IGIHE.com > Amakuru > U Rwanda
Kigali : Igikorwa cyo kwita imihanda amazina no gushyira ibyapa ku nyubako kirasozwa muri Gicurasi

Kigali : Igikorwa cyo kwita imihanda amazina no gushyira ibyapa ku nyubako kirasozwa muri Gicurasi


Yanditswe kuya 6-02-2013 - Saa 16:38' na IGIHE

Mu rwego rwo kworohereza abantu kuyoboka no kuyobora ababagana, mu Mujyi wa Kigali harimo kurangizwa igikorwa cyo gushyiraho ibyapa by’amazina y’imihanda mu gice cyatangiriweho cy’ahafatwa nk’umujyi (urban area).

Nk’uko tubikesha Ubuyobozi bw’Umujyi wa Kigali, igikorwa kirasozwa mu mirenge yahereweho mu turere tugize Umujyi ni ikurikira :

a) Akarere ka Gasabo hari Umurenge wa Gisozi, Kacyiru, Kimihurura, Kimironko, Kinyinya na Remera.

b)Akarere ka Kicukiro ni Umurenge wa Gatenga, Gikondo, Kagarama, Kanombe, Kicukiro, Kigarama, Niboyi na Nyarugunga.

c) Akarere ka Nyarugenge hari Umurenge wa Gitega, Muhima, Nyakabanda, Nyamirambo, Nyarugenge na Rwezamenyo.

Ibyapa bishyirwa ku mihanda

Amazina y’imihanda agizwe n’impine y’inyuguti ebyiri zakumvikana mu buryo bworoshye nk’Akarere ko mu Mujyi wa Kigali umuhanda uvugwa uturukamo (KG : Kigali/Gasabo, KK : Kigali/Kicukiro, KN : Kigali/Nyarugenge) zikurikiwe n’umubare uranga uko imihanda ikurikirana bitewe n’aho buri wose uturuka. Bishingirwaho mu kuyikurikiranya ku rutonde bityo aho bishoboka ko ikurikirana bikurikije imibare byorohereza abantu kuyoboka.

Imihanda igabanijemo ibyiciro 3 :

Imihanda minini (Boulevard/Road) igaragazwa n’ikirango cya : Rd mu nguni y’icyapa ahahera hejuru imbere y’izina ry’umuhanda ;

Imihanda iciriritse ihuza iminini n’imito (Avenue) igaragazwa n’ikirango cya : Av mu nguni y’icyapa hejuru imbere y’izina ;

Imihanda mito yo muri "Quartiers"(Street) irangwa n’ikirango cya : St mu nguni yo hejuru imbere y’izina.

Buri rugo ruzajya rumenyeshwa umuhanda ruriho munyandiko izajya itangwa n’ubuyobozi bw’ibanze.

Iki gikorwa kizakurikirwa n’ishyirwaho rya numero ziranga ingo z’abaturage n’ibigo bitandukanye byo muri iki gice cy’umujyi guhera mu kwezi kwa gatatu (Werurwe) 2013.

Mu gihe kitarenze amezi atatu (ni ukuvuga kugeza mu kwezi kwa Gicurasi 2013) buri nyubako iri ku muhanda igomba kuba yamaze gushyirwaho nomero iyiranga.

Buri nyubako ifite nomero yagenewe bitewe n’igice cy’umuhanda iherereyeho kandi itangwa hakurikijwe uburyo bw’ikoranabuhanga bwakorewe inyigo n’inzobere zabiteguye. Nomero ijya ku nyubako yanditse ku cyapa cyabugenewe.

Imiterere y’icyapa cya nomero y’inyubako :

Icyapa kiranga inyubako

Icyapa cya nomero iranga inyubako gikoranye ubuhanga no mu bikoresho byubahirije ubuziranenge n’ibipimo byashyizweho, gisomeka neza ku buryo bugaragara ku manywa na nijoro kimuritsweho.

Urugero rw'ibyapa bizashyirwa ku nzu

Icyapa gisanzwe gifite santimetero mirongo ine (40 cm) z’uburebure na santimetero makumyabiri n’eshanu z’ubugari ( 25cm) nk’uko amabwiriza y’Inama Njyanama y’Umujyi wa Kigali yo ku wa 15 Mutarama 2012 abiteganya.

Amazina mashya y’imihanda na nomero nshya ziranga inyubako mu Mujyi wa Kigali, birasimbura ubundi buryo ubwo ari bwo bwose bwari busanzwe bukoreshwa.

Uko nomero y’inyubako iboneka

Icyapa cya nomero iranga inyubako gikorwa kikanashyirwa ahabugenewe ku irembo rikuru (cyangwa umuryango mukuru) rireba ku muhanda ku nyubako, ku burebure hagati ya metero imwe n’igice (1,5m) na metero ebyiri n’igice (2,5m), bikozwe na Rwiyemezamirimo wabitsindiye mu ipiganwa ryakoreshejwe n’Umujyi wa Kigali.

Umurenge inyubako iherereyemo uha buri nyubako nomero iyiranga.
Buri wese ashyirirwaho icyapa cya numero iranga inyubako ye mu gihe kitarenze iminsi itanu akimara kwishyura amafaranga y’ikiguzi cyayo.

Igisabwa abaturage

1. Abantu bose bafite inyubako ziri ku muhanda mu bice byavuzwe hejuru birebwa n’iyi gahunda, barasabwa kwitabira gushyiraho numero yabugenewe iyiranga.

2. Abantu barasabwa kwitegura kwishyura amafaranga 12 000 Frw yishyurwa icyarimwe ku cyapa kimwe cya numero iranga inyubako.
3. Buri wese arasabwa kubungabunga no kurinda nomero y’inyubako ye ikaramba kuko yakozwe mu buryo izamara igihe kirenga imyaka irindwi (7).

4. Abantu bose barasabwa kurinda no kubungabunga ibyapa by’amazina y’imihanda aho cyangijwe cyangwa kivanyweho, abatuye Umudugudu bakihutira gutanga umuganda wo kwishyura ikiguzi cyo kugisimbuza, mu gihe uwacyangije atamenyekanye ngo acyishyure.

Ubuyobozi bw’Umujyi wa Kigali.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO