese ukora ubujura budakoreshejwe kiboko cyangwa ibikangisho, ahanishwa igifungo kuva ku mezi atandatu kugeza ku myaka ibiri, n’ihazabu y’amafaranga y’u Rwanda yikubye inshuro kuva kuri ebyiri kugeza kuri eshanu z’agaciro k’icyibwe cyangwa kimwe gusa muri ibyo bihano

Ingingo ya 301 yo ivuga ko iyo abakoze icyaha cyangwa umwe muri bo biyitiriye izina cyangwa bitwaje ibimenyetso biranga umukozi wa Leta cyangwa by’umuntu ushinzwe umurimo rusange ufitiye abaturage akamaro babeshya ko babitumwe n’ubutegetsi, igihano ntarengwa giteganyijwe mu ngingo ya 300 y’iri tegeko ngenga cyikuba kabiri.

Ingingo ya 609 yo ikavuga ko umuntu wese uhimba cyangwa uhindura mu buryo ubwo ari bwo bwose inyandiko, ashyiraho umukono cyangwa igikumwe bitari byo, yonona inyandiko cyangwa imikono, asimbuza abantu abandi, ahimba amasezerano, imiterere y‟ingingo zayo, igitegetswe gukorwa cyangwa icyarangije kwemeranywa, ahanishwa igifungo kirenze imyaka itanu kugeza ku myaka irindwi n‟ihazabu y‟amafaranga y‟u Rwanda kuva ku bihumbi magana atatu kugeza kuri miliyoni eshatu.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO