IGIHE.com > Amakuru > U Rwanda
Kugirira amenyo isuku bikwiye gutangirira ku bato

Kugirira amenyo isuku bikwiye gutangirira ku bato


Yanditswe kuya 1-03-2013 - Saa 07:56' na Emma-Marie Umurerwa

Ishyirahamwe ry’abavuzi b’amenyo n’indwara zo mu kanwa ku bufatanye na Minisiteri y’Ubuzima, mu rwego rwo gukangurira abakiri bato kwita ku isuku y’amenyo hirindwa ingaruka zaterwa no kutagira isuku mu kanwa harimo n’indwara ya kanseri batanze uburoso bw’amenyo n’umuti wayo ku banyeshuri biga mu mashuri abanza.

Ni mu gikorwa cyabaye ku wa kane tariki ya 28 Gashyantare 2013, abanyeshuri bo mu ishuri rimwe ryo mu mujyi wa Kigali n’irindi ryo mu Ntara y’Amajyaruguru basobanurirwa iby’isuku y’amenyo.

Dr Birori Placide wari mu itsinda ry’abaganga bari muri iki gikorwa yababwiye ko guhera ku mezi icyenda umwana atangiye kumera amenyo isuku yayo iba igomba kwitabwaho, agakorerwa isuku nibura gatatu ku munsi kandi akayasukura mu gihe cy’iminota iri hagati y’itanu n’icumi.

Yababwiye kandi ko kogesha amenyo umuti wabugenewe ari ingenzi, kandi ko umuntu aba agomba kujya gusuzumisha amenyo ye nibura rimwe mu mezi atandatu.

Aba banyeshuri bagiriwe inama y’ibyo bakwiye gukora kugira ngo amenyo akomeze amere neza kuko ngo iyo atitaweho bishobora kuvamo indwara ya kanseri. Babwiwe kwirinda ibinyobwa n’ibiribwa birimo isukari nyinshi, hakibandwa ku bifite isukari y’umwimerere kandi ukora isuku y’amenyo akibuka no gusukura ururimi.

Banabwiwe ko bashobora gukoresha akadodo gafite isuku bakakanyuza hagati y’amenyo, kugira ngo imyanda iba yasigaye hagati y’amenyo na yo ivemo.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO