Komisiyo y’Igihugu y’Uburenganzira bwa muntu iranenga bamwe mu Banyarwanda bagira ibibazo byo guhungabanyirizwa uburenganzira ntibabivuge ngo ibikurikirane, mu gihe kubikurikirana ntawayibigejejeho bibonwa nko kwivanga.
Ibi byatangajwe n’abayobozi b’iyi Komisiyo ku wa Gatatu tariki ya 13 Werurwe 2013 mu kiganiro yagiranye n’abanyamakuru.
Mu bibazo bitandukanye abanyamakuru bagiye babaza CNDP harimo iby’abantu bahungabanywa n’ubuyobozi hirya no hino mu Rwanda. Urugero ni uwitwa Yamuragiye Rosary wari utuye mu Murenge wa Mwendo ubarizwa mu Karere ka Ruhango wawimuwemo agatuzwa mu wa Kinihira muri ako karere, Kubera ikibazo cy’ubusinzi yashinjwaga n’inzego z’ibanze, mu gihe we avuga ko ubuyobozi bwamuhaye akato bumuziza ko abana n’ubwandu bwa Virusi itera SIDA.
Gusa ibi bitandukanye n’Itegeko Nshinga rya Repubulika y’u Rwanda, aho mu ngingo yaryo ya 23 rigira riti “Buri Munyarwanda afite uburenganzira bwo kujya aho ashaka hose no gutura aho ari ho hose mu Rwanda. Buri Munyarwanda afite uburenganzira bwo kuva mu gihugu n’ubwo kukigarukamo”.
Hari n’ikibazo cy’abaturage bo mu Karere ka Rulindo bahawe akato ko kutemererwa kwinjira mu kabari no mu maresitora yose yo mu gace batuyemo mu Murenge wa Musheri, kuko bahungabanya umutekano nyuma yo gusinda.
Aha kandi ngo hari abayobozi bo mu turere nka Nyanza na Ngororero dufunga abaturage tukanabambura imitungo yabo ngo bishyure mituweli ku ngufu.
Kayumba Deogratias, Visi Perezida wa Komisiyo y’Uburenganzira bwa Muntu avuga ko ibikorwa nk’ibyo ari ihungabanywa ry’uburenganzira bwa muntu iyi komisiyo ishinzwe kurengera.
Nyamara ngo igira ikibazo ko abahohotewe batayigezaho ibi bibazo ngo ibikurikirane akaba ariyo mpamvu isaba abahohoterwa kuyigezaho ibibazo byabo, nyuma yo kunanirana mu zindi nzego ikabibakurikiranira.
Mu bibazo bisaga ibihumbi bibiri iyi komisiyo yagejejweho muri 2012, ibirenga 69% byabonewe ibisubizo.
IKINYARWANDA
IKIRUNDI
ENGLISH
FRANÇAIS
Ahabanza
Abo Turibo
Serivisi
Twandikire
Ibirimo
